މިއަދުގެ ބައްދަލުވުމުގައި، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 102 ވަނަ މާއްދާގެ ދަށުން ރައްޔިތުންގެ މަޖިލީހުން ކަނޑައަޅަންޖެހޭ މުސާރައާއި ޢިނާޔަތްތަކުގެ ތެރެއިން ރައްޔިތުންގެ މަޖިލީހުގެ ރައީސްއާއި، ވަޒީރުންގެ މަޖިލީހުގެ މެންބަރުންނަށް ލިބިދެވޭ ކާރުކޮޅުތަކުގެ ޢިނާޔަތްތަކާއި، އަދި ރަށު ކައުންސިލަރުންގެ ޢިނާޔަތްތައް މުރާޖަޢާކުރުމުގެ މަސައްކަތް ކުރުމަށް ކެލާ ދާއިރާގެ މެންބަރު ޢަބްދުﷲ ޝަރީފް ހުށަހަޅުއްވައި، ފުނަދޫ ދާއިރާގެ މެންބަރު މުޙައްމަދު މަމްދޫޙް ތާޢީދުކުރެއްވިއެވެ. މި ހުށަހެޅުން ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އަޣްލަބިއްޔަތުން ފާސްވިއެވެ.

އެގޮތުން، ތިރީގައިވާ ގޮތަށް އެ ފަރާތްތަކުގެ މުސާރަ މުރާޖަޢާކުރަން ފެންނަކަމަށް ފުނަދޫ ދާއިރާގެ މެންބަރު މުޙައްމަދު މަމްދޫޙް ހުށަހަޅުއްވައި، ފުވައްމުލަކު އުތުރު ދާއިރާގެ މެންބަރު ޙަމަދު ޢަބްދުﷲ ތާޢީދުކުރެއްވިއެވެ. މި ހުށަހެޅުން ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އަޣްލަބިއްޔަތުން ފާސްވިއެވެ.

1. ރައްޔިތުންގެ މަޖިލީހުގެ ރައީސްއަށް މިހާރު ލިބެމުންދާ މުސާރައަކީ، ރައްޔިތުންގެ މަޖިލީހުގެ ނައިބު ރައީސްއާއި، މަޖިލީހުގެ މެންބަރުންނަށްވުރެ ކުޑަ މުސާރައެއްކަމުން، ޚާއްޞަ އެލަވަންސްގެ ގޮތުގައި ރައްޔިތުންގެ މަޖިލީހުގެ ރައީސްއަށް 22,000 (ބާވީސްހާސް) ރުފިޔާ ކަނޑައަޅައި، މުސާރައާއި ޢިނާޔަތުގެ ގޮތުގައި ޖުމްލަ 95,125 (ނުވަދިހަފަސްހާސް އެއްސަތޭކަފަންސަވީސް) ރުފިޔާ ކަނޑައެޅުމަށް.
2. ވަޒީރުންގެ މަޖިލީހުގެ މެންބަރުންނަށް މިހާރު ލިބެމުންދާ މުސާރައަކީ، ކޯޓުތަކުގެ އިސްފަނޑިޔާރުންނާއި، ފަނޑިޔާރުންނާއި، އިސްޤާޟީންނާއި ޤާޟީންނާއި، މިނިވަން މުސްތަޤިއްލު ކޮމިޝަންތަކުގެ ރައީސުންނަށް ލިބެމުންދާ މުސާރައަށްވުރެ ކުޑަ މުސާރައެއްކަމުން، ވަޒީރުންގެ މަޖިލީހުގެ މެންބަރުންނަށް މިހާރު ކާރުކޮޅުތަކުގެ ޢިނާޔަތްތަކުގެ ގޮތުގައި ލިބެމުންދާ ޖުމްލަ 7,500 (ހަތްހާސްފަސްސަތޭކަ) ރުފިޔާ ޖުމްލަ 17,000 (ސަތާރަހާސް) ރުފިޔާއަށް އިތުރުކުރުމަށް.
3. ލާމަރުކަޒީ އުސޫލުން އިންތިޚާބުކޮށްފައިވާ ސިޓީ ކައުންސިލަރުންނާއި، ރަށު ކައުންސިލަރުންގެ މުސާރައަށް ބަލާއިރު، އެ މުސާރަތަކުގައި ނިސްބަތުން ބޮޑު ފަރަޤެއް ހުރިކަން ފާހަގަކޮށް، ރަށު ކައުންސިލްގެ މެންބަރުންނަށް މިހާރު ލިބެމުންދާ މުސާރައާއި ޢިނާޔަތުގެ އިތުރުން، ސަރވިސް އެލަވަންސްގެ ގޮތުގައި 5,000 (ފަސްހާސް) ރުފިޔާ އިތުރު ކުރުމަށް.

