މިއަދުގެ ބައްދަލުވުމުގައި، އޮޑިޓަރ ޖެނެރަލްގެ އޮފީހުން ކޮށްފައިވާ ފެނަކަ ކޯޕަރޭޝަން ލިމިޓެޑުގެ ޚާއްޞަ އޮޑިޓް ރިޕޯޓު (މުދަލާއި ޚިދުމަތް ހޯދުމާއި، ކުންފުނީގެ މާލީ ޙާލަތާއި ހިސާބު ބެލެހެއްޓުމާގުޅޭ) އިން ފާހަގަވެފައިވާ ކޮރަޕްޝަންގެ ޢަމަލުތައް ތަޙްޤީޤުކޮށް ފިޔަވަޅުއެޅުން އަވަސްކުރުމަށް ގޮވާލައި ހުށަހަޅާފައިވާ ޤަރާރާ ގުޅޭގޮތުން މަޝްވަރާކުރެއްވިއެވެ. އެގޮތުން، ކޮމިޓީން ހުށަހެޅި ރިކޮމެންޑޭޝަންތަކާއެކު ޤަރާރު ފާސްކުރުމަށް ފުނަދޫ ދާއިރާގެ މެންބަރު މުޙައްމަދު މަމްދޫޙް ހުށަހަޅުއްވައި، ގުރައިދޫ ދާއިރާގެ މެންބަރު ހަނާން މުޙައްމަދު ރަޝީދު ތާޢީދުކުރެއްވިއެވެ. މި ހުށަހެޅުން ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އަޣްލަބިއްޔަތުން ފާސްވިއެވެ.

އޮޑިޓަރ ޖެނެރަލްގެ އޮފީހުން ކޮށްފައިވާ ފެނަކަ ކޯޕަރޭޝަން ލިމިޓެޑުގެ ޚާއްޞަ އޮޑިޓް ރިޕޯޓުތައް (ފެނަކަ ކޯޕަރޭޝަން ލިމިޓެޑްއިން އައްޑޫސިޓީގައި ހިންގާ ބްރާންޗްތަކާއި ޕްރޮޖެކްޓްތަކުގެ ޚާއްޞަ އޮޑިޓް ރިޕޯޓާއި މުވައްޒަފުން ރެކްރޫޓް ކުރުމާއި ޕްރޮމޯޝަން ދިނުމާއި މުސާރައާއި ޢިނާޔަތްތަކާގުޅޭ ޚާއްޞަ އޮޑިޓް ރިޕޯޓު އަދި މުދަލާއި ޚިދުމަތް ހޯދުމާއި، ކުންފުނީގެ މާލީ ޙާލަތާއި ހިސާބު ބެލެހެއްޓުމާގުޅޭ ޚާއްޞަ އޮޑިޓް ރިޕޯޓު) ދިރާސާކުރުމުގެ މަސައްކަތް ކުރިއަށް ގެންދާނެގޮތާމެދު މަޝްވަރާކުރެއްވިއެވެ. އެގޮތުން، ފެނަކަ ކޯޕަރޭޝަން ލިމިޓެޑުގެ ޚާއްޞަ އޮޑިޓް ރިޕޯޓުތައް ދިރާސާކުރުމަށް 5 މެންބަރުންގެ ސަބް-ކޮމިޓީއެއް އެކުލަވާލުމަށް ކެލާ ދާއިރާގެ މެންބަރު ޢަބްދުﷲ ޝަރީފް ހުށަހަޅުއްވައި، ހިތަދޫ މެދު ދާއިރާގެ މެންބަރު އަޙްމަދު އަޒާން މަރުޒޫޤު ތާޢީދުކުރެއްވި ހުށަހެޅުން ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން ފާސްވިއެވެ.

ފެނަކަ ކޯޕަރޭޝަން ލިމިޓެޑުގެ ޚާއްޞަ އޮޑިޓް ރިޕޯޓުތައް ދިރާސާކުރުމަށް ހޮއްވެވި ސަބް-ކޮމިޓީގެ މެންބަރުންގެ ގޮތުގައި އަންނަނިވި މެންބަރުން ހިމެނުމަށް ކެލާ ދާއިރާގެ މެންބަރު ޢަބްދުﷲ ޝަރީފް ހުށަހަޅުއްވައި، ފުވައްމުލަކު އުތުރު ދާއިރާގެ މެންބަރު ޙަމަދު ޢަބްދުﷲ ތާޢީދުކުރެއްވައި، ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން ނިންމެވިއެވެ.

1. ހުޅުމާލެ ދެކުނު ދާއިރާގެ މެންބަރު ޑޮކްޓަރ އަޙްމަދު ޝަމްހީދު؛
2. ކެލާ ދާއިރާގެ މެންބަރު ޢަބްދުﷲ ޝަރީފް؛
3. ފުނަދޫ ދާއިރާގެ މެންބަރު މުޙައްމަދު މަމްދޫޙް؛
4. ދިއްގަރު ދާއިރާގެ މެންބަރު އަޙްމަދު ނާޡިމް؛ އަދި 
5. ހިތަދޫ މެދު ދާއިރާގެ މެންބަރު އަޙްމަދު އަޒާން މަރުޒޫޤު.

