މި ބައްދަލުވުމުގައި ކުރިއަށްގެންދެވީ ކޮމިޓީއަށް ހުށަހެޅިފައިވާ މައްސަލަތައް ދިރާސާކުރެއްވުމެވެ.

ފުރަތަމަކަމަށް ކުރިއަށް ގެންދެވީ، ފޭލިވިޔުމުގެ ފަންނު މިހާރު ދިވެހިރާއްޖޭގައި އޮތް މިންވަރާއި، އެ މަސައްކަތް ދިރުވައި އާލާކުރުމާ ގުޅޭގޮތުން ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ހުށަހަޅުއްވާފައިވާ މައްސަލައާއި ގުޅޭގޮތުން ކަމާއި ގުޅުންހުރި އިދާރާތަކާއި ކޮމިޓީން ބައްދަލުކުރައްވާފައިވާތީ، އެފަރާތްކަތަށް އެ މައްސަލައާގުޅޭގޮތުން ފޮނުވަންޖެހޭ ސިޓީތައް ފޮނުވުމަށާއި މައްސަލަ ހުށަހެޅުއްވި މެންބަރަށް ޖަވާބުފޮނުއްވުމަށް ނިންމެވުމެވެ.

އެއަށްފަހު ކުރިއަށް ގެންދެވީ، ފުވައްމުލަކު ސްކޫލުގެ ޕްރިންސިޕަލްގެ ފަރާތުން އެ ސްކޫލުގެ ޓީޗަރަކަށް ނިޒާމީ ގޯނާކުރުންތަކެއް ކުރިމަތިވަމުންދާކަމަށް ބަޔާންކުރައްވައި ރައްޔިތުންގެ މަޖިލީހުގެ ފުވައްމުލަކު ދެކުނު ދާއިރާގެ މެންބަރު އިބްރާހީމް ޙުސައިން ހުށަހަޅުއްވާފައިވާ މައްސަލަ ދިރާސާކުރެއްވުމެވެ. އެ ގޮތުން އެ މައްސަލައާއި ގުޅޭގޮތުން މިނިސްޓްރީ އޮފް އެޑިޔުކޭޝަން، ހަޔަރ އެޑިޔުކޭޝަން އެންޑް ސްކިލްސް ޑިވެލޮޕްމަންޓްއިން މައުލޫމާތު ސާފުކުރެއްވުމުން، އެ މައްސަލަ މިހާރު ހައްލުވެފައިވާކަމުގައި އެ މިނިސްޓްރީން މަޢުލޫމާތު ދެއްވާފައިވާތީ މެންބަރުންގެ މެދުގައި މަޝްވަރާކުރެއްވުމަށްފަހު ނިންމެވީ، އެ މައްސަލައަށް މިހާރު ހައްލުވެފައިވާކަމަށް ބަޔާންކޮށް އެ މައްސަލަ ހުށަހަޅުއްވާފައިވާ މެންބަރަށް ލިޔުމުން ޖަވާބުދެއްވުމަށެވެ.

އެ ހުށަހެޅުއްވުމަށް ވޯޓަށް އެއްސެވުމުން ކޮމިޓީއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ފާސްވެފައިވެއެވެ.

(މި ހުށަހެޅުމަށް މެންބަރުން ވޯޓުދެއްވި ގޮތުގެ ތަފްޞީލް "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.)

އެއަށްފަހު މި ބައްދަލުވުމުގައި ކުރިއަށް ގެންދެވީ، ތެލެސީމިއާ ސެންޓަރު ހިންގި އިމާރާތުގެ އާބާތުރަ ފިލިވުމުގައި ހުރި ކަންބޮޑުވުންތައް ސަމާލުކަމަށް ގެނައުމުގެގޮތުން ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ހުށަހަޅުއްވާފައިވާ މައްސަލަ ދިރާސާކުރެއްވުމެވެ. މި މައްސަލައާއި ގުޅޭގޮތުން މެންބަރުން މަޝްވަރާކުރެއްވުމަށްފަހު، ވިލިނގިލި ދާއިރާގެ މެންބަރު ޢާޒިމް ޢަބްދުލްޢަޒީޒް ހުށަހަޅުއްވައި ފުވައްމުލަކު އުތުރު ދާއިރާގެ މެންބަރު ޙަމަދު ޢަބްދުﷲ ތާއީދުކުރެއްވީ އެ އިމާރާތުގެ އާބާތުރަ ފިލިވުމުގެ މަސައްކަތް ކުރައްވަމުން ގެންދަވާ މާލޭ ސިޓީ ގްރޫޕް އޮފް ހޮސްޕިޓަލްސް އިން އެ މައްސަލައާގުޅޭގޮތުން މަޢުލޫމާތު ސާފުކުރެއްވުމަށެވެ.

އެ ހުށަހެޅުއްވުމަށް ވޯޓަށް އެއްސެވުމުން ކޮމިޓީއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ފާސްވެފައިވެއެވެ.

(މި ހުށަހެޅުމަށް މެންބަރުން ވޯޓުދެއްވި ގޮތުގެ ތަފްޞީލް "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.)

އެއަށްފަހު މި ބައްދަލުވުމުގައި ކުރިއަށް ގެންދެވީ، މާލެ ސަރަހައްދުގައި އެއްގަމުގައި ދުއްވާ އުޅަނދުފަހަރު ގިނަވުމުން ދިމާވާ މައްސަލަ ހައްލުކޮށްދިނުމަށް އެދި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ހުށަހަޅުއްވާފައިވާ މައްސަލަ ދިރާސާކުރެއްވުމެވެ. މި މައްސަލައާއި ގުޅިގެން މެންބަރުން މަޝްވަރާކުރެއްވުމަށްފަހު، ތިނަދޫ އުތުރު ދާއިރާގެ މެންބަރު ސަޢުދުﷲ ޙިލްމީ ހުށަހަޅުއްވައި ވިލިނގިލި ދާއިރާގެ މެންބަރު ޢާޒިމް ޢަބްދުލްޢަޒީޒް ތާއީދުކުރެއްވީ އެ މައްސަލައާ ގުޅޭގޮތުން މައުލޫމާތު ސާފުކުރެއްވުމުގެ ގޮތުން މާލޭ ސިޓީ ކައުންސިލަށާއި މިނިސްޓްރީ އޮފް އިކޮނޮމިކް ޑިވޮލޮޕްމަންޓް، ޓްރާންސްޕޯޓް އެންޑް ޓްރޭޑަށް ސިޓީ ފޮނުވުމަށެވެ.

އެ ހުށަހެޅުއްވުމަށް ވޯޓަށް އެއްސެވުމުން ކޮމިޓީއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ފާސްވެފައިވެއެވެ.

(މި ހުށަހެޅުމަށް މެންބަރުން ވޯޓުދެއްވި ގޮތުގެ ތަފްޞީލް "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.)