މިއަދުގެ ބައްދަލުވުމުގައި، ފުލުހުންގެ ހައުސިންގ ޕްރޮޖެކްޓް (ބްލޫސް ހައުސިންގ ޕްރޮޖެކްޓް) ގެ ޚާއްޞަ އޮޑިޓް ރިޕޯޓު މާލިއްޔަތު ކޮމިޓީގެ ސަބް-ކޮމިޓީން ދިރާސާކުރަމުން ގެންދިޔައިރު، އެ މައްސަލައާ ގުޅިގެން އެ ކޮމިޓީން ހޯދި ލިޔުންތަކާއި، އެ ކޮމިޓީއަށް ލިބުނު ލިޔުންތަކުން ދިވެހި ފުލުހުންގެ ޚިދުމަތުގެ ތެރޭގައި ހިންގާފައިވާކަމަށް ފާހަގަކުރެވުނު ޚިޔާނާތާއި ކޮރަޕްޝަންގެ މައްސަލަތައް ސަބް-ކޮމިޓީން ދިރާސާކޮށް ނިންމިގޮތުގެ ރިޕޯޓާމެދު މަޝްވަރާކުރެއްވިއެވެ. އެގޮތުން، މި މައްސަލައާމެދު މަޝްވަރާކުރެވޭއިރު ބައްދަލުވުން ސިއްރުކުރަން ފެންނަކަމަށް ފުނަދޫ ދާއިރާގެ މެންބަރު މުޙައްމަދު މަމްދޫޙް ހުށަހަޅުއްވައި، ކެލާ ދާއިރާގެ މެންބަރު ޢަބްދުﷲ ޝަރީފް ތާއީދުކުރެއްވި ހުށަހެޅުން ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން ފާސްވިއެވެ. މި ހުށަހެޅުމަށް މެންބަރުން ވޯޓު ދެއްވިގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.

އެހެންކަމުން، ފުލުހުންގެ ޚިދުމަތުގެ ތެރޭގައި ހިންގާފައިވާކަމަށް ފާހަގަކުރެވުނު ޚިޔާނާތާއި ކޮރަޕްޝަންގެ މައްސަލަތައް ސަބް-ކޮމިޓީން ދިރާސާކޮށް ނިންމިގޮތުގެ ރިޕޯޓާމެދު މަޝްވަރާކުރެއްވި ވަގުތުގައި ކޮމިޓިީގެ ބައްދަލުވުން ސިއްރުކުރެއްވިއެވެ.

އެއަށްފަހު، ނޭޝަނަލް އިންޓެގްރިޓީ ކޮމިޝަނުގެ މެންބަރުންގެ ހާޒިރީ އަދި ޗުއްޓީ ދިނުމުގައި ޢަމަލުކުރަމުން ގެންދަނީ އެ ކޮމިޝަނުގެ ގަވާއިދު ނަންބަރު 2025/R-60 (ނޭޝަނަލް އިންޓެގްރިޓީ ކޮމިޝަނުގެ ހިންގާ ގަވާއިދު) ގައި ބަޔާންކޮށްފައިވާ ގޮތުގެ މަތިން ކަމަށާއި، މެންބަރުކަމުގެ މުޅި ދައުރުގައި އަހަރީ ޗުއްޓީ އެއް ބޭނުން ނުކޮށް އޮންނަ ޙާލަތްތަކުގައި އެ ޗުއްޓީ ކެންސަލްވަމުންދާކަމަށާއި، އެ ދުވަސްތަކަށް ފައިސާދެމުން ގެންގޮސްފައިނުވާކަމަށާއި، ނަމަވެސް މެންބަރަކު ވަކިވެގެންދާއިރު އެ މެންބަރަކަށް ޙައްޤުވާ އެ އަހަރުގެ އަހަރީ ޗުއްޓީގެ ތެރެއިން ބޭނުންނުކުރެވި އޮންނަ ދުވަސްތަކަށް ފައިސާ ދެމުންގެންދާކަމަށާއި، މިއީ ވަޒީފާއާބެހޭ ޤާނޫނު ހިނގާ ފަރާތްތަކަށްވެސް އެ ފަރާތްތައް ވަޒީފާއިން ވަކިކުރާއިރު ޙައްޤުވާ އަހަރީ ޗުއްޓީއެއްގެ ބޭނުންނުކޮށް އޮންނަ ޙާލަތްތަކުގައި ޢަމަލުކުރުމަށް އެ ޤާނޫނުގައި ކަނޑައަޅާފައިވާ އުސޫލުކަމަށާއި، މިކަމުގައި ޢަމަލުކުރަންވީ ގޮތުގެ ލަފަޔަކަށް އެދި އެ ކޮމިޝަނުން ފޮނުއްވާފައިވާ ސިޓީއާމެދު މަޝްވަރާކުރެއްވިއެވެ. އެގޮތުން، ރައްޔިތުންގެ މަޖިލީހުން މުސްތަޤިއްލު ކޮމިޝަންތަކުގެ މެންބަރުންނަށް ކަނޑައަޅާފައިވާ މުސާރައާއި ޢިނާޔަތްތަކުގެ ތެރޭގައި އަހަރީ ޗުއްޓީގެ ތެރެއިން ބޭނުންނުކުރެވި ބާކީހުންނަ ދުވަސްތަކަށް ފައިސާދިނުން ހިމަނާފައިނުވާކަމާއި، އެހެންކަމުން ކުރިއަށް އޮތްތަނުގައި ރައްޔިތުންގެ މަޖިލީހުން މުސްތަޤިއްލު ކޮމިޝަންތަކާއި މުސްތަޤިއްލު މަޤާމުތަކަށް ކަނޑައަޅާފައިވާ މުސާރައާއި ޢިނާޔަތްތަކުގެ އިތުރުން ކޮމިޝަންގެ މެންބަރުންނަށް އެއްވެސް ޢިނާޔަތެއް ނުދިނުމަށާއި، ކުރިއަށް އޮތްތަނުގައި ރައްޔިތުންގެ މަޖިލީހުން ކަނޑައަޅާ މުސާރައާއި ޢިނާޔަތްތައް މުރާޖަޢާކުރާނަމަ އިސްވެދެންނެވި މައްސަލައަށް ކޮމިޓީން ރިޢާޔަތްކުރާނެކަން އެ ކޮމިޝަނަށް ދެންނެވުމަށް ދިއްގަރު ދާއިރާގެ މެންބަރު އަޙްމަދު ނާޡިމް ހުށަހަޅުއްވައި، ފުނަދޫ ދާއިރާގެ މެންބަރު މުޙައްމަދު މަމްދޫޙް ތާއީދުކުރެއްވިއެވެ. މި ހުށަހެޅުން ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން ފާސްވިއެވެ. މި ހުށަހެޅުމަށް މެންބަރުން ވޯޓު ދެއްވިގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.

