މިއަދުގެ ބައްދަލުވުމުގައި، ދިވެހިރާއްޖެއިން ނުލިބޭ ބޭސް ދިވެހިރާއްޖެއިން ބޭރުން ގެނައުމުގައި، ޢާންމު ރައްޔިތުންނާއި ސްޓޭޓް ޓްރޭޑިންގ އޯގަނައިޒޭޝަން ޕަބްލިކް ލިމިޓެޑް (އެސް.ޓީ.އޯ) އާ މުޢާމަލާތްކުރުމުގައި އަރަމުންދާ އޮޅުންތައް ސާފުކޮށްދިނުމަށް އެދި ހުށަހަޅުއްވާފައިވާ މައްސަލައާ ގުޅޭގޮތުން އިތުރަށް މަޢުލޫމާތު ހޯއްދެވުމަށް ސްޓޭޓް ޓްރޭޑިންގ އޯގަނައިޒޭޝަން ޕަބްލިކް ލިމިޓެޑާއި، ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑާއި، ނޭޝަނަލް ސޯޝަލް ޕްރޮޓެކްޝަން އެޖެންސީ އަދި އާސަންދަ ކޮމްޕެނީ ލިމިޓެޑުގެ ބޭފުޅުންނާ ބައްދަލުކުރެއްވިއެވެ. ބައްދަލުވުމުގައި، އިދާރާތަކުން ފާހަގަކުރެއްވި މުހިންމު ނުކުތާތައް ތިރީގައި އެވަނީއެވެ.

ސްޓޭޓް ޓްރޭޑިންގ އޯގަނައިޒޭޝަން ޕަބްލިކް ލިމިޓެޑް

• އެ ކުންފުނީގެ ބެލުމުގެ ދަށުގައިވާ ފާމަސީތަކުގެ ބޭހުގެ ސްޓޮކް ލައިވްކޮށް، އެ ކުންފުންޏަށް ބެލޭނެ އިންތިޒާމް ހަމަޖެހިފައިވީ ނަމަވެސް ބޭހުގެ ސްޓޮކް ލައިވްކޮށް ހޮސްޕިޓަލްތަކަށާއި ޑޮކްޓަރުންނަށް ބެލޭނެ އިންތިޒާމްތައް މިހާތަނަށް ޤާއިމްކުރެވިފައިނުވާކަމަށް.
• ފުޑް އެންޑް ޑްރަގް އޮތޯރިޓީގެ އެޕްރޫވްޑް ލިސްޓްގައިވާ ހުރިހާ ބޭހެއް ހަމަކުރެވިފައިނުވާކަމަށާއި، އަދި ބޭސް ގެނައުމުގައި އެ ކުންފުންޏަށް ބޮޑެތި ގޮންޖެހުންތައް ދިމާވާކަމަށް.
• ބަލްކް ޕްރޮކިއުމަންޓްގެ ދަށުން 54 ބޭހެއް ގެންނަން ފެށިފައިވާކަމަށާއި، އިތުރު ބޭސްތައް ގެނައުމުގެ މަސައްކަތް ކުރިއަށް އޮތްތަނުގައި ސްޓޭޓް ފާމާއިން ކުރިއަށް ގެންދާނެކަމަށް.

ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑް

• 01 އެޕްރީލް 2026 އިން ފެށިގެން، 24 ގަޑިއިރު ގަޑިއިރު ޚިދުމަތް ފޯރުކޮށްދޭ ކޯލް ސެންޓަރެއް ޤާއިމްކުރެވި، ބޭސް ހޯދުމަށް އެދި ހުށަހެޅޭނެ ވެބް އެޕްލިކޭޝަން (ޕޯރޓަލް) އެއް ތަޢާރަފް ކުރެވިފައިވާކަމަށް.
• އެ ކުންފުނީގެ އަމާޒަކީ ބޭހަށް އެދި ހުށަހަޅާތާ 14 (ސާދަ) ދުވަސްތެރޭގައި ބޭސް ރައްޔިތުމީހާއަށް ފޯރުކޮށްދިނުންކަމަށް.
• 01 ޖުލައި 2026 އިން ފެށިގެން، ބޭހާއި މެޑިކަލް ކޮންސިއުމަބަލްސްތައް ގެނައުމުގެ މަސައްކަތްތައް އެ ކުންފުނީގެ ދަށަށް ބަދަލުކުރެވިގެންދާނެކަމަށް.
• ސްޓޭޓް ޓްރޭޑިންގ އޯގަނައިޒޭޝަން ޕަބްލިކް ލިމިޓެޑުގެ ފާމަސީތައް ސްޓޭޓް ފާމާގެ ދަށަށް ބަދަލުކުރުމާއި، ބޭނުންވާ ބޭސްތައް ދުރާލާ އޯޑަރުކުރުމާއި، މިކަމަށް ބޭނުންވާ މުޅި ނިޒާމު ޤާއިމްކުރުމަށް، މަސައްކަތާ ޙަވާލުވާ ތާރީޚުން ފެށިގެން 6 (ހައެއް) މަސް ނަގާނެކަމަށާއި، އެ ކުންފުނިން މި މަސައްކަތާ ޙަވާލުވާ ހިސާބުން ފެށިގެން ބޭހުގެ ސްޓޮކް ލައިވްކޮށް އެނގޭނެ ނިޒާމެއް ގެންނާނެކަމަށް.

އާސަންދަ ކޮމްޕެނީ ލިމިޓެޑް

• އެސެންޝަލް މެޑިސިން ލިސްޓްގައިވާ ބޭސްތައް ހަމަވެގެން ނޫނީ ފާމަސީތަކުން އެމްޕަނަލް (އާސަންދައިގެ ރަޖިސްޓްރީ) ނުކުރެވޭނެކަމަށް.
• އެ ފާމަސީއަކުން ލިބެންހުންނަ ބޭސްތައް އާސަންދަ ސްކީމްގެ ތެރެއިން ފޯރުކޮށްދިނުމަށް، އެ ފާމަސީގެ ބޭހުގެ ރަޖިސްޓްރީ ލިސްޓަށް އިތުރުކުރުން އެއީ އެ ފާމަސީއެއްގެ ޒިންމާއެއްކަމަށް.
• އާސަންދަ ސްކީމުގެ ދަށުން ބޭހުގެ ޚިދުމަތް ފޯރުކޮށްދިނުމަށް ދިމާވާ އެންމެ ބޮޑު މައްސަލައަކީ ބޭސްތައް އެތެރެކުރާ ބްރޭންޑްތައް އަވަސް އަވަހަށް ބަދަލުވުންކަމަށާއި، މި މައްސަލަ ޙައްލުކުރުމަށް ބޭސް ލިޔުމުގައި ބޭހުގެ ޖެނެރިކް ނަން ބޭނުންކުރުމަށް ލަފާދީފައިވާނެކަމަށް.

ނޭޝަނަލް ސޯޝަލް ޕްރޮޓެކްޝަން އެޖެންސީ

•  ބޭސް ހޯދުމުގައި މާލީ އެހީއަށް އެދޭ ފަރާތްތަކަށް، އެހީ ފޯރުކޮށްދެއްވަމުންދާކަމަށް.