މި ބައްދަލުވުމުގައި ފުރަތަމަ ކަމެއްގެ ގޮތުގައި ކުރިއަށްގެންދެވީ ރައްޔިތުންގެ މަޖިލީހުން އަލުން ވިސްނެވުމަށް ރައީސުލްޖުމްހޫރިއްޔާ ފޮނުއްވާފައިވާ ޤާނޫނު ނަންބަރު 4/2012 (ތެލަސީމިއާ ކޮންޓްރޯލްކުރުމުގެ ޤާނޫނު) އަށް 1 ވަނަ އިޞްލާޙު ގެނައުމުގެ ބިލުގެ ސުންގަޑި އިތުރުކުރުކުރުމާ ގުޅޭގޮތުން މަޝްވަރާކުރުމުގެ މަސައްކަތެވެ. އެގޮތުން، ރައީސުލްޖުމްހޫރިއްޔާ ފޮނުއްވާފައިވާ ސިޓީގައި ބަޔާންކުރައްވާފައިވާ ކަންކަމާ ގުޅޭގޮތުން ކޮމިޓީގެ މެންބަރުންގެ މެދުގައި މަޝްވަރާކުރެއްވުމަށްފަހު، މާފަންނު ހުޅަނގު ދާއިރާގެ މެންބަރު މުޞްޠަފާ އިބްރާހީމް ހުށަހަޅުއްވައި ނިލަންދޫ ދާއިރާގެ މެންބަރު ފާޠިމަތު ސަޢުދާ ތާއީދުކުރައްވާފައިވަނީ، ބިލުގެ ސުންގަޑި 30 ނުވެމްބަރު 2026 ގެ ނިޔަލައް އިތުރު ކުރެއްވުމަށެވެ.

ކޮމިޓީއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާގުން އެ ހުށަހެޅުން ވަނީ ފާސްވެފައެވެ.

ދެވަނަ ކަމެއްގެ ގޮތުގައި ކޮމިޓީން މަޝްވަރާކުރައްވާފައިވަނީ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ހުށަހަޅުއްވާފައިވާ، ދިވެހިންނާ ކައިވެނިކޮށްގެން ރާއްޖޭގައި ދިރިއުޅޭ ބޭރުމީހުންނަށް އާސަންދައިގެ ޚިދުމަތް ނުލިބޭކަން ފާހަގަކޮށް، އެކަމާމެދު ރައްޔިތުންގެ މަޖިލީހުގެ މެންބަރުން ދެކެވަޑައިގަންނަވާ ގޮތެއް ދެނެގަތުމަށް ޓަކައި ހުށަހަޅާފައިވާ ޤަރާރުގެ ސުންގަޑި އިތުރުކުރުމާ ގުޅޭގޮތުންނެވެ. އެގޮތުން، އެ ޤަރާރާ ގުޅޭގޮތުން އިދާރާތަކުން ލިބިފައިވާ މަޢުލޫމާތާ ގުޅޭގޮތުން ކޮމިޓީގެ މެންބަރުންގެ މެދުގައި މަޝްވަރާކުރެއްވުމަށްފަހު، މާފަންނު ހުޅަނގު ދާއިރާގެ މެންބަރު މުޞްޠަފާ ޙުސައިން ހުށަހަޅުއްވައި ދާންދޫ ދާއިރާގެ މެންބަރު މުޙައްމަދު ފަޟީލް ތާއީދުކުރައްވާފައިވަނީ، ޤަރާރުގެ ސުންގަޑި 30 ނުވެންބަރު 2026 ގެ ނިޔަލައް އިތުރު ކުރެއްވުމަށެވެ.

ކޮމިޓީއަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާގުން އެ ހުށަހެޅުން ވަނީ ފާސްވެފައެވެ.

މި ބައްދަލުވުމުގައި ނެގި ވޯޓުތަކުގެ ތަފުޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.