މިއަދުގެ ބައްދަލުވުމުގައި، އަމިއްލަ ފަރާތްތަކުން ހުށަހަޅާފައިވާ މައްސަލަތައް ދިރާސާކުރެއްވިއެވެ. އެގޮތުން، ފުނަދޫ ދާއިރާގެ މެންބަރު މުޙައްމަދު މަމްދޫޙް ހުށަހަޅުއްވައި، ކެލާ ދާއިރާގެ މެންބަރު ޢަބްދުﷲ ޝަރީފް ތާޢީދުކުރެއްވީ:

1.  ދައުލަތުގެ ޕޭ ފްރޭމްވަރކްގެ މިންގަނޑުތަކާއި މުސާރައަށް ގެނެވުނު އިޞްލާޙުތަކުގެ ދަށުން، ލީގަލް ޕްރޮފެޝަނަލުންގެ މުސާރައަށް ގެނެވުނު ބަދަލާ ގުޅިގެން ހުރި ކަންބޮޑުވުންތައް ހިއްސާކޮށް ހުށަހަޅާފައިވާ މައްސަލައާ ގުޅޭގޮތުން ސިވިލް ސަރވިސް ކޮމިޝަން އަދި ނޭޝަނަލް ޕޭ ކޮމިޝަނުން ދެއްވާފައިވާ މަޢުލޫމާތު މައްސަލަ ހުށަހެޅި ފަރާތާ ހިއްސާކުރުމަށް
2. އިންފޮމޭޝަން ކޮމިޝަނަރުގެ އޮފީހުގެ މުވައްޒަފުންނަށް ދެމުންގެންދެވި ލިވިންގ އެލަވަންސް ދިނުން ހުއްޓާލައި، ލިވިންގ އެލަވަންސްގެ ގޮތުގައި މުވައްޒަފުންނަށް ދީފައިވާ ފައިސާ މުވައްޒަފުންގެ އަތުން ނަގަން ނިންމާފައިވާތީ، އެކަމުގެ ކަންބޮޑުވުންތައް ހިއްސާކޮށް އެ އޮފީހުގެ މުވައްޒަފުން ހުށަހަޅާފައިވާ މައްސަލައިގައި:

• އިންފޮމޭޝަން ކޮމިޝަނަރުގެ އޮފީހުގެ މުވައްޒަފުންނަށް ބަޖެޓުގައި ހިމަނައިގެން 2024 ވަނަ އަހަރުން ފެށިގެން ދެއްވަމުން ގެންގޮސްފައިވާ ލިވިންގ އެލަވަންސް އަނބުރާ ހޯއްދެވުމުގެ މަސައްކަތް ކުރިއަށް ގެންދިއުމަށް އިންފޮމޭޝަން ކޮމިޝަނަރުގެ އޮފީހުގައި ދެންނެވުމަށް؛
• ލިވިންގ އެލަވަންސް ދެއްވުމަށް ނިންމި ނިންމުމުގައި ބައިވެރިވެފައިވާ ފަރާތްތައް ދެނެގަނެ، އެފަރާތްތަކުގެ މައްސަލަ ޤާނޫނާ އެއްގޮތްވާ ގޮތުގެ މަތިން ބައްލަވައި، އެފަރާތްތަކާމެދު ފިޔަވަޅު އަޅުއްވައިދެއްވުމަށް މިނިސްޓްރީ އޮފް ފިނޭންސް އެންޑް ޕަބްލިކް އެންޓަރޕްރައިޒަސްގައި ދެންނެވުމަށް؛ އަދި
• މައްސަލައާ ގުޅޭގޮތުން ކޮމިޓީން ނިންމާފައިވާ ނިންމުން މައްސަލަ ހުށަހަޅާފައިވާ ފަރާތާ ހިއްސާކުރުމަށް.

މި ހުށަހެޅުއްވުން ކޮމިޓީއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ފާސްވިއެވެ.

