މިއަދުގެ ބައްދަލުވުމުގައި ފުރަތަމަ ކުރިއަށް ގެންދެވީ "ކުށް ކޮށްގެން ހޯދާ މުދަލާގުޅޭ ބިލު" އަދި "ޤާނޫނު ނަންބަރު 2016/12 (ޖިނާއީ އިޖުރާއަތުގެ ޤާނޫނު) އަށް އިޞްލާޙު ގެނައުމުގެ ބިލުގެ ސުންގަޑި ކަޑައަޅައި، އެ ބިލު ތަކުގެ މަސައްކަތް ކުރިއަށް ގެންދާނެ ގޮތާމެދު މަޝްވަރާ ކުރެއްވުމެވެ. އެގޮތުން، ފުނަދޫ ދާއިރާގެ މެންބަރު މުހައްމަދު މަމްދޫޙް ހުށަހަޅުއްވާ ފަރެސްމާތޮޑާ ދާއިރާގެ މެންބަރު އަޝްރަފް ރަޝީދު ތާއީދު ކުރެއްވީ މި 2 ބިލު ނިންމާނެ ސުންގަޑިއެއްގެ ގޮތުގައި 28 ފެބުރުވަރީ 2027 ހަމަޖެއްސުމަށާއި، ޢާންމުންގެ ޚިޔާލު ހޯދުމަށް 30 ނޮވެންބަރު 2026 ގެ ނިޔަލަށް އިޢުލާންކުރެއްވުމަށާއި، 31 ޑިސެންބަރު 2026 ގެ ނިޔަލަށް ކަމާގުޅޭ އިދާރާތަކަށް ކޮމެންޓް ހޯއްދެއްވުމަށް ފޮނުއްވުމަށެވެ. 

ދެވަނަ ހުށަހެޅުމެއްގެ ގޮތުގައި، މި 2 ބިލުގެ މަސައްކަތް ކޮމިޓީގައި ދިރާސާކުރަމުންދާއިރު، ކަމާގުޅުންހުރި އިދާރާތަކުގެ ބޭފުޅުންނާއި ބައްދަލުކުރައްވާ ބިލާ ގުޅޭގޮތުން އެ ބޭފުޅުން ފާހަގަކުރައްވަން ބޭނުންފުޅުވާ ކަންކަން ކޮމިޓީއާ ޙިއްޞާކުރެވޭނެ ގޮތް ހަމަޖައްސައިދިނުމަށް ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ހުށަހަޅުއްވައި ވިލުފުށި ދާއިރާގެ މެންބަރު ޙަސަން ވަޙީދު ތާއީދު ކުރެއްވިއެވެ.

މި ހުށަހެޅުމަށް މެންބަރުން ވޯޓުދެއްވި ގޮތުގެ ތަފްޞީލް "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.

ދެން މިއަދުގެ ބައްދަލުވުމުގައި ކުރިއަށް ގެންދެވީ ކޮމިޓީގައި ނުނިމިހުރި ބިލުތަކުގެ ސުންގަޑި ހަމަވެފައިވާތީ، އެ ބިލުތަކުގެ ސުންގަޑި ކަނޑައެޅުއްވުމުގެ މަސައްކަތެވެ. އެގޮތުން ސުންގަޑިއެއްގެ ގޮތުގައި ކޮމިޓީގެ އިއްތިފާޤުން ނިންމަވާފައިވަނީ 30 ނޮވެންބަރު 2026 އެވެ. މިގޮތަށް ހުށަހަޅުއްވާފައިވަނީ ފުނަދޫ ދާއިރާގެ މެންބަރު މުޙައްމަދު މަމްދޫޙް އަދި ތާއީދުކުރައްވާފައިވަނީ ފަރެސްމާތޮޑާ ދާއިރާގެ މެންބަރު އަޝްރަފް ރަޝީދު އެވެ.

ސުންގަޑި އިތުރު ކުރެއްވުމަށް ކޮމިޓީން ނިންމަވާފައިވާ ބިލުތަކަކީ،

1.     ސަރުކާރުގެ ފަރާތުން މާފުށި ދާއިރާގެ މެންބަރު ޙުސައިން ރިޟާ އާދަމް ހުށަހަޅުއްވާފައިވާ ޤާނޫނު ނަންބަރު 2014/9 (ދިވެހިރާއްޖޭގެ ޤާނޫނުލްޢުޤޫބާތު) އަށް އިޞްލާޙު ގެނައުމުގެ ބިލު

