މި ބައްދަލުވުމުގައި، 2026 ވަނަ އަހަރަށް ލަފާކޮށް ހުށަހަޅުއްވާފައިވާ ބަޖެޓާ ގުޅޭގޮތުން މޯލްޑިވްސް ކަސްޓަމްސް ސަރވިސްގެ ބޭފުޅުންނާ ބައްދަލުކުރައްވައި، އެ ސަރވިސްގެ ބަޖެޓާ ގުޅޭގޮތުން މަޢުލޫމާތު ސާފުކުރެއްވިއެވެ. އެގޮތުން ކަސްޓަމްސްއަށް ލިބިފައިވަނީ މިނިސްޓްރީ އޮފް ފިނޭންސް އެންޑް ޕްލޭނިންގއާއެކު އެއްބަސްވެވުނު ބަޖެޓަށްވުރެ 19.3 މިލިއަން ރުފިޔާގެ މަދު ޢަދަދެއްކަމަށާއި، އެ ޢަދަދަކީ ޤާނޫނު ނަންބަރު 8/2011 (ދިވެހިރާއްޖޭގެ ކަސްޓަމްސްގެ ޤާނޫނު) އިން މަތިކޮށްފައިވާ އެންމެހައި މަސްއޫލިއްޔަތުތަކާ ޒިންމާތައް އަދާކުރުމަށާއި، އިދާރީގޮތުން އޮފީސް ހިންގުމަށް އެކަށޭނެ ބަޖެޓެއް ނޫންކަމަށާއި، ކަސްޓަމްސްގެ ޤާނޫނީ ޒިންމާތައް ފުރިހަމައަށް އަދާކުރެއްވުމަށާއި މުވައްޒަފުން ތަމްރީނުކުރެއްވުމަށް މިހާރު ބަޖެޓްކުރެވިފައިވާ ޢަދަދުގެ އިތުރުން ފައިސާ ބޭނުންވާކަމަށް އެ ސަރވިސްއިން ފާހަގަކުރެއްވިއެވެ. މީގެ އިތުރުން، ކަސްޓަމްސް ކޮންޓްރޯލް އޭރިއާތައް ބެލެހެއްޓުމުގެ މަސައްކަތް އިތުރަށް ހަރުދަނާކުރުމުގެ ގޮތުން ބަނދަރުތަކުގެ ސެކިއުރިޓީ ބެލެހެއްޓުން އިތުރުކުރުމާއި، ކަސްޓަމްސްގެ މުދާ ބަލާ ފާސްކުރުމުގެ މަސައްކަތްތައް ހަރުދަނާކުރުމާއި، ޚާއްސަ އޮޕަރޭޝަންތައް ހިންގުން އިތުރުކޮށް އެންފޯސްމަންޓް މަސައްކަތްތައް ފުޅާކުރެއްވުމަށް މުވައްޒަފުން އިތުރުކުރައްވަން ބޭނުންވާކަމަށާއި، ކޮންޓެއިނަރ ސްކޭންކުރެއްވޭނެ އިންތިޒާމްއާއި އެންފޯސްމަންޓް އަދި ސަވައިލަންސް އިކްއިޕްމެންޓް ހޯދުމަށް ބަޖެޓު ބޭނުންވާކަން ވެސް މޯލްޑިވްސް ކަސްޓަމްސް ސަރވިސް އިން ފާހަގަކުރެއްވިއެވެ.

މޯލްޑިވްސް ކަސްޓަމްސް ސަރވިސްގެ ފަރާތުން ބައްދަލުވުމުގައި ބައިވެރިވެވަޑައިގެންނެވި ބޭފުޅުން:

1. އަލްފާޟިލާ ފާޠިމަތު ދިޔާނާ، ކޮމިޝަނަރ ޖެނެރަލް އޮފް ކަސްޓަމްސް
2. އަލްފާޟިލް އިބްރާހީމް މަފާޒް، ޑެޕިއުޓީ ކޮމިޝަނަރ އޮފް ކަސްޓަމްސް
3. އަލްފާޟިލް ޢަބްދުﷲ ޢަލީ، ޗީފް ސްޕްރިންޓެންޑެންޓް
4. އަލްފާޟިލް މުމްތާޒް ޢަބްދުއްރަޝީދު، ސީނިއަރ ސްޕްރިންޓެންޑެންޓް