މިބައްދަލުވުމުގައި، ކަސްޓަމްސް ކޮންޓްރޯލްޑް އޭރިޔާގައި ހިންގާ ޤާނޫނާ ޚިލާފު ކަންކަމާއި ސްމަގްލިންގގެ ކަންކަން އިތުރުވަމުންދާތީ، އެ ކަންކަން ހަރުދަނާކުރުމުގެގޮތުން ބަނދަރުތަކުގައި ކޮންޓެއިނަރ ސްކޭން ކުރެވޭނެ އިންތިޒާމުތައް ހަމަޖެއްސުމަށް މޯލްޑިވްސް ކަސްޓަމްސް ސަރވިސްއަށް ބޭނުންވާ ކޮންޓެއިނަރ ސްކޭނިންގ ސިސްޓަމްސްއާ ގުޅޭގޮތުން މަޝްވަރާކުރުމަށް މޯލްޑިވްސް ކަސްޓަމްސް ސަރވިސް އަދި މޯލްޑިވްސް ޕޯޓްސް ލިމިޓެޑްގެ ބޭފުޅުންނާ ބައްދަލުކުރައްވައި މަޢުލޫމާތު ސާފުކުރެއްވިއެވެ. އެގޮތުން، ކޮންޓެއިނަރ ސްކޭނަރ ގަތުމަށް ބޭނުންވާ ޖުމްލަ ޢަދަދަށް ބަޖެޓާއި، އެ ސްކޭނަރ ޕޯޓުގައި ބެހެއްޓުމަށް ބޭނުންވާ ޖާގަ އެމް.ޕީ.އެލް އިން ހަމަޖައްސައިދެއްވުމުން ސްކޭނަރ ބެހެއްޓުމުގެ މަސައްކަތް ފެށިގެންދާނެކަމަށާއި، ކަސްޓަމްސްގެ ބަޖެޓުން މި ސްކޭނަރ ގަތުމަށް ޚަރަދުކުރިކަމުގައި ވީނަމަވެސް، މީގެ އޯނަރޝިޕް ލިބިގެންދާނީ އެމް.ޕީ.އެލް އަށް މޯލްޑިވްސް ކަސްޓަމްސް ސަރވިސްއިން މަޢުލޫމާތު ދެއްވިއެވެ.

ކޮންޓެއިނަރ ސްކޭނަރ ބެހެއްޓުމަށްޓަކައި ސްކޭނަރ ބޭނުންތަނަކަށް ރީލޮކޭޓް ކުރެވޭ ކަހަލަ ގޮތަކަށް މޮބައިލް ސޮލިއުޝަން އަކަށް ބަލަމުންދާކަމަށާއި، ތިލަފުއްޓަށް ޕޯޓްސް ބަދަލުވުމުން އެތަނުގައި އެންމެ މޮޑަން ފީޗަރސްތަކާއެކު ހުންނަ ރަނގަޅު ސިސްޓަމް އެއް ޤާއިމުކުރެވިގެންދާނެކަމަށާއި، އެމް.ޕީ.އެލްގެ ބަޖެޓުގައި ހުރިދަތިތަކުގެ ސަބަބުން މިކަމަށް މިވަގުތު ބޮޑު ޚަރަދެއް ކުރެވެން ނެތްކަމަށް އެމް.ޕީ.އެލް އިން މަޢުލޫމާތު ދެއްވިއެވެ. 

މޯލްޑިވްސް ކަސްޓަމްސް ސަރވިސްގެ ފަރާތުން ބައްދަލުވުމުގައި ބައިވެރިވެވަޑައިގެންނެވި ބޭފުޅުން:

1. އަލްފާޟިލް އިބްރާހީމް މަފާޒް، ޑެޕިއުޓީ ކޮމިޝަނަރ އޮފް ކަސްޓަމްސް
2. އަލްފާޟިލް އިސްމާޢީލް ޙަމްދޫން، އެސިސްޓެންޓް ކޮމިޝަނަރ އޮފް ކަސްޓަމްސް
3. އަލްފާޟިލް ޢަބްދުﷲ ޢަލީ، ޗީފް ސްޕްރިންޓެންޑެންޓް
4. އަލްފާޟިލް މުމްތާޒް ޢަބްދުއްރަޝީދު، ސީނިއަރ ސްޕްރިންޓެންޑެންޓް

މޯލްޑިވްސް ޕޯޓްސް ލިމިޓެޑްގެ ފަރާތުން ބައްދަލުވުމުގައި ބައިވެރިވެވަޑައިގެންނެވި ބޭފުޅުން:

1. އަލްފާޟިލް ޙަސަން މުޒްނީ މުޙައްމަދު، ޗީފް އޮޕްރޭޝަންސް އޮފިސަރ 
2. އަލްފާޟިލް މުޙައްމަދު އަމީޒް، ޗީފް ސްޓްރަޓެޖީ އޮފިސަރ