އަދި، 65 އަހަރުވުމުން 20 އަހަރު ޚިދުމަތްކޮށްގެން ލިބެމުން އައި ޕެންޝަން ކަނޑާލާފައިވާކަމަށް ބަޔާންކޮށް ހުށަހަޅާފައިވާ މައްސަލަ ދިރާސާކުރެއްވިއެވެ. އެގޮތުން، މައްސަލައާ ގުޅޭގޮތުން ސިވިލް ސަރވިސް ކޮމިޝަން އަދި މޯލްޑިވްސް ޕެންޝަން އެޑްމިނިސްޓްރޭޝަން އޮފީހުން ދެއްވާފައިވާ މަޢުލޫމާތު މައްސަލަ ހުށަހެޅި ފަރާތާ ހިއްސާކުރުމަށް ފުނަދޫ ދާއިރާގެ މެންބަރު މުޙައްމަދު މަމްދޫޙް ހުށަހަޅުއްވައި، ކެލާ ދާއިރާގެ މެންބަރު ޢަބްދުﷲ ޝަރީފް ތާޢީދުކުރެއްވިއެވެ. މި ހުށަހެޅުއްވުން ކޮމިޓީއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ފާސްވިއެވެ.

އެއަށްފަހު، ތިރީގައިވާ ލޯނުތަކުގެ މަޢުލޫމާތު ކޮމިޓީގެ މެންބަރުންނާ ހިއްސާކުރެއްވިއެވެ.

• ސްޓޭޓް ޓްރޭޑިންގ އޯގަނައިޒޭޝަން (އެސް.ޓީ.އޯ) އިން އެ ކުންފުނީގެ އިންޓަރނަލް ފަންޑިންގއަށް ބޭނުންވާ ފައިސާ ހަމަޖެއްސުމަށްޓަކައި، އޯ.ކިއު ޓްރޭޑިންގ ލިމިޓެޑް (އޯ.ކިއު.ޓީ) އިން ނަގާފައިވާ 100 މިލިއަން އެމެރިކާ ޑޮލަރުގެ ސީނިއަރ ޓަރމް ކްރެޑިޓް ފެސިލިޓީއަށް ސަރުކާރުން ދޫކޮށްފައިވާ ސޮވްރިންގ ގެރެންޓީއާ ގުޅޭ މަޢުލޫމާތު.
• ސްޓޭޓް ޓްރޭޑިންގ އޯގަނައިޒޭޝަން (އެސް.ޓީ.އޯ) އިން އެތެރެކުރާ ބާވަތްތަކަށް ބޭނުންވާ ފައިސާ ހޯދުމަށްޓަކައި، އިންޓަރނޭޝަނަލް އިސްލާމިކް ޓްރޭޑް ފައިނޭންސް ކޯޕަރޭޝަން (އައި.ޓީ.އެފް.ސީ) އާއެކު ސޮއިކޮށްފައިވާ 25 މިލިއަން އެމެރިކާ ޑޮލަރުގެ ސޮވްރިންގ މުރާބަހާ ފައިނޭންސިންގ ފެސިލިޓީއަށް ސަރުކާރުން ދޫކޮށްފައިވާ ގެރެންޓީއާ ގުޅޭ މަޢުލޫމާތު.
• އޭޝިއަން ޑިވެލޮޕްމަންޓް ބޭންކް (އޭ.ޑީ.ބީ) ގެ އެހީގައި ދިވެހިރާއްޖޭގައި ހިންގުމަށް ހަމަޖެހިފައިވާ "އެނަރޖީ ސެކިއުރިޓީ އިމަޖެންސީ އެސިސްޓެންޓް ޕްރޮޖެކްޓް" އަށް ބޭނުންވާ 50,000,000 (ފަންސާސް މިލިއަން) އެމެރިކާ ޑޮލަރު ނެގުމަށް ދިވެހި ސަރުކާރާ އޭ.ޑީ.ބީ އާ ދެމެދު ސޮއިކޮށްފައިވާ ލޯނާ ގުޅޭ މަޢުލޫމާތު.
• މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) އިން އެ ކުންފުނީގެ ކޭޝްފްލޯ ހަމަޖެއްސުމަށް ބޭނުންވާ ފައިސާ ހަމަޖެއްސުމަށާއި، އެސް.އެމް.އީ ޑިޖިޓަލް މެދުވެރިކޮށް ނަގާފައިވާ ލޯނުތައް އަނބުރާ ދެއްކުމަށްޓަކައި ބޭންކް އޮފް މޯލްޑިވްސް މެދުވެރިކޮށް ނަގާފައިވާ 44,000,000 (ސާޅީސް ހަތަރު މިލިއަން) އެމެރިކާ ޑޮލަރުގެ ޑިމާންޑް ލޯނު ފެސިލިޓީއާއި 200,000,000 (ދުއިސައްތަ މިލިއަން) ރުފިޔާގެ އޯވާޑްރާފްޓް ފެސިލިޓީ ނެގުމަށް ސަރުކާރުން ދޫކޮށްފައިވާ ސޮވްރިންގ ގެރެންޓީއާ ގުޅޭ މަޢުލޫމާތު.   
• މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) އިން 28,000,000 (އަށާވީސް މިލިއަން) އެމެރިކާ ޑޮލަރުގެ ފެސިލިޓީ ނެގުމަށް ވިޓޯލް އޭޕެކް ކެޕިޓަލް ޕްރައިވެޓް ލިމިޓެޑް (ވިޓޯލް) އާއެކު ސޮއިކޮށްފައިވާ ފެސިލިޓީއަށް ދިވެހި ސަރުކާރުން ދޫކޮށްފައިވާ ގެރެންޓީއާގުޅޭ މަޢުލޫމާތު.

