މިއަދުގެ ބައްދަލުވުމުގައި ފުރަތަމަ މަޝްވަރާކުރެއްވީ، ބިދޭސީންގެ ކަންކަން ބަލަހައްޓަމުން ގެންދަވާ އެކްސްޕެޓް ސިސްޓަމް، މެލޭޝިއާގެ ކުންފުންޏަކާ ހަވާލުކުރައްވައިގެން، ފެބުރުވަރީ 2025 ގައި އާ ސިސްޓަމް މެދުވެރިކޮށް ޚިދުމަތް ދެއްވަން ފައްޓަވާނެކަމަށް، މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީއިން ވިދާޅުވެފައިވާކަމަށް ބަޔާންކުރައްވައި، އެކަމާ ގުޅިގެން ހުރި ކަންބޮޑުވުންތައް ހިއްސާކުރެވޭނެ ގޮތެއް ހަމަޖައްސަވައިދެއްވުން އެދި ޔޫނިއަން ފޯރ އެންޕްލޯއިމަންޓް އެޖެންސީސް އޮފް ދަ މޯލްޑިވްސް އިން ފޮނުއްވާފައިވާ މައްސަލައާ ގުޅޭގޮތުންނެވެ. އެގޮތުން ހިތަދޫ މެދު ދާއިރާގެ މެންބަރު އަޙްމަދު އަޒާން މަރުޒޫޤް ހުށަހަޅުއްވައި ކެލާ ދާއިރާގެ މެންބަރު ޢަބްދުﷲ ޝަރީފް ތާއީދުކުރެއްވީ، މި މައްސަލައާ ގުޅޭގޮތުން އެ ފަރާތުން ހިއްސާކުރެއްވުމަށް ބޭނުންފުޅުވާ އެންމެހައި ކަންކަން ލިޔުމުން ހިއްސާކޮށްދެއްވުމަށް ދެންނެވުމަށެވެ. މި ހުށަހެޅުން ކޮމިޓީއަށް ހާޒިރުވެވަޑައިގެން ވޯޓު ދެއްވި މެންބަރުންގެ އަޣްލަބިއްޔަތުންވަނީ ފާސްވެފައެވެ.

(އެ ހުށަހެޅުއްވުމަށް މެންބަރުން ވޯޓުދެއްވި ގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.)

އެއަށްފަހު މަޝްވަރާކުރެއްވީ، މޯލްޑިވްސް ކަރެކްޝަނަލް ސަރިވިސްގެ ބެލުމުގެ ދަށުގައިވާ ޖަލުތަކުގައި ހިނގަމުންދާ ހިތާމަވެރި ހާދިސާތަކާ ގުޅިގެން، އެ ސަރވިސްގެ ބެލުމުގެ ދަށުގައި ތިބޭ ގައިދީންނާއި ބަންދު މީހުންގެ ކަންކަން ބަލައި މޮނިޓަރކުރުމުގައި އެ ސަރވިސްއަށް ދިމާވެފައިވާ މުވައްޒަފުންގެ ދަތިކަން ހައްލުކޮށްދިނުމަށް ބޭނުންވާ ބަޖެޓް ހަމަޖައްސަވައިދެއްވުން އެދި ހިޔުމަން ރައިޓްސް ކޮމިޝަން އޮފް ދަ މޯލްޑިވްސް އިން ފޮނުއްވާފައިވާ މައްސަލައާ ގުޅޭގޮތުންނެވެ. މި މައްސަލައާ ގުޅޭގޮތުން، ކެލާ ދާއިރާގެ މެންބަރު ޢަބްދުﷲ ޝަރީފް ހުށަހަޅުއްވައި ފުވައްމުލަކު އުތުރު ދާއިރާގެ މެންބަރު ޙަމަދު ޢަބްދުﷲ ތާއީދު ކުރެއްވީ، މި މައްސަލައަށް 2027 ވަނަ އަހަރަށް ލަފާކުރާ ދައުލަތުގެ ބަޖެޓު ދިރާސާކުރެއްވުމަށް އެކުލަވާލާ ކޮމިޓީއަށް ރިޢާޔަތްކޮށްދެއްވުމަށް އެދި ދެންނެވުމަށެވެ. މި ހުށަހެޅުން ކޮމިޓީއަށް ހާޒިރުވެވަޑައިގެން ވޯޓު ދެއްވި މެންބަރުންގެ އަޣްލަބިއްޔަތުންވަނީ ފާސްވެފައެވެ.

(އެ ހުށަހެޅުއްވުމަށް މެންބަރުން ވޯޓުދެއްވި ގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.)

