މިއަދުގެ ބައްދަލުވުމުގައި ކުރިއަށްގެންދެވީ ކޮމިޓީއަށް ހުށަހެޅިފައިވާ މައްސަލަތައް ދިރާސާކުރުމެވެ. އެގޮތުން، އެންމެ ފުރަތަމަ ދިރާސާކުރެއްވީ، ޕާލިމަންޓަރީ ސަރވިސް މުވައްޒަފުންގެ ގަވާއިދުގެ 9 ވަނަ ބާބުގެ 37 ވަނަ ނަންބަރުގެ ފަހަތަށް 37-1 (ޢުމްރާ ޗުއްޓީ) އިތުރުކުރުމަށާއި، 10 ވަނަ ބާބުގެ 1 ވަނަ ނަންބަރާއި 5 ވަނަ ނަންބަރު އިޞްލާޙުކުރުމަށްއެދި ފޮނުއްވާފައިވާ މައްސަލައެވެ. މި މައްސަލައާމެދު ކޮމިޓީގައި މަޝްވަރާކުރެއްވުމަށްފަހު، އިދާރާއިން ހުށަހަޅުއްވާފައިވާ ގޮތަށް ޕާލިމަންޓަރީ ސަރވިސް މުވައްޒަފުންގެ ގަވާއިދުގެ 9 ވަނަ ބާބުގެ 37 ވަނަ ނަންބަރުގެ ފަހަތަށް 37-1 (ޢުމްރާ ޗުއްޓީ) އިތުރުކުރުމަށާއި، 10 ވަނަ ބާބުގެ 1 ވަނަ ނަންބަރާއި 5 ވަނަ ނަންބަރު އިޞްލާޙުކުރުމަށް ފެންނަކަމަށް ފޭދޫ ދެކުނު ދާއިރާގެ މެންބަރު އިބްރާހީމްދީދީ ހުށަހެޅުއްވިއެވެ. މި ހުށަހެޅުމަށް ހޮޅުދޫ ދާއިރާގެ މެންބަރު ޢަބްދުއްސައްތާރު މުޙައްމަދު ތާޢީދުކުރެއްވިއެވެ. އަދި ވޯޓަށް އެއްސެވުމުން ކޮމިޓީގެ ބައްދަލުވުމަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން މި ހުށަހެޅުން ފާސްވެގެން ދިޔައެވެ.

އެއަށްފަހު ކުރިއަށްގެންދެވީ، މެއިންޓަނަންސް އެންޑް ސަޕޯޓް ސަރވިސް ސެކްޝަނަށް ބޭނުންވާ މަޤާމްތައް އުފެއްދުމަށް ފޮނުއްވާފައިވާ މައްސަލައާ ގުޅޭގޮތުން މަޝްވަރާކުރުމެވެ. މި މައްސަލައާމެދު ކޮމިޓީގައި މަޝްވަރާކުރެއްވުމަށްފަހު، އިދާރާއިން ހުށަހަޅުއްވާފައިވާ ގޮތަށް ފާސްކުރުމަށް ފެންނަކަމަށް ފޭދޫ ދެކުނު ދާއިރާގެ މެންބަރު އިބްރާހީމްދީދީ ހުށަހެޅުއްވިއެވެ. މި ހުށަހެޅުމަށް އަލިފުށި ދާއިރާގެ މެންބަރު ޢަބްދުއްލަޠީފް ޢަބްދުއްރަޙްމާނު ތާޢީދުކުރެއްވިއެވެ. އަދި ވޯޓަށް އެއްސެވުމުން ކޮމިޓީގެ ބައްދަލުވުމަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން މި ހުށަހެޅުން ފާސްވެގެން ދިޔައެވެ.