މިއަދުގެ ބައްދަލުވުމުގައި، ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން ހުށަހަޅުއްވާފައިވާ ފެނަކަ ކޯޕަރޭޝަންގެ ޚާއްޞަ ރިވިއު ރިޕޯޓު- 2022 އަދި އައްޑޫއަށް ދިމާވެފައިވާ ކަރަންޓު މައްސަލައާގުޅޭ މަޢުލޫމާތު ސާފުކުރެއްވުމަށް ފެނަކަ ކޯޕަރޭޝަން ލިމިޓެޑްގެ ބޭފުޅުންނާ ބައްދަލުކުރެއްވިއެވެ. އެގޮތުން ފެނަކަ ކޯޕަރޭޝަންގެ ޚާއްޞަ ރިވިއު ރިޕޯޓު- 2022 ގައި އިޞްލާޙުކުރުމަށް ލަފާދީފައިވާ ކަންތައްތައް ރަނގަޅުކުރުމުގެ މަސައްކަތް ކުންފުނީގެ މެނޭޖްމަންޓުން ކުރަމުންދާކަމަށާއި، ކުންފުނީގެ ހިއުމަން ރިސޯސް ޕޮލިސީއާއި، މުސާރައިގެ އޮނިގަނޑާއި، ޕްރޮކިއުމަންޓް ޕޮލިސީ ރިވިއުކުރުމުގެ މަސައްކަތްކުރިއަށްދާކަމަށާއި، އެ މަސައްކަތް ޖަނަވަރީ 2026 ގެ ނިޔަލަށް ނިންމޭނެކަމަށް އެބޭފުޅުން މަޢުލޫމާތު ދެއްވާފައިވެއެވެ.

މީގެ އިތުރުން އައްޑޫގެ ކަރަންޓު މައްސަލަ ދާއިމީކޮށް ޙައްލުކުރުމަށް ގިނަ މަސައްކަތްތަކެއް ކުރިއަށް ރޭވިފައިވާކަމަށާއި، 13 މެގަވޯޓުގެ ކަރަންޓު އުފެއްދޭނެހެން 6 މެގަވޯޓުގެ 5 ޖެނެރޭޓަރު ބަހައްޓާގޮތަށް ޕްލޭންކުރެވިފައިވާކަމަށާއި، މިކަމާ ގުޅޭ މަޝްވަރާތައް ސަޕްލަޔަރުންނާ ކުރެވެމުންދާކަމަށް ވެސް އެބޭފުޅުން މަޢުލޫމާތުދެއްވިއެވެ. އަދި އައްޑޫއަށް 30 މެގަވޯޓުގެ ކަރަންޓު އުފެއްދޭނެގޮތަށް މަސައްކަތްތައް ކުރިއަށްދާކަމަށާއި މި މަސައްކަތް 1 އަހަރާއި 6 މަސް ދުވަހުން ނިންމޭނެކަމަށް ލަފާކުރައްވާކަމަށް އެބޭފުޅުން މަޢުލޫމާތު ދެއްވިއެވެ. 

ފެނަކަ ކޯޕަރޭޝަން ލިމިޓެޑްގެ ފަރާތުން ބައްދަލުވުމުގައި ބައިވެރިވަޑައިގެންނެވި ބޭފުޅުން:

1. މޭޖަރ (ރިޓަޔަރޑް) މުޙައްމަދު ނަޖާހް، މެނޭޖިންގ ޑިރެކްޓަރ
2. އަލްފާޟިލް މުޙައްމަދު ޢާރިފް، ޑެޕިއުޓީ މެނޭޖިންގ ޑިރެކްޓަރ
3. އަލްފާޟިލާ ކުލްޝޫމް ޢަލީ، ޗީފް ކޯޕަރޭޓް އޮފިސަރ
4. އަލްފާޟިލް ފަހުދު މުޙައްމަދު، ރިސްކް އެންޑް ކޮމްޕްލަޔަންސް އޮފިސަރ