ދެން ކޮމިޓީގައި މަޝްވަރާކުރެއްވީ، 10 ސެޕްޓެންބަރު 2024 ވަނަ ދުވަހު، ނ. ހޮޅުދޫ ގައި ނިޔާވެފައި އޮއްވައި ފެނުނު ޒަކިއްޔާ މުސާގެ މަރުގެ މައްސަލައިގައި ދިވެހި ފުލުހުންގެ ޚިދުމަތުން ކުރައްވާ ތަޙްޤީޤު ދިގުލައިގެން ގޮސްފައިވާތީއާއި އެކަށީގެންވާ ގޮތެއްގައި އެ މައްސަލަ ތަޙްޤީޤުކުރައްވާފައި ނުވާކަމަށާއި އެކަމުގައި ފުލުހުންގެ އިހުމާލު އޮތްކަމަށާއި، އަދި އެކަމާ ގިނަ ޢަދަދެއްގެ ރައްޔިތުން ކަންބޮޑުވުން ފާޅުކުރަމުންދާކަމަށް ބަޔާންކުރައްވައި ހުށަހަޅުއްވާފައިވާ މައްސަލައެވެ. މި މައްސަލައާ ގުޅޭގޮތުން، ކެލާ ދާއިރާގެ މެންބަރު ޢަބްދުﷲ ޝަރީފް ހުށަހަޅުއްވައި ފުވައްމުލަކު އުތުރު ދާއިރާގެ މެންބަރު ޙަމަދު ޢަބްދުﷲ ތާއީދު ކުރެއްވީ، މި މައްސަލައިގެ ތަޙްޤީޤު މިހާރު ގޮސްފައިވާ ހިސާބު ސާފުކުރެއްވުމަށް ދިވެހި ފުލުހުންގެ ޚިދުމަތައް ސިޓީ ފޮނުވުމަށެވެ. މީގެ އިތުރުން، ފުލުހުން ހިންގާފައިވާ ތަޙްޤީޤުގައި އިހްމާލުއޮތްކަމަށް ފާހަގަކުރައްވައި އެ މައްސަލަ ބައްލަވައިދެއްވުމަށް އެދި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ފޮނުއްވާފައިވާ މައްސަލައާގުޅިގެން ނޭޝަނަލް އިންޓަރގްރިޓީ ކޮމިޝަނަށް ސިޓީ ފޮނުވުމަށްވެސް ނިންމެވިއެވެ. މި ހުށަހެޅުން ކޮމިޓީއަށް ހާޒިރުވެވަޑައިގެން ވޯޓު ދެއްވި މެންބަރުންގެ އިއްތިފާޤުންވަނީ ފާސްވެފައެވެ.

(އެ ހުށަހެޅުއްވުމަށް މެންބަރުން ވޯޓުދެއްވި ގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.)

އެއަށްފަހު، މަސްތުވާތަކެތީގެ ވަބާގައި ޖެހިފައިވާ ފަރާތްތައް ސަލާމަތްކުރުމަށް ކުރެވޭ މަސައްކަތްތަކުގައި ދިމާވާ ދަތިތަކާއި މަސްތުވާތަކެތީގެ މައްސަލަތައް ޙައްލުކުރުމަށް ކުރެވެމުންދާ މަސައްކަތްތަކާގުޅޭ ގޮތުން މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީއިން ކުރައްވަމުން ގެންދަވާ މަސައްކަތްތައް ދެނެގަތުމަށްޓަކައި އެ މިނިސްޓްރީގެ ބޭފުޅުން ކޮމިޓިއަށް ހާޒިރުކޮށްދެއްވުމަށް އެދި ފޮނުއްވާފައިވާ މައްސަލައާ ގުޅޭގޮތުން މަޝްވަރާކުރެއްވިއެވެ. ކެލާ ދާއިރާގެ މެންބަރު ޢަބްދުﷲ ޝަރީފް ހުށަހަޅުއްވައި ފުވައްމުލަކު އުތުރު ދާއިރާގެ މެންބަރު ޙަމަދު ޢަބްދުﷲ ތާއީދު ކުރެއްވީ، މި މައްސަލައާ ގުޅިގެން މިނިސްޓަރުގެ އިތުރުން ކަމާގުޅޭ ބޭފުޅުން ކޮމިޓީއަށް ހާޒިރުކޮށް މަޢުލޫމާތު ސާފުކުރެއްވުމަށެވެ. މި ހުށަހެޅުން ކޮމިޓީއަށް ހާޒިރުވެވަޑައިގެން ވޯޓު ދެއްވި މެންބަރުންގެ އިއްތިފާޤުންވަނީ ފާސްވެފައެވެ.

(އެ ހުށަހެޅުއްވުމަށް މެންބަރުން ވޯޓުދެއްވި ގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.)