ދެން، މޯލްޑިވްސް ކަރެކްޝަނަލް ސަރވިސްގެ ޕްރިޒަން ކޯޕަރޭޓިވް ސޮސައިޓީގެ ތެރޭގައި އިންތިހާއަށް ކޮރަޕްޝަންގެ ޢަމަލުތައް ހިންގަމުންދާކަމަށް ބަޔާންކޮށް އަމިއްލަ ފަރާތަކުން ހުށަހަޅާފައިވާ މައްސަލަ ދިރާސާކުރެއްވިއެވެ. އެގޮތުން، އެ މައްސަލައަކީ ސަލާމަތީ ޚިދުމަތްތަކާބެހޭ ކޮމިޓީގެ ދާއިރާގައި ހިމެނޭ މައްސަލައެއްކަމަށާއި، އެ މައްސަލަ އެ ކޮމިޓީއަށް ފޮނުވުމަށް ފެންނަކަމަށް ފުނަދޫ ދާއިރާގެ މެންބަރު މުޙައްމަދު މަމްދޫޙް ހުށަހަޅުއްވައި، ފުވައްމުލަކު އުތުރު ދާއިރާގެ މެންބަރު ޙަމަދު ޢަބްދުﷲ ތާޢީދުކުރެއްވިއެވެ. މި ހުށަހެޅުން ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އަޣްލަބިއްޔަތުން ފާސްވިއެވެ.

އަދި، އައިލޭންޑް އޭވިއޭޝަން ސަރވިސަސް ލިމިޓެޑްގެ ގްރޮސް މާޖިން އަހަރުން އަހަރަށް ދަށްވަމުންދާކަމަށް އެ ކުންފުނީގެ ކުއަރޓާލީ މާލީ ރިޕޯޓުތަކުން ފާހަގަކުރެވޭތީ، އެކަމާގުޅޭ މަޢުލޫމާތު އެ ކުންފުނިން ސާފުކޮށްދެއްވުމަށް އެދި މާވަށު ދާއިރާގެ މެންބަރު އަޙްމަދު ޝާކިރު ފޮނުވާފައިވާ މައްސަލައާ ގުޅޭގޮތުން މަޝްވަރާކުރުމަށްފަހު، މައްސަލައާގުޅޭ މަޢުލޫމާތު އެ ކުންފުނިން ސާފުކުރެއްވުމަށް ނިންމެވިއެވެ.

އެއަށްފަހު، ޤާނޫނު ނަންބަރު 2011/10 (މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނު) އަށް ގެނެވުނު 8 ވަނަ އިޞްލާޙާ ގުޅޭގޮތުން ހުރި ކަންބޮޑުވުންތައް ފާހަގަކޮށް، އެ ކަންކަން ކޮމިޓީން ބައްލަވައިދެއްވުމަށް އެދި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ހުށަހަޅާފައިވާ މައްސަލައާ ގުޅޭގޮތުން މަޝްވަރާކުރުމަށްފަހު، އެ ޤާނޫނަށް މިވަގުތު ހުށަހަޅާފައިވާ އިޞްލާޙު ރައްޔިތުންގެ މަޖިލީހުން ދިރާސާކޮށް ފާސްވުމުން، ހުށަހަޅާފައިވާ ކަންބޮޑުވުންތަކަށް ހައްލެއް ލިބިގެންދާނެކަމަށް އެ މެންބަރަށް ޖަވާބު ދިނުމަށް ފުނަދޫ ދާއިރާގެ މެންބަރު މުޙައްމަދު މަމްދޫޙް ހުށަހަޅުއްވައި، ފުވައްމުލަކު އުތުރު ދާއިރާގެ މެންބަރު ޙަމަދު ޢަބްދުﷲ ތާޢީދުކުރެއްވިއެވެ. މި ހުށަހެޅުން ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން ފާސްވިއެވެ.

