މި ބައްދަލުވުމުގައި، 2026 ވަނަ އަހަރަށް ލަފާކޮށް ހުށަހަޅުއްވާފައިވާ ބަޖެޓާ ގުޅޭގޮތުން މޯލްޑިވްސް އިންލަންޑް ރެވެނިއު އޮތޯރިޓީގެ ބޭފުޅުންނާ ބައްދަލުކުރެއްވިއެވެ. އެގޮތުން، އެ އޮތޯރިޓީން ކުރިއަށް އޮތް އަހަރުތަކުގައި ހާސިލުކުރުމަށް ކަނޑައަޅާފައިވާ ލަނޑުދަނޑިތައް ހާސިލުކުރުމަށް ދިމާވެފައިވާ އެންމެ ބޮޑު މައްސަލައެއްގެ ގޮތުގައި ފާހަގަކޮށްލެވެނީ ފަންނީ ގާބިލު މުވައްޒަފުން ރީޓެއިން ކުރުމުގެ މައްސަލަކަމަށާއި، ޕްރައިވެޓް ސެކްޓަރގެ މުސާރަތަކުގެ އިތުރުން ފާއިތުވި މުއްދަތުގައި ދައުލަތުގެ އެހެން މުއައްސަސާތަކުގެ މުސާރަ އިތުރުވެގެން ދިއުމުގެ ސަބަބުން މިއަދު މީރާއަކީ ދައުލަތުގެ އެހެން މިނިވަން މުއައްސަސާތަކާ އަޅާކިޔައި ދެވޭ މުސާރައާއި މަސައްކަތުގެ ގަޑި އަދި ރެސްޓްރިކްޝަންތަކާއި އެކު އެހާ ކޮމްޕެޓިޓިވް ތަނެއް ނޫންކަމަށާއި، މުވައްޒަފުންގެ މުސާރަ ބޮޑުކޮށް، މަސައްކަތުގެ މާހައުލު މިހާރަށް ވުރެ ރަނގަޅު ކޮށްގެން ނޫނީ އެ އޮތޯރިޓީގެ ޕާފޯމަންސް އެންމެ ރަނގަޅަށް ކުރިއަށް ގެންދަން ދަތިވާނެ ކަމަށް އެ އޮތޯރިޓީން ފާހަގަކުރެއްވިއެވެ.

މީގެ އިތުރުން، 2026 ވަނަ އަހަރަށް ދައުލަތުގެ އާމްދަނީ އިތުރުކުރުމަށް ހުރިކަންތަކުގެ ތެރޭގައި، ޓީޖީއެސްޓީއަށް ގެނެވިފައިވާ ބަދަލު އަދި ޤާނޫނު ނަންބަރު 3/2010 (ޓެކްސް ނެގުމާބެހޭ އިދާރީ ޤާނޫނު) އަށް ގެނައި ބަދަލުތަކާއި، ޑިޕަރޗަރ ޓެކްސް އަދި އެއަރޕޯޓް ޑިވެލޮޕްމަންޓް ފީއަށް 2024 ވަނަ އަހަރު ގެނެވުނު ބަދަލުތަކުގެ ފުރިހަމަ ނަތީޖާ އަންނަ އަހަރު ފެނިގެންދާނެ ކަމަށް ވެސް އެ އޮތޯރިޓީން ފާހަގަކުރެއްވިއެވެ.

2026 ވަނަ އަހަރަށް ލަފާކޮށް ހުށަހަޅާފައިވާ ބަޖެޓުގައި މޯލްޑިވްސް އިންލަންޑް ރެވެނިއު އޮތޯރިޓީއަށް ކަނޑައަޅުއްވާފައިވާ ބަޖެޓުގެ އިތުރުން، އެ އޮތޯރިޓީން މުވައްޒަފުންގެ މުސާރައާއި ޓްރެއިނިންގ އަދި ޕްރޮގްރާމްތަކަށް އިތުރަށް ބޭނުންވާ 4.1 މިލިއަން ރުފިޔާ ބަޖެޓުގެ ޖުމްލަ ޢަދަދަށް ބަދަލު ނާންނާނެގޮތަށް ހަމަޖައްސަވައިދެއްވުމަށް މިނިސްޓްރީ އޮފް ފިނޭންސް އެންޑް ޕްލޭނިންގގައި ދެންނެވުމަށް ކޮމިޓީން ނިންމެވިއެވެ.

މޯލްޑިވްސް އިންލަންޑް ރެވެނިއު އޮތޯރިޓީގެ ފަރާތުން ބައްދަލުވުމުގައި ބައިވެރިވެވަޑައިގެންނެވި ބޭފުޅުން:

1. އަލްފާޟިލް ޙަސަން ޒަރީރު، ކޮމިޝަނަރ ޖެނެރަލް އޮފް ޓެކްސޭޝަން
2. އަލްފާޟިލާ ފާތިމަތު އަމީޒާ، ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން
3. އަލްފާޟިލް އަޙްމަދު ޝަފްނީޒް، ޑިރެކްޓަރ ޖެނަރަލް - އެޑްމިނިސްޓްރޭޝަން އެންޑް ފައިނޭންސް