އެއަށްފަހު ކޮމިޓީގައި މަޝްވަރާކުރެއްވީ، 18 އޭޕްރީލް 2025 ވަނަ ދުވަހު މާލޭގެ އުސް އިމާރާތަކުން ގެއެއްގެ ފުރާޅުމައްޗަށް އަންހެނަކު ވެއްޓިފައިވާ ހާދިސާއާ ގުޅިގެން ދިވެހި ފުލުހުން ޢަމަލުކޮށްފައިވާ ގޮތުގެ އިންކުއަރީއެއް ކޮމިޓީ މެދުވެރިކޮށް ކުރިއަށް ގެންގޮސްދެއްވުންއެދި ހުށަހަޅުއްވާފައިވާ މައްސަލައާ ގުޅޭގޮތުންނެވެ. އެ ގޮތުން ހިތަދޫ މެދު ދާއިރާގެ މެންބަރު އަޙްމަދު އަޒާން މަރުޒޫޤް ހުށަހެޅުއްވީ މައްސަލަ ތަޙްޤީޤްކުރުމަށްޓަކައި ރައީސުލްޖުމްހޫރިއްޔާ އެކުލަވާލެއްވި ޚާއްޞަ ކޮމިޝަނުން، އެ މައްސަލަ ދިރާސާކޮށް އެ މައްސަލައިގެ ރިޕޯޓު ނިންމަވާފައިވާތީ މައްސަލަ ފައިލު ކުރެއްވުމަށެވެ. މި ހުށަހެޅުއްވުމަށް ކެލާ ދާއިރާގެ މެންބަރު ޢަބްދުﷲ ޝަރީފް ތާއީދުކޮށް، ކޮމިޓީއަށް ހާޒިރުވެވަޑައިގެން ވޯޓު ދެއްވި މެންބަރުންގެ އިއްތިފާޤުންވަނީ ފާސްވެފައެވެ.

(އެ ހުށަހެޅުއްވުމަށް މެންބަރުން ވޯޓުދެއްވި ގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.)

ދެން ކޮމިޓީގައި މަޝްވަރާކުރެއްވީ، މާލެ ސަރަޙައްދުގައި އެކްސިޑެންޓްތައް ގިނަވުމާގުޅޭ މައްސަލައަށް ހައްލެއް ހޯދުމަށްޓަކައި ރައްޔިތުންގެ މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީ އަދި ޖުޑީޝިއަރީ ކޮމިޓީ ގުޅިގެން އަޑުއެހުމެއް ބާއްވަވައިދެއްވުމަށް އެދިވަޑައިގެން ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ހުށަހަޅުއްވާފައިވާ މައްސަލައާ ގުޅޭގޮތުންނެވެ. އެގޮތުން ކެލާ ދާއިރާގެ މެންބަރު ޢަބްދުﷲ ޝަރީފް ހުށަހަޅުއްވައި ފުވައްމުލަކު އުތުރު ދާއިރާގެ މެންބަރު ޙަމަދު ޢަބްދުﷲ ތާއީދުކުރެއްވީ، މި މައްސަލައަކީ ރައްޔިތުންގެ މަޖިލީހުގެ ޖުޑީޝިއަރީ ކޮމިޓީން ދިރާސާކުރައްވަމުން ގެންދަވާ މައްސަލައެއްކަމަށާއި، އަދި ޤާނޫނު ނަންބަރު 2026/16 (އެއްގަމު ދަތުރުފަތުރުގެ ޤާނޫނު) ގައި ހުރި ކަންކަމަށް ރިޢާޔަތްކުރާއިރު، މައްސަލައިގައި ފާހަގަކުރައްވާފައިވާ ކަންކަމަށް ހައްލު ލިބޭކަމަށް ފެނިވަޑައިގަންނަވާތީ، އެކަން މައްސަލަ ހުށަހެޅުއްވި ފަރާތައް ދެންނެވުމަށެވެ. މި ހުށަހެޅުން ކޮމިޓީއަށް ހާޒިރުވެވަޑައިގެން ވޯޓު ދެއްވި މެންބަރުންގެ އިއްތިފާޤުންވަނީ ފާސްވެފައެވެ.

(އެ ހުށަހެޅުއްވުމަށް މެންބަރުން ވޯޓުދެއްވި ގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.)