އަދި، ޝަރުޢީ ދާއިރާގެ މުވައްޒަފުންގެ މުސާރައަށް ގެނެވުނު ބަދަލާ ގުޅިގެން ހުރި ކަންބޮޑުވުންތައް ހިއްސާކޮށް ދިވެހި ފަނޑިޔާރުންގެ ޖަމްޢިއްޔާއިން ފޮނުވާފައިވާ މައްސަލައާއި، ދައުލަތުގެ ޕޭ ޕްރޭމްވަރކްގެ ޖޮބް މެޓްރިކްސްތަކާ ގުޅޭގޮތުން ނޭޝަނަލް ޑްރަގް އޭޖެންސީގެ މުވައްޒަފުންގެ ހުރި ކަންބޮޑުވުންތައް ބަޔާންކޮށް އެ އެޖެންސީން ފޮނުވާފައިވާ މައްސަލަ އަދި ފެމިލީ ޕްރޮޓެކްޝަން އޮތޯރިޓީގެ މުސާރައިގެ އޮނިގަނޑުގައި ހުރި މައްސަލަތައް ބަޔާންކޮށް އެ އޮތޯރިޓީން ނޭޝަނަލް ޕޭ ކޮމިޝަނަށް ފޮނުވައި، ރައްޔިތުންގެ މަޖިލީހުގެ އިދާރާއަށް ކޮޕީކޮށްފައިވާ ސިޓީއާ ގުޅޭގޮތުން މަޝްވަރާކުރެއްވިއެވެ. އެގޮތުން، ދައުލަތުގެ ގިނަ އިދާރާތަކެއްގެ މުސާރައާ ގުޅޭ ކަންބޮޑުވުންތައް ހުރުމުން، މައްސަލަ ހުށަހަޅާފައިވާ އިދާރާތަކާއެކު ނޭޝަނަލް ޕޭ ކޮމިޝަންގެ ބޭފުޅުންނާ ބައްދަލުކުރުމަށް ހުޅުމާލެ ދެކުނު ދާއިރާގެ މެންބަރު ޑޮކްޓަރ އަޙްމަދު ޝަމްހީދު ހުށަހަޅުއްވައި، ހަނިމާދޫ ދާއިރާގެ މެންބަރު ޢަބްދުޣަފޫރު މޫސާ ތާޢީދުކުރެއްވިއެވެ. މި ހުށަހެޅުން ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން ފާސްވިއެވެ.

އެއަށްފަހު، ޗިލްޑްރަންސް އޮމްބަޑްސްޕަރސަންގެ އޮފީހަށް 2027 ވަނަ އަހަރަށް ކަނޑައަޅާފައިވާ ބަޖެޓާ ގުޅޭގޮތުން ހުރި ކަންބޮޑުވުންތައް ބަޔާންކޮށް ހުށަހަޅާފައިވާ މައްސަލައާ ގުޅޭގޮތުން މަޝްވަރާކުރެއްވިއެވެ. އެގޮތުން، 2027 ވަނަ އަހަރަށް ލަފާކުރާ ދައުލަތުގެ ބަޖެޓު ދިރާސާކުރުމުގެ މަސައްކަތް ބަޖެޓު ދިރާސާކުރާ ކޮމިޓީން ކުރިއަށްގެންދަވާއިރު އެ އޮފީހުގެ ކަންބޮޑުވުންތަކަށް ރިޢާޔަތްކުރުމަށާއި، އެކަން އެ އޮފީހުގެ މަޢުލޫމާތަށް ދެންނެވުމަށް ފުނަދޫ ދާއިރާގެ މެންބަރު މުޙައްމަދު މަމްދޫޙް ހުށަހަޅުއްވައި، ފުވައްމުލަކު އުތުރު ދާއިރާގެ މެންބަރު ޙަމަދު ޢަބްދުﷲ ތާޢީދުކުރެއްވިއެވެ. މި ހުށަހެޅުން ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން ފާސްވިއެވެ.

