މި ބައްދަލުވުމުގައި، 2026 ވަނަ އަހަރަށް ލަފާކޮށް ހުށަހަޅުއްވާފައިވާ ބަޖެޓާ ގުޅޭގޮތުން އެންޓި-ކޮރަޕްޝަން ކޮމިޝަނުގެ ބޭފުޅުންނާ ބައްދަލުކުރައްވައި، އެ ކޮމިޝަނުގެ ބަޖެޓާ ގުޅޭގޮތުން މަޢުލޫމާތު ސާފުކުރެއްވިއެވެ. އެގޮތުން، 2026 ވަނަ އަހަރަށް ކަނޑައަޅުއްވާފައިވާ ކޮމިޝަނުގެ ބޭސްލައިން ބަޖެޓުގެ 78.3 ޕަސެންޓަކީ މުވައްޒަފުންގެ މުސާރައާއި ޢިނާޔަތްތަކަށްވާއިރު، އެ ކޮމިޝަނަށް ޤާނޫނުއަސާސީ އަދި ޤާނޫނު ނަންބަރު 13/2008 (އެންޓި-ކޮރަޕްޝަން ކޮމިޝަނުގެ ޤާނޫނު) ގެ 21 ވަނަ މާއްދާއިން މަތިކުރައްވާފައިވާ މަސްއޫލިއްޔަތު އަދާކުރުމަށްޓަކައި ތަޙްޤީޤުތައް ހިންގުމަށް ދިވެހިރާއްޖެ މި އޮތް ގޮތުން ވަރަށް ބޮޑަށް ދަތިތަކެއް ކުރިމަތިވާނެކަމަށާއި، ދިވެހި ފުލުހުންގެ ޚިދުމަތް ފިޔަވައި ދެން ދިވެހިރާއްޖޭގައި ޖިނާއީ ތަޙްޤީޤު ކުރާ މައި އިދާރާއަކީ އެންޓި-ކޮރަޕްޝަން ކޮމިޝަނަށް ވީހިނދު އެ ކޮމިޝަން ހިންގަމުން ގެންދަނީ، ޖާގައިގެ ދަތިކަމާއެކު ޢާންމު ރައްޔިތުން ދިރިއުޅޭ ޢިމާރާތެއްގައިކަމުން ތަޙްޤީޤުތަކަށާއި، މަޢުލޫމާތު ސާފުކުރުމަށް ހާޒިރުކުރާ މީހުންގެ ރައްކާތެރިކަން އެންމެ ފުރިހަމައަށް ކަށަވަރު ކުރުމަށާއި، އަދި ކޮމިޝަންގެ ސެކިއުރިޓީ ވަރުގަދަކުރުމަށް ހުރަސްތަކެއް ކުރިމަތިވާކަން އެ ކޮމިޝަނުން ފާހަގަކުރެއްވިއެވެ. މީގެ އިތުރުން، 2026 ވަނަ އަހަރު ކޮމިޝަނުން ތަޙްޤީޤުކުރާ މައްސަލަތައް އަވަސްކުރުމުގެ ގޮތުން ކޮމިޝަން ހިންގަމުންދާ ގޮތަށް ބަދަލުތަކެއް ގެނެވިފައިވާކަމަށާއި، ކޮމިޝަނުން އެދިވަޑައިގަންނަވާ ބަޖެޓު ލިބިއްޖެކަމަށްވާނަމަ، ރަނގަޅު ނަތީޖާތަކެއް ފެނިގެންދާނެކަމަށާއި، ކޮމިޝަނުގައި ތަޙްޤީޤުތަކަށް ބޭނުންވާ ވަސީލަތްތައް ނެތުމުގެ ސަބަބުން ދިވެހި ފުލުހުންގެ ޚިދުމަތުގެ އެހީތެރިކަމަށް އެދިވަޑައިގަންނަވަން ޖެހިވަޑައިގަންނަވާކަމަށާއި، ފުލުހުންގެ މައްޗަށް ތުހުމަތުކުރެވޭ މައްސަލަތަކުގައި ވެސް އެ ޚިދުމަތުގެ އެހީތެރިކަމަށް އެދެންޖެހުމަކީ ކޮމިޝަނުގެ މަސައްކަތްތަކާމެދު ސުވާލު އުފެދޭނެކަމެއް ކަމަށްވެސް އެ ކޮމިޝަނުން ފާހަގަކުރެއްވިއެވެ.

އެންޓި-ކޮރަޕްޝަން ކޮމިޝަނުގެ ފަރާތުން ބައްދަލުވުމުގައި ބައިވެރިވެވަޑައިގެންނެވި ބޭފުޅުން:

1. އަލްއުސްތާޛް އާދަމް ޝާމިލް، ރައީސް
2. އަލްފާޟިލް ޢަބްދުﷲ ނާޝިދު، ނައިބު ރައީސް
3. އަލްފާޟިލް އަޙުމަދު ނާޝިދު، މެމްބަރު
4. އަލްއުސްތާޛާ ޝިޔާމާ މުޙައްމަދު، މެމްބަރު
5. އަލްފާޟިލާ ޝަޒްނާ ހާޝިމް، މެމްބަރު
6. އަލްފާޟިލާ ފާތިމަތު ނިލްފާ، ސެކްރެޓަރީ ޖެނެރަލް
7. އަލްފާޟިލާ ފާތިމަތު އާޝާން، ޑެޕިއުޓީ ޑިރެކްޓަރ
8. އަލްފާޟިލާ ޔުމްނާ ވަޙީދު، އެސިސްޓެންޓް ޑިރެކްޓަރ