މީގެ އިތުރުން، ޤާނޫނު ނަންބަރު 2013/12 (މީހުން ޓްރެފިކްކުރުން ހުއްޓުވުމުގެ ޤާނޫނު) ގެ 65 ވަނަ މާއްދާގެ ދަށުން ރައްޔިތުންގެ މަޖިލީހަށް ހުށަހަޅާފައިވާ ރިޕޯޓާމެދު ކޮމިޓީގައި މަޝްވަރާކުރެއްވިއެވެ. އަދި ކެލާ ދާއިރާގެ މެންބަރު ޢަބްދުﷲ ޝަރީފް ހުށަހަޅުއްވައި ފުވައްމުލަކު އުތުރު ދާއިރާގެ މެންބަރު ޙަމަދު ޢަބްދުﷲ ތާއީދު ކުރެއްވީ، މި ރިޕޯޓާގުޅޭ މަޢުލޫމާތު ސާފުކުރެއްވުމަށް މިނިސްޓްރީ އޮފް ހޯމްލޭންޑް ސެކިއުރިޓީ، ލޭބަރ އެންޑް ޓެކްނޯލޮޖީގެ ކަމާގުޅޭ ބޭފުޅުންނާ ބައްދަލުކުރެއްވުމަށާއި މި އަހަރުގެ ރިޕޯޓު ކަނޑައެޅިފައިވާ މުއްދަތުގައި ހުށަހަޅުއްވާފައިނުވާ ސަބަބު ސާފުކުރެއްވުމަށް މިނިސްޓްރީއަށް ދެންނެވުމަށެވެ. މި ހުށަހެޅުން ކޮމިޓީއަށް ހާޒިރުވެވަޑައިގެން ވޯޓު ދެއްވި މެންބަރުންގެ އިއްތިފާޤުންވަނީ ފާސްވެފައެވެ.

(އެ ހުށަހެޅުއްވުމަށް މެންބަރުން ވޯޓުދެއްވި ގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.)



އެއަށްފަހު ކޮމިޓީގައި މަޝްވަރާކުރެއްވީ، ހިއުމަން ރައިޓްސް ކޮމިޝަން އޮފް ދަ މޯލްޑިވްސް އިން ށ. ފުނަދޫ ޕޮލިސް ސްޓޭޝަނަށް ކުރި މޮނިޓަރިންގ ޒިޔާރަތުގެ ރިޕޯޓުގައި ފާހަގަކުރައްވާފައިވާ ކަންކަމާގުޅޭ ގޮތުންނެވެ. އެގޮތުން ކެލާ ދާއިރާގެ މެންބަރު ޢަބްދުﷲ ޝަރީފް ހުށަހަޅުއްވައި ކާށިދޫ ދާއިރާގެ މެންބަރު މުންތަޡިމް އިބްރާހީމް ތާއީދު ކުރެއްވީ، މި ރިޕޯޓުގައި، އިޞްލާޙުކުރުމަށް ހުށަހަޅުއްވާފައިވާ ކަންކަމާ ގުޅިގެން މިހާތަނަށް އަޅުއްވާފައިވާ ފިޔަވަޅުތަކަކީ ކޮބައިތޯ ސާފުކުރެއްވުމަށާއި އެ ކަންކަން ހައްލުކުރެވިފައި ނުވާނަމަ، ހައްލުނުވެއޮތް ސަބަބު ސާފުކުރެއްވުމަށް ދިވެހި ފުލުހުންގެ ޚިދުމަތައް ސިޓީ ފޮނުވުމަށެވެ. މި ހުށަހެޅުން ކޮމިޓީއަށް ހާޒިރުވެވަޑައިގެން ވޯޓު ދެއްވި މެންބަރުންގެ އިއްތިފާޤުންވަނީ ފާސްވެފައެވެ.

(އެ ހުށަހެޅުއްވުމަށް މެންބަރުން ވޯޓުދެއްވި ގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.)

އެންމެފަހު ކަމެއްގެ ގޮތުގައި ކޮމިޓީން މަޝްވަރާކުރެއްވީ، މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ރާއްޖެއަށް ކުރިމަތިވެދާނެ ކުއްލި ހާލަތްތަކަށް ތައްޔާރުވުމާ ގުޅޭގޮތުން، ރައްޔިތުންގެ މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީ ގެ ބައްދަލުވުމެއް ބާއްވައިދިނުމަށް ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ފޮނުއްވާފައިވާ މައްސަލައާ ގުޅޭގޮތުންނެވެ. އަދި ކެލާ ދާއިރާގެ މެންބަރު ޢަބްދުﷲ ޝަރީފް ހުށަހަޅުއްވައި ފުވައްމުލަކު އުތުރު ދާއިރާގެ މެންބަރު ޙަމަދު ޢަބްދުﷲ ތާއީދު ކުރެއްވީ، މި މައްސަލައާ ގުޅިގެން އެދިވަޑައިގެންފައިވާ ކަންކަން ހައްލުކުރެއްވުމަށް އަޅުއްވަންޖެހޭ ފިޔަވަޅުތައް އެޅުއްވުމަށް ސަރުކާރުން މަސައްކަތްކުރައްވާކަން ދެންނެވުމަށެވެ. މި ހުށަހެޅުން ކޮމިޓީއަށް ހާޒިރުވެވަޑައިގެން ވޯޓު ދެއްވި މެންބަރުންގެ އިއްތިފާޤުންވަނީ ފާސްވެފައެވެ.

(އެ ހުށަހެޅުއްވުމަށް މެންބަރުން ވޯޓުދެއްވި ގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.)