މިއަދުގެ ބައްދަލުވުމުގައި، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 102 ވަނަ މާއްދާގެ ދަށުން ރައްޔިތުންގެ މަޖިލީހުން ކަނޑައަޅަންޖެހޭ މުސާރައާއި ޢިނާޔަތްތަކުގެ ތެރެއިން އުއްތަމަފަނޑިޔާރަށް ލިބިދެވޭ މުސާރައާއި ޢިނާޔަތްތައް މުރާޖަޢާކުރުމަށް ފުނަދޫ ދާއިރާގެ މެންބަރު މުޙައްމަދު މަމްދޫޙް ހުށަހަޅުއްވައި، ކެލާ ދާއިރާގެ މެންބަރު ޢަބްދުﷲ ޝަރީފް ތާޢީދުކުރެއްވިއެވެ. މި ހުށަހެޅުން ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން ފާސްވިއެވެ.

އެއަށްފަހު، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 102 ވަނަ މާއްދާގެ ދަށުން ރައްޔިތުންގެ މަޖިލީހުން ކަނޑައަޅަންޖެހޭ މުސާރައާއި ޢިނާޔަތްތަކުގެ ތެރެއިން އުއްތަމަފަނޑިޔާރަށް ލިބިދެވޭ މުސާރައާއި ޢިނާޔަތްތައް މުރާޖަޢާކުރުމުގެ މަސައްކަތް ކުރިއަށް ގެންދެވިއެވެ. އެގޮތުން، ރައްޔިތުންގެ މަޖިލީހުގެ ރައީސްގެ މުސާރައާއި ޢިނާޔަތްތަކާ އެއްވަރުގެ މުސާރައެއް އުއްތަމަފަނޑިޔާރަށް ލިބޭނެގޮތް ހަމަޖެއްސުމުގެ ގޮތުން، އުއްތަމަފަނޑިޔާރަށް ލިބިދެވޭ ޢިނާޔަތްތައް މުރާޖަޢާކޮށް، ޚާއްޞަ އެލަވަންސެއްގެ ގޮތުގައި 4,125 (ހަތަރުހާސް އެއްސަތޭކަފަންސަވީސް) ރުފިޔާ ކަނޑައަޅައި، މުސާރައާއި ޢިނާޔަތްތަކުގެ ގޮތުގައި އުއްތަމަފަނޑިޔާރަށް ޖުމްލަ 95,125 (ނުވަދިހަފަސްހާސް އެއްސަތޭކަފަންސަވީސް) ރުފިޔާ ކަނޑައެޅުމަށް ފުނަދޫ ދާއިރާގެ މެންބަރު މުޙައްމަދު މަމްދޫޙް ހުށަހަޅުއްވައި، ކެލާ ދާއިރާގެ މެންބަރު ޢަބްދުﷲ ޝަރީފް ތާޢީދުކުރެއްވިއެވެ. މި ހުށަހެޅުން ކޮމިޓީއަށް ހާޒިރުވެ ވޯޓުގައި ބައިވެރިވި މެންބަރުންގެ އިއްތިފާޤުން ފާސްވިއެވެ.

ދެން، ވެލާނާ އިންޓަރނޭޝަނަލް އެއަރޕޯޓުގައި މަސައްކަތްކުރާ މޯލްޑިވްސް ކަސްޓަމްސް ސަރވިސްގެ މުވައްޒަފުން ބަދަލުނުކުރާ މައްސަލައާއި، ބައެއް އެއަރކާގޯ މުދާތައް ސްކޭންނުކޮށް ކްލިއަރކޮށްދޭ މައްސަލަ އަދި އެއަރޕޯޓުގެ ޑިއުޓީ-ފްރީ ފިހާރަތަކުގައި ވިއްކުމަށް ޑިއުޑީ މާފްކޮށް އެތެރެކުރާ މުދާ، އެ ކުންފުނިތަކުގެ އެހެން ސަރަހައްދުތަކުގައި ހުންނަ ފިހާރަތަކުގައި ވިއްކާކަމަށް ބަޔާންކޮށް ކޮމިޓީއަށް ހުށަހަޅާފައިވާ މައްސަލައާ ގުޅިގެން މޯލްޑިވްސް ކަސްޓަމްސް ސަރވިސް އިން ލިބިފައިވާ މަޢުލޫމާތާ ގުޅޭގޮތުން މަޝްވަރާކުރެއްވިއެވެ. އެގޮތުން، ވެލާނާ އިންޓަރނޭޝަނަލް އެއަރޕޯޓުގައި، މޯލްޑިވްސް ކަސްޓަމްސް ސަރވިސްއިން ކްލިއަރކުރާ މުދާ ރައްކާކުރުމަށް ބޭނުންކުރާ ވެއަރހައުސްއެއްގައި ވިޔަފާރީގެ އެއްވެސް މުޢާމަލާތެއް އެ ސަރވިސްއިން ކުރައްވާތޯ ބެއްލެވުމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑަށް ސިޓީ ފޮނުވުމަށް ނިންމެވިއެވެ.

