މިއަދުގެ ބައްދަލުވުމުގައި ކުރިއަށްގެންދިޔައީ ކޮމިޓީއަށް ހުށަހަޅާފައިވާ މައްސަލަތަކާ ގުޅޭގޮތުން މަޝްވަރާކުރުމެވެ. އެގޮތުން، ފުރަތަމަ ކަމަކަށް މަޝްވަރާކޮށްފައިވަނީ ޗިލްޑްރަންސް އޮމްބަޑްސްޕަރސަންގެ އޮފީހުން ރައްޔިތުންގެ މަޖިލީހަށް ކޮޕީކޮށް ފޮނުވާފައިވާ ބ. އޭދަފުށީގައި ޤާއިމްކޮށްފައިވާ އަމާންވެށީގެ ސްޕޮޓް އޮޑިޓް ރިޕޯޓުގެ އަވަސް ރިޕޯޓާ ގުޅޭގޮތުންނެވެ. އެ ރިޕޯޓަކީ މިނިސްޓްރީއަށް ކޮޕީކޮށް ރައްޔިތުންގެ މަޖިލީހަށް ކޮޕީ ކޮށްފައިވާ އަވަސް ރިޕޯޓެއް ކަމުގައިވާތީއާއި މި ރިޕޯޓުގައި ހިމެނޭ ކަންކަމާ ގުޅޭގޮތުން އެކި މަރުޙަލާތަކުގައި މިނިސްޓްރީއާއި ޗިލްޑްރަންސް އޮމްބަޑްސްޕަރސަންގެ އޮފީހުން މަޢުލޫމާތު ބަދަލުކޮށް އެ އޮފީހަށް ފާހަގަކުރެވޭ ކަންކަމާ ގުޅޭގޮތުން ފުރިހަމަ ރިޕޯޓެއް ފަހުން ހުށަހަޅާނެކަމަށްވާތީ މިވަގުތަށް މި ރިޕޯޓު ފައިލްކުރުމަށް ހުރާ ދާއިރާގެ މެންބަރު ޑރ. އަނާރާ ނަޢީމް ހުށަހަޅުއްވައި ހިންނަވަރު ދާއިރާގެ މެންބަރު މުޙައްމަދު ޢަބްދުއްރަޙްމާން ތާޢީދުކުރެއްވިއެވެ. ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން މި ހުށަހެޅުން ފާސްވިއެވެ.

ދެވަނަ ކަމަކަށް މިއަދުގެ ބައްދަލުވުމުގައި މަޝްވަރާކޮށްފައިވަނީ ޗިލްޑްރަންސް އޮމްބަޑްސްޕަރސަންއާ ގުޅޭގޮތުން ހުށަހަޅާފައިވާ މައްސަލައެއް ކޮމިޓީން ބައްލަވައި ކޮމިޓީގެ ރިޕޯޓުގައި ހުށަހަޅުއްވާފައިވާ ކަންކަން ތަންފީޒުކުރުމަށް އެ އޮފީހުން ގަސްތުކުރާ ގޮތުގެ ޕްލޭންއާ ގުޅޭގޮތުން މަޝްވަރާކުރުމެވެ. އެގޮތުން އެ ޕްލޭންގައިވާ ކަންކަން ތަންފީޒުކުރުމަށް ކުރައްވާފައިވާ މަސައްކަތްތަކުގެ އެންމެ ފަހުގެ މަޢުލޫމާތު ޗިލްޑްރަންސް އޮމްބަޑްސްޕަރސަންގެ އޮފީހުން ސާފުކުރުމަށް މާފަންނު ދެކުނު ދާއިރާގެ މެންބަރު ޢަބްދުﷲ ރިފާޢު ހުށަހަޅުއްވައި ކުޑަހުވަދޫ ދާއިރާގެ މެންބަރު ޙުސައިން ޙަމީދު ތާޢީދުކުރެއްވިއެވެ. ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން މި ހުށަހެޅުން ފާސްވިއެވެ.