އެއަށްފަހު ތިރީގައިވާ ސިޓީތައް ކޮމިޓީގެ މެންބަރުންނާ ހިއްސާކުރެއްވިއެވެ.

1. 2026 ވަނަ އަހަރަށް ޗިލްޑްރަންސް އޮމްބަޑްސްޕަރސަންގެ އޮފީހަށް ދެއްވާފައިވާ ބަޖެޓަކީ އޮފީހުގެ މެންޑޭޓްގެ ދަށުން މަސައްކަތްތައް ރާވައި ތަންފީޒުކުރުމަށް އެކަށީގެންވާ ބަޖެޓެއް ނޫންކަމަށް ފާހަގަކޮށް، އެ އޮފީހުން މިނިސްޓްރީ އޮފް ފިނޭންސް އެންޑް ޕްލޭނިންގއަށް ފޮނުވައި، ރައްޔިތުންގެ މަޖިލީހުގެ އިދާރާއަށް ކޮޕީކޮށްފައިވާ ސިޓީ.
2. ފެމިލީ ޕްރޮޓެކްޝަން އޮތޯރިޓީއިން 2026 ވަނަ އަހަރަށް ހުށަހަޅާފައިވާ ބަޖެޓުން 2.1 މިލިއަން ރުފިޔާ އުނިކުރުމަށްފަހު ބަޖެޓު ފާސްކޮށްފައިވާތީ، އެ އޮތޯރިޓީގެ މެންޑޭޓްގެ ދަށުން ކުރަންޖެހޭ މަސައްކަތްތައް ކުރުމުގައި ދަތިވާކަމަށާއި، އެހެންކަމުން އެ އޮތޯރިޓީއަށް ބަޖެޓު އިތުރުކޮށްދިނުމަށް އެދި މިނިސްޓްރީ އޮފް ފިނޭންސް އެންޑް ޕްލޭނިންގއަށް ފޮނުވައި، ރައްޔިތުންގެ މަޖިލީހުގެ އިދާރާއަށް ކޮޕީކޮށްފައިވާ ސިޓީ.
3. އޮޑިޓަރ ޖެނެރަލްގެ އޮފީހުގެ 2025 ވަނަ އަހަރުގެ މާލީ އޮޑިޓް ރިޕޯޓު، މެނޭޖްމަންޓް ލެޓަރ އަދި ޕަރފޯމަންސް އޮޑިޓް ރިޕޯޓުގައި ފާހަގަކޮށްފައިވާ ކަންކަމާގުޅޭގޮތުން އެ އޮފީހުން ފޮނުވާފައިވާ ކޮމެންޓްތައް.

އޭގެ އިތުރުން، އޮޑިޓަރ ޖެނެރަލްގެ އޮފީހުގެ 2026 ވަނަ އަހަރުގެ ފުރަތަމަ ކުއަރޓަރގައި ކުރެވުނު މަސައްކަތްތަކާއި އޮފީސް ހިނގަމުންދާ ގޮތުގެ ރިޕޯޓާ ގުޅޭގޮތުން މަޝްވަރާކުރުމަށްފަހު، މި ރިޕޯޓް ދިރާސާކުރުމަށް މެންބަރުންނަށް އިތުރު ވަގުތު ދިނުމަށްފަހު އެހެން ބައްދަލުވުމެއްގައި އެޖެންޑާކުރުމަށް ނިންމެވިއެވެ.

މި ބައްދަލުވުމުގައި ހުށަހެޅުނު ހުށަހެޅުއްވުންތަކަށް މެންބަރުން ވޯޓު ދެއްވިގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.