އެއަށްފަހު، ތިރީގައިވާ ކޮމިޓީގެ ރިޕޯޓުތަކާ ގުޅިގެން އިދާރާތަކުން ފޮނުވާފައިވާ މަޢުލޫމާތު ކޮމިޓީއާ ހިއްސާކުރެއްވިއެވެ.

• "ފެނަކަ ކޯޕަރޭޝަން ލިމިޓެޑްއިން އައްޑޫސިޓީގައި ހިންގާ ބްރާންޗްތަކާއި، ޕްރޮޖެކްޓުތަކުގެ ޚާއްޞަ އޮޑިޓް ރިޕޯޓު (2023-2021) ދިރާސާކޮށް ނިންމިގޮތުގެ ރިޕޯޓު" އާ ގުޅޭގޮތުން އެންޓި-ކޮރަޕްޝަން ކޮމިޝަނުން ފޮނުއްވާފައިވާ ސިޓީތައް؛
• "ފެނަކަ ކޯޕަރޭޝަން ލިމިޓެޑްއިން އައްޑޫސިޓީގައި ހިންގާ ބްރާންޗްތަކާއި، ޕްރޮޖެކްޓުތަކުގެ ޚާއްޞަ އޮޑިޓް ރިޕޯޓު (2023-2021) ދިރާސާކޮށް ނިންމިގޮތުގެ ރިޕޯޓު" އާ ގުޅޭގޮތުން ފެނަކަ ކޯޕަރޭޝަން ލިމިޓެޑްއިން ފޮނުއްވާފައިވާ ސިޓީ؛ އަދި
• "ފެނަކަ ކޯޕަރޭޝަން ލިމިޓެޑްގެ މުވައްޒަފުން ރެކްރޫޓްކުރުމާއި، ޕްރޮމޯޝަން ދިނުމާއި އަދި މުސާރައާއި ޢިނާޔަތްތަކާގުޅޭ ޚާއްޞަ އޮޑިޓްގެ ރިޕޯޓު ކޮމިޓީން ދިރާސާކޮށް ނިންމިގޮތުގެ ރިޕޯޓު" އާ ގުޅޭގޮތުން އެންޓި-ކޮރަޕްޝަން ކޮމިޝަނުން ފޮނުއްވާފައިވާ ސިޓީ.

އަދި، "އައްޑޫސިޓީ ކައުންސިލްގެ އިދާރާގެ 2012، 2015، 2016، 2017، 2018، 2019، 2020، 2021، 2022، 2023 އަދި 2024 ވަނަ އަހަރުގެ އޮޑިޓް ރިޕޯޓު ކޮމިޓީން ދިރާސާކޮށް ނިންމިގޮތުގެ ރިޕޯޓު" އާ ގުޅޭގޮތުން އެންޓި-ކޮރަޕްޝަން ކޮމިޝަން އަދި ލޯކަލް ގަވަރމަންޓް އޮތޯރިޓީން ފޮނުއްވާފައިވާ މަޢުލޫމާތުގެ އަދާހަމަ ތަފްޞީލު ހޯއްދެވުމަށް ނިންމެވިއެވެ.

މި ބައްދަލުވުމުގައ ހުށަހެޅުނު ހުށަހެޅުއްވުންތަކަށް މެންބަރުން ވޯޓު ދެއްވިގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.