ތިންވަނަ ކަމަކަށް މިއަދުގެ ބައްދަލުވުމުގައި މަޝްވަރާކޮށްފައިވަނީ ޤާނޫނު ނަންބަރު 2019/19 (ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނު) އަށް ގެންނަންޖެހޭ އިޞްލާޙުތައްކަމަށް ޗިލްޑްރަންސް އޮމްބަޑްސްފަރސަންއަށް ފެނިވަޑައިގަންނަވާ އިޞްލާޙުތައް މިނިސްޓްރީ އޮފް ހެލްތު، ފެމިލީ އެންޑް ވެލްފެއަރ އަށް ފޮނުވައި ރައްޔިތުންގެ މަޖިލީހަށް ކޮޕީ ކޮށްފައިވާ ސިޓީއާ ގުޅޭގޮތުންނެވެ. ޤާނޫނަށް ގެންނަން ފެންނަ އިޞްލާޙުތައް ކަމާގުޅޭ މިނިސްޓްރީއަށް ފޮނުވާފައިވާތީ، އެ ޤާނޫނު އިޞްލާޙުކުރުމަށް ރައްޔިތުންގެ މަޖިލީހަށް ބިލެއް ހުށަހަޅައިފިނަމަ އެ ކަންކަމަށް ރިޢާޔަތްކުރާނެކަން އެ އޮފީހަށް އަންގައި މިވަގުތަށް ސިޓީ ފައިލްކުރުމަށް ކުޅުދުއްފުށި ދެކުނު ދާއިރާގެ މެންބަރު ފަރުޙަތު މުޙައްމަދު ހުށަހަޅުއްވައި ދާންދޫ ދާއިރާގެ މެންބަރު މުޙައްމަދު ފަޟީލް ތާޢީދުކުރެއްވިއެވެ. ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން މި ހުށަހެޅުން ފާސްވިއެވެ.

ހަތަރުވަނަ ކަމަކަށް މިއަދުގެ ބައްދަލުވުމުގައި މަޝްވަރާކޮށްފައިވަނީ ޗައިލްޑް ސެކްޝުއަލް އެބިއުސް މެޓީރިއަލްގެ ނުރައްކާ ދިވެހި ކުޑަކުދިންނަށް އޮތުމާއެކު ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނަށް އެބައިތައް އިތުރުކޮށް، ޤާނޫނު އިޞްލާޙު ކޮށްދެއްވުމަށް އެދި ރައިޓްސް އެސޯސިއޭޝަން މޯލްޑިވްސްއިން ހުށަހަޅާފައިވާ މައްސަލައާ ގުޅޭގޮތުންނެވެ. އެގޮތުން މި މައްސަލަ މިނިސްޓްރީ އޮފް ހެލްތު، ފެމިލީ އެންޑް ވެލްފެއަރއަށް ފޮނުވުމަށާއި ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނު އިޞްލާޙުކުރުމަށް ރައްޔިތުންގެ މަޖިލީހަށް ބިލެއް ހުށަހަޅައިފިނަމަ އެކަންކަމަށް ކޮމިޓީން ރިޢާޔަތްކުރާނެކަން އެފަރާތަށް އަންގައި މައްސަލަ ނިންމުމަށް ކުޑަހުވަދޫ ދާއިރާގެ މެންބަރު ޙުސައިން ޙަމީދު ހުށަހަޅުއްވައި ކުޅުދުއްފުށި ދެކުނު ދާއިރާގެ މެންބަރު ފަރުޙަތު މުޙައްމަދު ތާޢީދުކުރެއްވިއެވެ. ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން މި ހުށަހެޅުން ފާސްވިއެވެ.

އެންމެފަހު ކަމަކަށް މިއަދުގެ ބައްދަލުވުމުގައި މަޝްވަރާކޮށްފައިވަނީ އިންޓަރނެޓްގެ ޚިދުމަތްދޭ ކުންފުނިތަކުން ކުޑަކުދިންގެ ރައްކާތެރިކަމަށްޓަކައި ހިމަނާ ފީޗަރތަކަކީ "ބައި-ޑީފޯލްޓް" ކޮށް، އަދި ހިލޭ ލިބޭ ޚިދުމަތްތަކަކަށް ހެދުމަށް ޤާނޫނުތަކަށް ބަދަލު ގެނެސްދިނުމަށް އެދި ރައިޓްސް އެސޯސިއޭޝަން މޯލްޑިވްސްއިން ފޮނުވާފައިވާ ސިޓީއާ ގުޅޭގޮތުންނެވެ. އެގޮތުން އެ މައްސަލަ މިނިސްޓްރީ އޮފް ހެލްތު، ފެމިލީ އެންޑް ވެލްފެއަރގެ ސަމާލުކަމަށް ގެނެސް ކޮމިޓީން މައްސަލަ ނިންމުމަށް ހުރާ ދާއިރާގެ މެންބަރު ޑރ. އަނާރާ ނަޢީމް ހުށަހަޅުއްވައި މާފަންނު ދެކުނު ދާއިރާގެ މެންބަރު ޢަބްދުﷲ ރިފާޢު ތާޢީދުކުރެއްވިއެވެ.

ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން މި ހުށަހެޅުން ފާސްވިއެވެ.

މި ބައްދަލުވުމުގައި ހުށަހެޅުނު ހުށަހެޅުއްވުންތަކަށް މެންބަރުން ވޯޓު ދެއްވިގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.