2.     ހޮޅުދޫ ދާއިރާގެ މެންބަރު ޢަބްދުއްސައްތާރު މުޙައްމަދު ހުށަހަޅުއްވާފައިވާ ޤާނޫނު ނަންބަރު 2010/22 (ދިވެހިރާއްޖޭގެ ކޯޓުތަކުގެ ޤާނޫނު) އަށް އިޞްލާޙު ގެނައުމުގެ ބިލު

3.     ގަލޮޅު ދެކުނު ދާއިރާގެ މެންބަރު މީކާއީލު އަޙްމަދު ނަސީމް ހުށަހަޅުއްވާފައިވާ ޤާނޫނު ނަންބަރު 2014/9 (ދިވެހިރާއްޖޭގެ ޤާނޫނުލްޢުޤޫބާތު) އަށް އިޞްލާޙު ގެނައުމުގެ ބިލު

4.     ސަރުކާރުގެ ފަރާތުން، ބިލެތްދޫ ދާއިރާގެ މެންބަރު އަޙްމަދު އަސްލަމް ހުށަހަޅުއްވާފައިވާ ޤާނޫނު ނަންބަރު 2022/11 (ހެއްކާބެހޭ ޤާނޫނު) އަށް އިޞްލާޙު ގެނައުމުގެ ބިލު

5.     ސަރުކާރުގެ ފަރާތުން، ހިތަދޫ މެދު ދާއިރާގެ މެންބަރު އަޙްމަދު އަޒާން މަރުޒޫޤު ހުށަހަޅުއްވާފައިވާ ޤާނޫނު ނަންބަރު 2014/9 (ދިވެހިރާއްޖޭގެ ޤާނޫނުލްޢުޤޫބާތު) އަށް އިޞްލާޙު ގެނައުމުގެ ބިލު)

މި ހުށަހެޅުމަށް މެންބަރުން ވޯޓުދެއްވި ގޮތުގެ ތަފްޞީލް "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.

އެއަށްފަހު، މިއަދުގެ ބައްދަލުވުމުގައި ކުރިއަށް ގެންދެވީ ޤާނޫނު ނަންބަރު 2008/10 (ޖުޑީޝަލް ސަރވިސް ކޮމިޝަނުގެ ޤާނޫނު) 33 ވަނަ މާއްދާގެ (ހ) ގައިވާ ގޮތުގެމަތިން ޖުޑީޝަލް ސަރވިސް ކޮމިޝަނުން ފޮނުއްވާފައިވާ ބައެއް ރިޕޯޓުތައް ދިރާސާކުރުމުގެ މަސައްކަތެވެ. ޙަވާލާދީފައިވާ މާއްދާގެ ދަށުން އެ ކޮމިޝަނުން ފޮނުއްވާ ރިޕޯޓުތައް ދިރާސާކުރުމުގައި ކޮމިޓީގެ މަސްއޫލިއްޔަތަކީ، މައްސަލަތައް ތަޙްޤީޤުކުރެއްވުމުގައި ފުރިހަމަކުރުމަށް އެ ޤާނޫނުގައި ކަނޑައަޅާފައިވާ އިޖުރާއަތުތައް ފުރިހަމަކޮށްފައިވޭތޯ ބެލުމެވެ. އެގޮތުން، ކޮމިޓީން ތިރީގައިވާ ރިޕޯޓުތައް ދިރާސާކުރައްވާފައިވެއެވެ.

1. ޖުޑީޝަލް ސަރވިސް ކޮމިޝަނުގެ ނަންބަރު 12/2022 މައްސަލަ ތަޙްޤީޤުކުރުމަށްފަހު އެ ކޮމިޝަނުގެ ތަޙްޤީޤު ކޮމިޓީން އެކުލަވާލާފައިވާ ނަންބަރު D-TC178-3/TC10/2024/2 ތަޙްޤީޤު ކޮމިޓީގެ ނިންމުން؛

2. ޖުޑީޝަލް ސަރވިސް ކޮމިޝަނުގެ ނަންބަރު 13/2023 މައްސަލަ ތަޙްޤީޤުކުރުމަށްފަހު އެ ކޮމިޝަނުގެ ތަޙްޤީޤު ކޮމިޓީން އެކުލަވާލާފައިވާ ނަންބަރު D-TC200/TF10/2024/4 ތަޙްޤީޤު ކޮމިޓީގެ ނިންމުން؛

3. ޖުޑީޝަލް ސަރވިސް ކޮމިޝަނުގެ ނަންބަރު JSC/2024/3/11 މައްސަލަ ތަޙްޤީޤުކުރުމަށްފަހު އެ ކޮމިޝަނުގެ ތަޙްޤީޤު ކޮމިޓީން އެކުލަވާލާފައިވާ ނަންބަރު D-TC217/CN/2024/10 ތަޙްޤީޤު ކޮމިޓީގެ ނިންމުން؛