ބައްދަލުވުމުގެ އެންމެ ފަހުކަމަކަށް، ކޮމިޓީއަށް ލިބިފައިވާ އަންނަނިވި ސިޓީތައް ކޮމިޓީގެ މެންބަރުންނާ ހިއްސާކުރެއްވިއެވެ.

• އިންޓަރނޭޝަނަލް އޯގަނައިޒޭޝަން އޮފް ސުޕްރީމް އޮޑިޓް އިންސްޓިޓިއުޝަން (އިންޓޯސައި) ގެ ކެޕޭސިޓީ ބިންޑިންގ އިދާރާގެ، އިންޓޯސައި ޑިވެލޮޕްމަންޓް އިނިޝިއޭޓިވް (އައި.ޑީ.އައި) ގެ ބޯޑުގެ މެންބަރުކަން ފުރަތަމަ ފަހަރަށް އޮޑިޓަރ ޖެނެރަލްގެ އޮފީހަށް ލިބިފައިވާކަން ބަޔާންކޮށް އެ އޮފީހުން ފޮނުވާފައިވާ ސިޓީ.
• މޯލްޑިވް ގޭސް ޕްރައިވެޓް ލިމިޓެޑުގެ އިސްމަޤާމެއްގައި ހުރި ފަރާތެއް އެތިކްސްއާއި، ގަވަރނަންސް މިންގަނޑުތަކާއި، ފިޑިއުޝަރީ ޒިންމާއާއި، މަޞްލަޙަތު ފުށުއަރާ ކަންކަމާ ގުޅޭ ގަވާއިދުތަކުގެ އިތުރުން، ކުންފުނީގެ އެތެރޭގެ ކޮންޓްރޯލް ފްރޭމްވަރކްތަކާ ތަކުރާރުކޮށް ޚިލާފުވަމުންދާކަމަށް ބަޔާންކޮށް ހުށަހަޅާފައިވާ މައްސަލަ.
• ގއ. އަތޮޅު ހޮސްޕިޓަލުގެ އިސްމަޤާމެއްގައި ހުރި ފަރާތެއްގެ ކޮރަޕްޝަނާގުޅޭ މައްސަލަތައް ތަޙްޤީޤުކޮށް ދިނުމަށް އެދި އަމިއްލަ ފަރާތަކުން އެންޓި-ކޮރަޕްޝަން ކޮމިޝަނަށް ފޮނުވައި، ރައްޔިތުންގެ މަޖިލީހުގެ އިދާރާއަށް ކޮޕީކޮށްފައިވާ ސިޓީ.
• ހއ. ހޯރަފުށީގައި ތެލުގެ ވިޔަފާރިކުރުމަށް ދި ހޯކްސް ޕްރައިވެޓް ލިމިޓެޑަށް 5،000 އަކަފޫޓުގެ ބިމެއް އެ ރަށު ކައުންސިލުން ކުއްޔަށް ދޫކުރި މައްސަލައާ ގުޅޭގޮތުން އަމިއްލަ ފަރާތަކުން ޕްރޮސިކިއުޓަރ ޖެނެރަލްގެ އޮފީހަށް ފޮނުވައި، ރައްޔިތުންގެ މަޖިލީހުގެ އިދާރާއަށް ކޮޕީކޮށްފައިވާ ސިޓީ.

މި ބައްދަލުވުމުގައ ހުށަހެޅުނު ހުށަހެޅުއްވުންތަކަށް މެންބަރުން ވޯޓު ދެއްވިގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.