އެއަށްފަހު، ޤާނޫނު ނަންބަރު 4/2007 (އޮޑިޓް ޤާނޫނު) އަށް ހުށަހަޅާފައިވާ އިޞްލާޙާއި، ޤާނޫނު ނަންބަރު 3/2013 (ދައުލަތުގެ ވިޔަފާރި ތަންތަން ޕްރައިވަޓައިޒްކުރުމާއި ކޯޕަރަޓައިޒްކުރުމާއި އަދި މޮނިޓަރކޮށް އިވެލުއޭޓްކުރުމުގެ ޤާނޫނު) އަށް އިޞްލާޙާއި، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް ގެންނަން ހުށަހަޅާފައިވާ އިސްލާޙުތަކާމެދު ބަންޑާރަނައިބުގެ އޮފީހާއި އޮޑިޓަރ ޖެނެރަލްގެ އޮފީހުން ދެއްވާފައިވާ ލަފާ ކޮމިޓީގެ މެންބަރުންނާ ހިއްސާކުރެއްވިއެވެ.

އޭގެ އިތުރުން، ކޮމިޓީއަށް ލިބިފައިވާ އަންނަނިވި ލިޔުންތައް ކޮމިޓީގެ މެންބަރުންނާ ހިއްސާކުރެއްވިއެވެ.

1. މިނިސްޓްރީ އޮފް ފިނޭންސް އެންޑް ޕްލޭނިންގ އިން ފޮނުއްވާފައިވާ، 2024 އަހަރުގެ ހަތަރުވަނަ ކުއަރޓަރ ނިމުނުއިރު ދައުލަތަށް ނަގާފައިވާ ލޯނާއި، ދައުލަތުން ސޮވްރިންގ ގެރެންޓީ ދޫކޮށްފައިވާ ލޯނު އަދި ދައުލަތުން ދޫކޮށްފައިވާ ލޯނުގެ ތަފްޞީލު.
2. މިނިސްޓްރީ އޮފް ފިނޭންސް އެންޑް ޕްލޭނިންގ އިން ފޮނުއްވާފައިވާ، 2025 ވަނަ އަހަރަށް ލަފާކުރި ދައުލަތުގެ ބަޖެޓުގެ ކޭޝްފްލޯ ޕްލޭން.
3. ރައްޔިތުންގެ މަޖިލީހުން ފާސްކޮށްފައިވާ "މޯލްޑިވްސް ކަސްޓަމްސް ސަރވިސްގެ 2012، 2013، 2014، 2015، 2016، 2017، 2018 އަދި 2019 ވަނަ އަހަރުގެ އޮޑިޓް ރިޕޯޓުތައް ކޮމިޓީން ދިރާސާކޮށް ނިންމިގޮތުގެ ރިޕޯޓު" އާ ގުޅޭގޮތުން މޯލްޑިވްސް ކަސްޓަމްސް ސަރވިސް އިން ފޮނުވާފައިވާ ސިޓީ.
4. ރައްޔިތުންގެ މަޖިލީހުން ފާސްކޮށްފައިވާ "މޯލްޑިވްސް ޕޯޓްސް ލިމިޓެޑްގެ އޮޕަރޭޝަންތަކަށް ބޭނުންވާ ޑީސަލް ގަތުމުގެ މުޢާމަލާތްތަކާގުޅޭ ޚާއްޞަ އޮޑިޓް ރިޕޯޓު (2018-2020) ކޮމިޓީން ދިރާސާކޮށް ނިންމިގޮތުގެ ރިޕޯޓު" އާ ގުޅޭގޮތުން ފިއުލް ސަޕްލައިސް މޯލްޑިވްސް އިން ފޮނުވާފައިވާ ސިޓީ.

އަދި، ރައްޔިތުންގެ މަޖިލީހުން ފާސްކޮށްފައިވާ "މޯލްޑިވްސް ޕޯޓްސް ލިމިޓެޑްގެ އޮޕަރޭޝަންތަކަށް ބޭނުންވާ ޑީސަލް ގަތުމުގެ މުޢާމަލާތްތަކާގުޅޭ ޚާއްޞަ އޮޑިޓް ރިޕޯޓު (2018-2020) ކޮމިޓީން ދިރާސާކޮށް ނިންމިގޮތުގެ ރިޕޯޓު" ގައި ފިއުލް ސަޕްލައިސް މޯލްޑިވްސްއަށް ލަފާދެއްވާފައިވާ ކަންކަން ތަންފީޒުކުރެވިފައިވާ މިންވަރާ ގުޅޭގޮތުން މަޝްވަރާކުރުމަށް އެ ކުންފުނީގެ ބޭފުޅުންނާ ބައްދަލުކުރެއްވުމަށް ކެލާ ދާއިރާގެ މެންބަރު ޢަބްދުﷲ ޝަރީފް ހުށަހަޅުއްވައި، ހިތަދޫ މެދު ދާއިރާގެ މެންބަރު އަޙްމަދު އަޒާން މަރުޒޫޤު ތާޢީދުކުރެއްވި ހުށަހެޅުން ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން ނިންމެވިއެވެ.