4. ޖުޑީޝަލް ސަރވިސް ކޮމިޝަނުގެ ނަންބަރު JSC/2025/5/11 މައްސަލަ ތަޙްޤީޤުކުރުމަށްފަހު އެ ކޮމިޝަނުގެ ތަޙްޤީޤު ކޮމިޓީން އެކުލަވާލާފައިވާ ނަންބަރު D-TC259/CN/2026/02 ތަޙްޤީޤު ކޮމިޓީގެ ނިންމުން؛

5. ޖުޑީޝަލް ސަރވިސް ކޮމިޝަނުގެ ނަންބަރު JSC/2025/1/17 މައްސަލަ ތަޙްޤީޤުކުރުމަށްފަހު އެ ކޮމިޝަނުގެ ތަޙްޤީޤު ކޮމިޓީން އެކުލަވާލާފައިވާ ނަންބަރު D-TC239/CN/2025/7 ތަޙްޤީޤު ކޮމިޓީގެ ނިންމުން؛

6. ޖުޑީޝަލް ސަރވިސް ކޮމިޝަނުގެ ނަންބަރު JSC/2025/3/1 މައްސަލަ ތަޙްޤީޤުކުރުމަށްފަހު އެ ކޮމިޝަނުގެ ތަޙްޤީޤު ކޮމިޓީން އެކުލަވާލާފައިވާ ނަންބަރު D-TC241/CN/2025/8 ތަޙްޤީޤު ކޮމިޓީގެ ނިންމުން؛

7. ޖުޑީޝަލް ސަރވިސް ކޮމިޝަނުގެ ނަންބަރު JSC/2025/7/2 މައްސަލަ ތަޙްޤީޤުކުރުމަށްފަހު އެ ކޮމިޝަނުގެ ތަޙްޤީޤު ކޮމިޓީން އެކުލަވާލާފައިވާ ނަންބަރު D-TC248/CN/2026/4 ތަޙްޤީޤު ކޮމިޓީގެ ނިންމުން.

އަދި އެ ރިޕޯޓުތަކުގެ ތެރެއިން ނަންބަރު D-TC178-3/TC10/2024/2 ރިޕޯޓުގައިވާ މައްސަލަ ފިޔަވައި އެހެން ރިޕޯޓުގައިވާ މައްސަލަތަކަކީ ޖުޑީޝަލް ސަރވިސް ކޮމިޝަނުގެ ތަޙްޤީޤު ކޮމިޓީން ނިންމަވާފައިވާ ގޮތަށް، އެ ކޮމިޝަނުން އިތުރަށް ތަޙްޤީޤު ކުރިއަށް ގެންދަން ނުފެންނަ ރިޕޯޓުތަކެއްކަމަށް ނިންމަވާފައިވާތީއާއި، އެރިޕޯޓުތަކުގައިގައިވާ މައްސަލަ ތަޙްޤީޤުކުރުމުގައި ފުރިހަމަކުރަންޖެހޭ އިޖުރާއަތުތައް ފުރިހަމަކޮށްފައިވާ ރިޕޯޓްތަކެއް ކަމަށްވާތީ، މި ރިޕޯޓުތައް ފައިލްކުރެއްވުމާމެދު ކޮމިޓީގައި މަޝްވަރާކުރެއްވިއެވެ. އެގޮތުން، މި ރިޕޯޓުތައް ފައިލްކުރެއްވުމަށް ފެނިވަޑައިގަންނަވާކަމަށް ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ހުށަހެޅުއްވުމުން، އެ ހުށަހެޅުއްވުމަށް ފުނަދޫ ދާއިރާގެ މެންބަރު މުޙައްމަދު މަމްދޫޙް ތާޢީދުކުރައްވާފައިވެއެވެ. އެގޮތުން، މި ބައްދަލުވުމަށް ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން އެ ރިޕޯޓުތައް ފައިލްކުރެއްވުމަށް ނިންމަވާފައިވެއެވެ. އަދި އެ ރިޕޯޓުތަކުގެ ތެރެއިން ނަންބަރު D-TC178-3/TC10/2024/2 ރިޕޯޓުގައިވާ މައްސަލައިގެ ބައެއް މައުލޫމާތުތައް ޖުޑީޝަލް ސަރވިސް ކޮމިޝަނުން ފޮނުވާފައިވާ ރިޕޯޓުގައި ހިމެނިފައިނުވާތީ، އެ މައުލޫމާތު ޖުޑީޝަލް ސަރވިސް ކޮމިޝަނުން ހޯއްދެވުމަށްފަހު މި ރިޕޯޓާމެދު ގޮތެއް ނިންމުމަށް ކޮމިޓީން ނިންމެވިއެވެ.