މިއަދުގެ ބައްދަލުވުމުގައި އެންމެ ފުރަތަމަ ކުރިއަށް ގެންގޮސްފައިވަނީ، ކޮމިޓީއަށް ހުށަހެޅިފައިވާ ބިލުތަކުގެ ތެރެއިން ސުންގަޑި ހަމަވެފައިވާ ބިލުތަކުގެ ސުންގަޑި އިތުރުކުރުމުގެ މަސައްކަތާއި ކޮމީޓީއަށް އަލަށް ހުށަހެޅިފައިވާ ބިލުތަކުގެ ސުންގަޑި ކަނޑައެޅުމުގެ މަސައްކަތެވެ.

އެގޮތުން، ޖަނަވާރު ގެންގުޅުމާއި ޖަނަވާރުގެ ރައްކާތެރިކަމުގެ ބިލާއި، ޒަކާތު ބިލާއި، ޤާނޫނު ނަންބަރު 4/2012 (ތެލަސީމިއާ ކޮންޓްރޯލްކުރުމުގެ ޤާނޫނު) އަށް 1 ވަނަ އިޞްލާޙު ގެނައުމުގެ ބިލާއި އިންސާނުންގެ ގުނަވަން ޓްރާންސްޕްލާންޓްކުރުމުގެ ބިލުގެ ސުންގަޑިއެއްގެ ގޮތުގައި 25 ނޮވެންބަރު 2025 ކަނޑައެޅުމަށް ކެންދޫ ދާއިރާގެ މެންބަރު މަޢުރޫފް ޛާކިރު ހުށަހެޅުއްވިއެވެ. މި ހުށަހެޅުއްވުމަށް ދާންދޫ ދާއިރާގެ މެންބަރު މުޙައްމަދު ފަޟީލް ތާއީދުކުރެއްވިއެވެ.  މި ހުށަހެޅުއްވުން ކޮމިޓީއަށް އެވަގުތު ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާގުން ފާސްވިއެވެ.

ދެވަނަ ކަމަކަށް މަޝްވަރާކުރެއްވީ އިންސާނުންގެ ގުނަވަން ޓްރާންސްޕްލާންޓްކުރުމުގެ ބިލާ ގުޅޭގޮތުން ޢާންމުގެ ޚިޔާލު ހޯދުމަށް ޢަންމު އިޢުލާނުކުމާއި، ކަމާ ގުޅުންހުރި އިދާރާތަކުގެ ޚިޔާލު ހޯދުމަށް ސިޓީ ފޮނުވުމާ ގުޅޭގޮތުންނެވެ. އެ ގޮތުން ދާންދޫ ދާއިރާގެ މެންބަރު މުޙައްމަދު ފަޟީލް ހުށަހަޅުއްވާފައިވަނީ ބިލާ ގުޅޭގޮތުން ޢާންމުގެ ޚިޔާލު ހޯދުމަށާއި ކަމާ ގުޅުންހުރި އިދާރާތަކުގެ ޚިޔާލު ހޯދުމަށް 10 ނޮވެންބަރު 2025 ގެ ނިޔަލަށް ފުރުޞަތު ހުޅުވާލުމަށެވެ. މި ހުށަހެޅުއްވުމަށް ކާށިދޫ ދާއިރާގެ މެންބަރު މުންތަޡިމް އިބްރާހީމް ތާއީދުކުރެއްވިއެވެ.  މި ހުށަހެޅުއްވުން ކޮމިޓީއަށް އެވަގުތު ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާގުން ފާސްވިއެވެ.

ތިންވަނަ ކަމަކަށް ކޮމިޓީން މަޝްވަރާކުރެއްވީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 91 ވަނަ މާއްދާގެ (ހ) ގައި ބަޔާންކޮށްފައިވާ ގޮތުގެމަތިން، ރައްޔިތުންގެ މަޖިލީހުން އަލުން ވިސްނުމަށް ރައީސުލްޖުމްހޫރިއްޔާ ފޮނުއްވާފައިވާ، ޤާނޫނު ނަންބަރު 4/2012 (ތެލަސީމިއާ ކޮންޓްރޯލްކުރުމުގެ ޤާނޫނު) އަށް 1 ވަނަ އިޞްލާޙު ގެނައުމުގެ ބިލާ ގުޅޭގޮތުންނެވެ. އެ ބިލާ ގުޅޭގޮތުން މޯލްޑިވިއަން ތެލަސީމިއާ ސޮސައިޓީއާއި މޯލްޑިވިއަން ބްލަޑް ސަރވިސަސްގެ ކަމާ ގުޅުންހުރި ބޭފުޅުންނާ ބައްދަލުކުރެއްވުމަށް ދާންދޫ ދާއިރާގެ މެންބަރު މުޙައްމަދު ފަޟީލް ހުށަހެޅުއްވިއެވެ. އަދި މި ހުށަހެޅުއްވުމަށް ކާށިދޫ ދާއިރާގެ މެންބަރު މުންތަޡިމް އިބްރާހީމް ތާއީދުކުރެއްވިއެވެ.  މި ހުށަހެޅުއްވުން ކޮމިޓީއަށް އެވަގުތު ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާގުން ފާސްވިއެވެ.

