މިއަދުގެ ބައްދަލުވުމުގައި ކޮމިޓީއަށް ހުށަހެޅިފައިވާ ތްރެޝްހޯލްޑް-1 ހަމަވާ އަދަދަށް ސޮއި ލިބިފައިވާ ޕެޓިޝަން، "ޤާނޫނު ނަންބަރު 2010/7 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަ) އަށް ތުޅާދޫ ދާއިރާގެ ޢިއްޒަތްތެރި މެންބަރު ޢަބްދުލްޙަންނާނު އަބޫބަކުރު ހުށަހަޅުއްވާފައިވާ އިސްލާޙު ގެނައުމުގެ ބިލު (2026/20/ބ.22)" އާ ގުޅޭގޮތުން ކޮމިޓީގެ މެންބަރުންގެ މެދުގައި މަޝްވަރާކުރެއްވިއެވެ. އެގޮތުން، އެ ޕެޓިޝަނާ ގުޅިގެން ލޯކަލް ގަވަރމަންޓް އޮތޯރިޓީ އާއި ރައްޔިތުންގެ މަޖިލީހުގެ ލާމަރުކަޒީ ކޮމިޓީގެ ލަފައެއް ހޯދުމަށް ފޮނުވުމަށް މަޑަވެލި ދާއިރާގެ މެންބަރު މުޙައްމަދު ޝަމީޒް ހުށަހެޅުއްވިއެވެ. މި ހުށަހެޅުއްވުމަށް ދިއްދޫ ދާއިރާގެ މެންބަރު ޢަބްދުއްލަޠީފް މުޙައްމަދު ތާއީދުކުރެއްވިއެވެ. އަދި ކޮމިޓީއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އަޣްލަބިއްޔަތުން އެ ހުށަހެޅުން ވަނީ ފާސްވެފައެވެ.

އެއަށްފަހު، ތްރެޝްހޯލްޑް-1 ހަމަވާ އަދަދަށް ސޮއި ލިބިފައިވާ ޕެޓިޝަން، "އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް ހުށަހަޅާފައިވާ އިޞްލާހު މިހާރު އޮތްގޮތަށް ފާސްކޮށްދިނުމަށް ގޮވާލާ ޕެޓިޝަން" އަކީ ރައްޔިތުންގެ މަޖިލީހުގެ ގަވާއިދުގެ 6-257 ވަނަ މާއްދާގެ (ނ) ގެ 2 ވަނަ ނަންބަރުގައި ބަޔާންކުރާ ތްރެޝްހޯލްޑް 2 ހަމަވާ ޢަދަދަށް ސޮއި ލިބިފައިވާ އީ-ޕެޓިޝަނަކަށްވާތީ، ގަވާއިދުގެ 257-12 ވަނަ މާއްދާގެ (ޅ) ގައި ބަޔާންކޮށްފައިވާ ގޮތުގެމަތިން މި ޕެޓިޝަނާ ގުޅޭގޮތުން ލޯކަލް ގަވަރމަންޓް އޮތޯރިޓީ އާއި ރައްޔިތުންގެ މަޖިލީހުގެ ލާމަރުކަޒީ ކޮމިޓީގެ ލަފައެއް ހޯދުމަށް ފޮނުވުމަށް މަޑަވެލި ދާއިރާގެ މެންބަރު މުޙައްމަދު ޝަމީޒް ހުށަހެޅުއްވިއެވެ. މި ހުށަހެޅުއްވުމަށް ދިއްދޫ ދާއިރާގެ މެންބަރު ޢަބްދުއްލަޠީފް މުޙައްމަދު ތާއީދުކުރެއްވިއެވެ. އަދި ކޮމިޓީއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އަޣްލަބިއްޔަތުން އެ ހުށަހެޅުން ވަނީ ފާސްވެފައެވެ.

މީގެއިތުރުން، އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ގާނޫނަށް ހުށަހަޅާފައިވާ އިޞްލާހު އަނބުރާ ގެންދިއުމަށް ގޮވަލާ ޕެޓިޝަނާ ގުޅިގެން އެންމެ ފަހުން ބޭއްވުނު ކޮމިޓީގެ ބައްދަލުވުމުގައި ރައްޔިތުންގެ މަޖިލީހުގެ ލާމަރުކަޒީ ކޮމިޓީގެ ލަފަޔެއް ހޯދުމަށް ފޮނުވިފައިނުވާތީ، އެ ޕެޓިޝަންވެސް ލާމަރުކަޒީ ކޮމިޓީގެ ލަފަޔެއް ހޯދުމަށް ފޮނުވުމަށް މަޑަވެލި ދާއިރާގެ މެންބަރު މުޙައްމަދު ޝަމީޒް ހުށަހެޅުއްވިއެވެ. މި ހުށަހެޅުއްވުމަށް ދިއްދޫ ދާއިރާގެ މެންބަރު ޢަބްދުއްލަޠީފް މުޙައްމަދު ތާއީދުކުރެއްވިއެވެ. އަދި ކޮމިޓީއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އަޣްލަބިއްޔަތުން އެ ހުށަހެޅުން ވަނީ ފާސްވެފައެވެ.

ކޮމިޓީގެ މިއަދުގެ ބައްދަލުވުމުގެ އެންމެ ފަހު ކަމެއްގެ ގޮތުގައި ރައްޔިތުންގެ މަޖިލީހުގެ ގަވާއިދުގެ 7-257 ވަނަ މާއްދާގެ (ހ) ގައި ބަޔާންކޮށްފައިވާ ގޮތުގެމަތިން، ތްރެޝްހޯލްޑްތަކަށް އެންމެ މަދުން ސޮއި ބޭނުންވާ އަދަދު މުރާޖަޢާކުރުމާ މެދު މަޝްވަރާކުރެވުނެވެ. އެގޮތުން، މަޑަވެލި ދާއިރާގެ މެންބަރު މުޙައްމަދު ޝަމީޒް ހުށަހެޅުއްވީ، ގަވާއިދުގެ 6-257 ވަނަ މާއްދާގެ (ނ) ގައި މިހާރު ކަނޑައަޅާފައިވާ އިންސައްތަތަކަށް އެއްވެސް އިޞްލާޙެއް ގެންނަން ނުފެންނަކަމަށެވެ. މި ހުށަހެޅުމަށް ދިއްދޫ ދާއިރާގެ މެންބަރު ޢަބްދުއްލަޠީފް މުޙައްމަދު ތާއީދުކުރެއްވިއެވެ. އަދި ކޮމިޓީއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން އެ ހުށަހެޅުން ވަނީ ފާސްވެފައެވެ.