މިއަދުގެ ބައްދަލުވުމުގައި، ކޮމިޓީއަށް ބޭނުންވާ ކަންކަން ދެނެގަތުމަށާއި، ކޮމިޓީއާއި އޮޑިޓަރ ޖެނެރަލްގެ އޮފީހުގެ ކޮލަބޮރޭޝަން އިތުރަށް ހަރުދަނާކުރުމާ ގުޅޭގޮތުން މަޝްވަރާކުރުމަށް އެ އޮފީހާއި، ކެނޭޑިއަން އޮޑިޓް އެންޑް އެކައުންޓަބިލިޓީ ފައުންޑޭޝަންގެ ބޭފުޅުންނާ ބައްދަލުކުރުއްވިއެވެ. އެގޮތުން، އޮޑިޓަރ ޖެނެރަލްގެ އޮފީހުން ނެރުއްވާ ހުރިހާ އޮޑިޓް ރިޕޯޓެއް ވަކިވަކިން ދިރާސާކުރުމަކީ އުނދަގޫ ކަމެއްކަމަށާއި، އޭގެ ބަދަލުގައި އޮޑިޓަރ ޖެނެރަލްގެ އޮފީހުގެ ބޭފުޅުންނާ މަޝްވަރާކޮށް، ޚާއްޞަ ސަމާލުކަން ދޭންޖެހޭ އޮޑިޓް ރިޕޯޓުތައް ދެނެގަނެ، އެ އޮޑިޓް ރިޕޯޓުތަކުގެ މަސައްކަތް ކުރިއަށްގެންދިއުމަށް ކެނޭޑިއަން އޮޑިޓް އެންޑް އެކައުންޓަބިލިޓީ ފައުންޑޭޝަންގެ ފަރާތުން ކޮމިޓީއަށް ލަފާދެއްވިއެވެ. އަދި، އޮޑިޓަރ ޖެނެރަލްގެ އޮފީހުގެ ބޭފުޅުންނާ މަޝްވަރާކޮށްގެން އޮޑިޓް ރިޕޯޓުގައި މައިގަނޑުގޮތެއްގައި ފާހަގަވާ މައްސަލަތައް ދެނެގަނެ އެ މައްސަލަތައް ހައްލުކުރުމަށް އިދާރާތަކަށް ލަފާދިނުމަކީ އޮޑިޓް ރިޕޯޓުތައް ދިރާސާކުރުން ހަރުދަނާކުރެވޭނެ ގޮތެއްކަން އެ ފައުންޑޭޝަނުން ފާހަގަކުރެއްވިއެވެ. އޭގެ އިތުރުން، އޮޑިޓްތައް ހަރުދަނާ ގޮތެއްގައި ދިރާސާކުރުމާއި، ސަރުކާރުގެ އިދާރާތަކާ ސުވާލުކުރުމާއި، ކޮމިޓީން ރިކޮމެންޑޭޝަން ދިނުމުގައި ބަލާނެ ކަންކަމާގުޅޭ ތަމްރީނުތައް އެ ފައުންޑޭޝަންގެ ފަރާތުން ދެއްވާކަންވެސް ފާހަގަކުރެއްވިއެވެ.

އޮޑިޓަރ ޖެނެރަލްގެ އޮފީހުގެ ފަރާތުން ބައްދަލުވުމުގައި ބައިވެރިވި ފަރާތްތައް:

1. އިބްރާހީމް އައިމަން، އެސިސްޓަންޓް އޮޑިޓަރ ޖެނެރަލް
2. ޝިރުމީނާ ޙުސައިން، އެސިސްޓަންޓް އޮޑިޓަރ ޖެނެރަލް

ކެނޭޑިއަން އޮޑިޓް އެންޑް އެކައުންޓަބިލިޓީ ފައުންޑޭޝަންގެ ފަރާތުން ބައްދަލުވުމުގައި ބައިވެރިވި ފަރާތްތައް:

1. ލެސްލީ ބާރންސް، ވައިސް ޕްރެޒިޑެންޓް
2. ޖެފްރީ ޑުބްރޯވް، އެސޯސިއޭޓް