ދެން، 2025 ވަނަ އަހަރުގެ އޮޑިޓަރ ޖެނެރަލްގެ އޮފީސް އޮޑިޓްކުރާނެ ފަރާތެއް ކަނޑައެޅުމާ ގުޅޭގޮތުން މަޝްވަރާކުރެއްވުމަށްފަހު، އެ އޮފީހުގެ އޮޑިޓްކުރާނެ ފަރާތެއް ހޯދުމަށް އިޢުލާންކުރުމުގެ މަސައްކަތް ކޮމިޓީގެ ސެކްރެޓޭރިއަޓާ ޙަވާލުކުރުމަށް ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހަޅުއްވައި، ކެލާ ދާއިރާގެ މެންބަރު ޢަބްދުﷲ ޝަރީފް ތާއީދުކުރެއްވި ހުށަހެޅުން ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން ފާސްވިއެވެ. މި ހުށަހެޅުމަށް މެންބަރުން ވޯޓު ދެއްވިގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.

އޭގެ އިތުރުން، މިނިސްޓްރީ އޮފް ފިނޭންސް އެންޑް ޕްލޭނިންގއިން ފޮނުއްވާފައިވާ ޤާނޫނު ނަންބަރު 29/2024 (ދައުލަތުގެ ދަރަންޏާބެހޭ ޤާނޫނު) ގެ 32 ވަނަ މާއްދާގައި ބަޔާންކޮށްފައިވާ ފަދައިން، 2025 އަހަރުގެ ތިންވަނަ ކުއަރޓަރ ނިމުނުއިރު ދައުލަތުން ނަގާފައިވާ ލޯނާއި، ދައުލަތުން ސޮވްރިންގ ގެރެންޓީ ދޫކޮށްފައިވާ ލޯނު އަދި ދައުލަތުން ދޫކޮށްފައިވާ ލޯނުގެ ތަފްޞީލާއި ސްޓޭޓް ޓްރޭޑިންގ އޯގަނައިޒޭޝަން (އެސް.ޓީ.އޯ) އިން ސްޓޭޓް ބޭންކް އޮފް އިންޑިއާ (އެސް.ބީ.އައި) މެދުވެރިކޮށް ނަގާފައިވާ 18 މިލިއަން އެމެރިކާ ޑޮލަރުގެ 'އޯވަރޑްރާފްޓް ފައިނޭންސިންގ' ފެސިލިޓީއަށް ސަރުކާރުން ދޫކޮށްފައިވާ ސޮވްރިންގ ގެރެންޓީއާ ގުޅޭ މަޢުލޫމާތު ކޮމިޓީގެ މެންބަރުންނާ ހިއްސާކުރެއްވިއެވެ.