މިއަދުގެ ބައްދަލުވުމުގައި، ހުޅުމާލޭގައި 3000 (ތިން ހާސް) ހައުސިންގ ޔުނިޓް އިމާރާތްކުރުމަށް ހައުސިންގ ޑިވެލޮޕްމަންޓް ކޯޕަރޭޝަނާއި ސީލައިފް ގްލޯބަލް ޕްރައިވެޓް ލިމިޓެޑާ ދެމެދު ސޮއިކުރެވުނު އެއްބަސްވުމުގެ ދަށުން ބުކިންގ ފީއާއި ޑައުންޕޭމަންޓްގެ ފައިސާ ނެގުމަށްފަހު ސީލައިފް ގްލޯބަލް ޕްރައިވެޓް ލިމިޓެޑުން ހައުސިންގ ޔުނިޓްތައް އިމާރާތްކޮށްފައިނުވާތީ، މި މައްސަލައިގައި ގެއްލުން ލިބުނު ފަރާތްތަކާއެކު ސަރުކާރުން އެކުލަވާލި ސެޓްލްމަންޓް އެއްބަސްވުމުގެ ދަށުން އެ ފަރާތްތަކަށް ސަރުކާރު ހައުސިންގ ޔުނިޓް ގަތުމަށް ސަރުކާރުން ހަމަހަމަ ފުރުސަތު ފަހިކޮށްދީފައިނުވާކަމަށް ބަޔާންކޮށް ހުށަހަޅާފައިވާ މައްސަލަ ދިރާސާކުރެއްވިއެވެ. އެގޮތުން، މައްސަލައާ ގުޅޭގޮތުން ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑުން ލިބިފައިވާ މަޢުލޫމާތު މައްސަލަ ހުށަހެޅުއްވި މެންބަރާ ހިއްސާކުރެއްވުމަށް އިހަވަންދޫ ދާއިރާގެ މެންބަރު އަޙްމަދު ނަޞީރު ހުށަހަޅުއްވައި، ތޮއްޑޫ ދާއިރާގެ މެންބަރު ޙުސައިން ސަމީރު ތާއީދުކުރެއްވިއެވެ. މި ހުށަހެޅުއްވުން ކޮމިޓީއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ފާސްވިއެވެ.

އެއަށްފަހު، މާލޭގެ އުތުރު ބަނދަރު (ނޯތު ހާބަރު) ބޭނުންކުރުމުގައި މޯލްޑިވްސް ޕޯޓްސް ލިމިޓެޑުން އަލަށް ޢަމަލުކުރަން ފެށި އުސޫލުގެ ސަބަބުން އަތޮޅުތެރެއަށް މުދާ އުފުލާ ބޯޓުފަހަރަށް ދިމާވެފައިވާ ގޮންޖެހުންތަކާ ގުޅޭގޮތުން ހުށަހަޅާފައިވާ މައްސަލައާ ގުޅޭގޮތުން މޯލްޑިވްސް ޕޯޓްސް ލިމިޓެޑުން ލިބިފައިވާ މަޢުލޫމާތު ދިރާސާކުރެއްވިއެވެ. އެގޮތުން، މި މައްސަލައިގެ މަޢުލޫމާތު އިތުރަށް ސާފުކުރެއްވުމަށް މޯލްޑިވްސް ޕޯޓްސް ލިމިޓެޑާ ބައްދަލުކުރެއްވުމަށް މާވަށު ދާއިރާގެ މެންބަރު އަޙްމަދު ޝާކިރު ހުށަހަޅުއްވައި، ތޮއްޑޫ ދާއިރާގެ މެންބަރު ޙުސައިން ސަމީރު ތާއީދުކުރެއްވިއެވެ. މި ހުށަހެޅުއްވުން ކޮމިޓީއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އަޢުލަބިއްޔަތުން ފާސްވިއެވެ. މި

ދެން، މޯލްޑިވްސް ޙައްޖު ކޯޕަރޭޝަން ލިމިޓެޑުން ބަލަހައްޓާ ޙައްޖަށް ދިއުމަށް އެދި ފައިސާ ދައްކާފައިވާ ފަރާތްތަކުގެ ޖާގަ ލިސްޓު ޢާންމުކޮށް ހާމަކުރުމާ ގުޅޭގޮތުން ހުށަހަޅާފައިވާ މައްސަލަ ދިރާސާކުރެއްވިއެވެ. އެގޮތުން، މައްސަލައާ ގުޅޭގޮތުން އެ ކުންފުނިން ލިބިފައިވާ މަޢުލޫމާތު މައްސަލަ ހުށަހެޅުއްވި މެންބަރާ ހިއްސާކުރެއްވުމަށް ގައްދޫ ދާއިރާގެ މެންބަރު މުޙައްމަދު ޢަލީ ހުށަހަޅުއްވައި، ކޮމަންޑޫ ދާއިރާގެ މެންބަރު މުޙައްމަދު އިބްރާހީމް ތާއީދުކުރެއްވިއެވެ. މި ހުށަހެޅުއްވުން ކޮމިޓީއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ފާސްވިއެވެ.

އެއަށްފަހު، ސަރުކާރު ޙިއްޞާވާ ކުންފުނިތަކާ ގުޅޭގޮތުން އެންޓި-ކޮރަޕްޝަން ކޮމިޝަނުން ބައްލަވާފައިވާ މައްސަލަތަކާއި، ކުންފުނިތައް ހަރުދަނާކުރުމަށް ކުރެވޭނެ ކަންތައްތަކާ ގުޅޭ މަޢުލޫމާތު ސާފުކުރުމަށް އެ ކޮމިޝަނާ ބައްދަލުކުރުމަށް ހުށަހަޅާފައިވާ މައްސަލައިގައި، އެ ކޮމިޝަނާ ބައްދަލުކުރައްވައި މަޢުލޫމާތު ސާފުކޮށްފައިވާތީ، މައްސަލަ ކޮމިޓީގެ ސްޓޭޓަސްއިން ނެގުމަށް ކޮމިޓީއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އަޣުލަބިއްޔަތުން ފާސްވިއެވެ.

ބައްދަލުވުމުގެ އެންމެ ފަހުކަމަކަށް، މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން ލިމިޓެޑާއި އަދި މޯލްޑިވްސް އިންޓަގްރޭޓަޑް ޓޫރިޒަމް ޑިވެލޮޕްމަންޓް ކޯޕަރޭޝަން ލިމިޓެޑުގެ ޙާލަތު ކޮމިޓީން ދިރާސާކޮށް ނިންމިގޮތުގެ ރިޕޯޓު (M20/R/SOE/2025/02) އާ ގުޅޭގޮތުން ކޮމިޓީއާ ބައްދަލުކުރުމަށް އެދި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން ލިމިޓެޑުން ފޮނުވާފައިވާ މައްސަލައިގައި، އެ ކުންފުނީގެ އެދުމުގެ މަތިން ބައްދަލުވުން ފަސްކުރެވި، ފަހުން ބައްދަލުވުން ހަމަޖެއްސުމަށް އެ ކުންފުނިން އެދިފައިނުވާތީ، މައްސަލަ ކޮމިޓީގެ ސްޓޭޓަސްއިން ނެގުމަށް ކޮމިޓީއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ފާސްވިއެވެ.

މި ބައްދަލުވުމުގައ ހުށަހެޅުނު ހުށަހެޅުއްވުންތަކަށް މެންބަރުން ވޯޓު ދެއްވިގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.