ދެން މަޝްވަރާކުރެއްވީ ކޮމިޓީއަށް ހުށަހެޅިފައިވާ ދިވެހިންނާ ކައިވެނިކޮށްގެން ރާއްޖޭގައި ދިރިއުޅޭ ބޭރުމީހުންނަށް އާސަންދައިގެ ޚިދުމަތް ނުލިބޭކަން ފާހަގަކޮށް، އެކަމާމެދު ރައްޔިތުންގެ މަޖިލީހުގެ މެންބަރުން ދެކެވަޑައިގަންނަވާ ގޮތެއް ދެނެގަތުމަށް ޓަކައި ހުށަހަޅާ ޤަރާރާ ގުޅޭ ގޮތުންނެވެ. މި ޤަރާރާ ގުޅޭގޮތުން ޢާންމުގެ ޚިޔާލު ހޯދުމަށް 5 ފެބުރުއަރީ 2026 ގެ ނިޔަލަށް ހުޅުވާލުމަށް ދާންދޫ ދާއިރާގެ މެންބަރު މުޙައްމަދު ފަޟީލް ހުށަހަޅުއްވާފައިވެއެވެ. އަދި ކޮމަންޑޫ ދާއިރާގެ މެންބަރު މުޙައްމަދު އިބްރާހީމް މި ހުށަހެޅުއްވުމަށް ތާއީދުކުރައްވާފައިވެއެވެ.  މި ހުށަހެޅުއްވުން ކޮމިޓީއަށް އެވަގުތު ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާގުން ފާސްވިއެވެ.

ޤަރާރުގެ ސުންގަޑިއާ ގުޅޭގޮތުން ކޮމިޓީން މަޝްވަރާކުރެއްވުމަށްފަހު ސުންގަޑީގެ ގޮތުގައި 10 ފެބުރުވަރީ 2026 ކަނޑައެޅުމަށް ދާންދޫ ދާއިރާގެ މެންބަރު މުޙައްމަދު ފަޟީލް ހުށަހެޅުއްވިއެވެ. މި ހުށަހެޅުއްވުމަށް ކާށިދޫ ދާއިރާގެ މެންބަރު މުންތަޡިމް އިބްރާހީމް ތާއީދުކުރެއްވިއެވެ.  މި ހުށަހެޅުއްވުން ކޮމިޓީއަށް އެވަގުތު ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާގުން ފާސްވިއެވެ.

އެންމެ ފަހުކަމަށް ކޮމިޓީން މަޝްވަރާކުރައްވާފައިވަނީ އޭ.ޑީ.އެޗް.ޑީގެ ފަރުވާއަށް މުހިއްމު ބޭހެއް ކަމުގައިވާ މިތައިލްފެނިޑޭޓް ދިވެހިރާއްޖެއިން ލިބެން ނުހުންނާތީ، އެކަމަށް ހައްލެއް ހޯއްދަވައިދެއްވުން އެދި މިނިސްޓްރީ އޮފް ހެލްތްއިން ފޮނުވާފައިވާ ސިޓީއާ ގުޅޭ ގޮތުންނެވެ. މަސްތުވާތަކެއްޗާބެހޭ ޤާނޫނަށް އިޞްލާޙު ގެނައުމުގެ ބިލުގެ މަސައްކަތް ރައްޔިތުންގެ މަޖިލީހުގެ ޖުޑީޝިއަރީ ކޮމިޓީން މިހާރު ކުރައްވަމުން ގެންދަވާކަމަށާއި އެ ބިލުގެ މަސައްކަތުގެ ތެރެއިން މި މައްސަލަށް ވެސް ހައްލެއް ލިބޭނެކަމަށް ފެނިވަޑައިގަންނަވާތީ މި މައްސަލަ ޖުޑީޝިއަރީ ކޮމިޓީއަށް ފޮނުއްވުމަށް ކެންދޫ ދާއިރާގެ މެންބަރު މަޢުރޫފް ޛާކިރު ހުށަހަޅުއްވާފައިވެއެވެ. މި ހުށަހެޅުއްވުމަށް ދާންދޫ ދާއިރާގެ މެންބަރު މުޙައްމަދު ފަޟީލް ތާއީދުކުރައްވާފައިވެއެވެ.  މި ހުށަހެޅުއްވުން ކޮމިޓީއަށް އެވަގުތު ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާގުން ފާސްވިއެވެ.

މި ބައްދަލުވުމުގައި ނެގި ވޯޓުތަކުގެ ތަފުޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.