މި ބައްދަލުވުމުގައި، 2026 ވަނަ އަހަރަށް ލަފާކޮށް ހުށަހަޅުއްވާފައިވާ ބަޖެޓުގައި މިނިވަން މުއައްސަސާތަކަށް ކަނޑައަޅުއްވާފައިވާ ބަޖެޓާ ގުޅޭގޮތުން، އެ މުއައްސަސާތަކުން ހިއްސާކޮށްފައިވާ މަޢުލޫމާތުތައް ދިރާސާކުރެއްވިއެވެ. އެގޮތުން، އޮފީސްތަކުގެ ޑޮމެސްޓިކް ބަޖެޓަށް ކޮންމެހެން ގެންނަންޖެހޭ ބަދަލުތަކުގެ ގޮތުގައި އަންނަނިވި ކަންކަން ފާހަގަކޮށް މިނިސްޓްރީ އޮފް ފިނޭންސް އެންޑް ޕްލޭނިންގއަށް ސިޓީ ފޮނުވުމަށް ނިންމެވިއެވެ.

1. ރައްޔިތުންގެ މަޖިލީހުގެ އިދާރާއިން 2026 ވަނަ އަހަރަށް ލަފާކުރާ ބަޖެޓަށް އިތުރުކުރުމަށް އެދިފައިވާ ޢަދަދު؛
2. ދައުލަތުގެ މާލިއްޔަތާ ގުޅުންހުރި ކޮރަޕްޝަންގެ ބޮޑެތި އަދި ސީރިއަލް ކޮމްޕްލެކްސް މައްސަލަތަކުގެ ތަޙުޤީޤުގެ ފެންވަރު މަތިކޮށް އަވަސްކުރުމަށާއި، ފޮރެންސިކް ވަސީލަތްތައް ޤާއިމުކުރުމަށް އެންޓި-ކޮރަޕްޝަން ކޮމިޝަނުގެ 2026 ވަނަ އަހަރަށް ލަފާކުރާ ބަޖެޓަށް އިތުރުކުރުމަށް އެދިފައިވާ ޢަދަދު؛
3. ކަސްޓަމްސް ކޮންޓްރޯލްޑް އޭރިޔާގައި ހިންގާ ޤާނޫނާ ޚިލާފު ކަންކަމާއި ސްމަގްލިންގގެ ކަންކަން އިތުރުވަމުންދާތީ، އެ ކަންކަން ހަރުދަނާކުރުމުގެގޮތުން ބަނދަރުތަކުގައި ކޮންޓެއިނަރ ސްކޭން ކުރެވޭނެ އިންތިޒާމުތައް ހަމަޖެއްސުމަށް މޯލްޑިވްސް ކަސްޓަމްސް ސަރވިސްގެ ބަޖެޓަށް އިތުރުކުރުމަށް އެދިފައިވާ ޢަދަދު؛ އަދި
4. ކޮންސަލްޓެންސީއަށާއި ދަތުރުފަތުރުގެ ޚަރަދަށް ފެމިލީ ޕްރޮޓެކްޝަން އޮތޯރިޓީގެ ބަޖެޓަށް އިތުރުކުރުމަށް އެ އޮތޯރިޓީން އެދިފައިވާ ޢަދަދު.
5. މީގެ އިތުރުން، ސިވިލް ސަރވިސް ކޮމިޝަނާއި، މޯލްޑިވްސް އިންލަންޑް ރެވެނިއު އޮތޯރިޓީއާއި، ވަޒީފާއާބެހޭ ޓްރައިބިއުނަލް އަދި މޯލްޑިވްސް ކަސްޓަމްސް ސަރވިސްއިން ބަޖެޓަށް އިތުރުކޮށްދިނުމަށް އެދިފައިވާ ޕްރޮގްރާމްތަކަށް އިތުރުކުރެވެން އޮތް މިންވަރަށް އިތުރުކޮށްދެއްވުމަށް އެ މިނިސްޓްރީގައި ދެންނެވުމަށްވެސް ކޮމިޓީން ނިންމެވިއެވެ.

ނޯޓް: މި ބައްދަލުވުމުގައި މިނިސްޓްރީ އޮފް ފިނޭންސް އެންޑް ޕްލޭނިންގގެ ބަޖެޓު ޓީމްގެ ބޭފުޅުން ބައިވެރިވެވަޑައިގެންނެވިއެވެ. 

މިނިސްޓްރީ އޮފް ފިނޭންސް އެންޑް ޕްލޭނިންގގެ ފަރާތުން ބައްދަލުވުމުގައި ބައިވެރިވެވަޑައިގެންނެވި ބޭފުޅުން:

1. އަލްފާޟިލް އަޙްމަދު ސާއިދު މުސްޠަފާ، ޑެޕިއުޓީ މިނިސްޓަރ އޮފް ފިނޭންސް އެންޑް ޕްލޭނިންގ
2. އަލްފާޟިލް އާދަމް ބަދުރުﷲ، ބަޖެޓް އެގްޒެކެޓިވް
3. އަލްފާޟިލް އަޙްމަދު އަޒްޔަން ޙަމީދު، ފިސްކަލް އެނަލިސްޓް
4. އަލްފާޟިލް ޒުނައިން ޝަރީފް ، ބިޒްނަސް ޕްލޭނިންގ އެންޑް ކޮންސޮލިޑޭޝަން ކޮންސަލްޓަންޓް