މަޖިލީހަށް ޒިޔާރަތްކުރުމާ ބެހޭ މަޢުލޫމާތު

ރައްޔިތުންގެ މަޖިލީހުގެ ޖަލްސާތަކަކީ ( މަޖިލިސް ހުޅުވާ ޖަލްސާ ފިޔަވައި ) އާންމުކޮށް ހުޅުވައިލެވިގެން ބޭއްވޭ ޖަލްސާތަކެކެވެ.

ރައްޔިތުންގެ މަޖިލީހުގެ ޖަލްސާ އަޑުއެއްސެވުމަށް ވަޑައިގަންނަވާ ބޭފުޅުންނަށް ޚާއްޞަކޮށްފައިވާ 4 މާލަން ހުރެއެވެ. ރައްޔިތުންގެ މަޖިލީހުގެ ޖަލްސާ ކުރިއަށްދާ ވަގުތުތަކުގައި ޖަލްސާ އަޑުއެހުމަށް އާންމު ރައްޔިތުންނަށް މި މާލަންތަކަށް ވަދެވަޑައިގެންނެވޭނެއެވެ.

މަޖިލީހުގެ ޖަލްސާތައް ފަދައިން، މަޖިލީހުގެ ކޮމިޓީ ބައްދަލުވުންތަކަކީ ވެސް އާންމުކޮށް ހުޅުވައިލައިގެން ބާއްވާ ބައްދަލުވުންތަކެކެވެ. އެހެންނަމަވެސް، މަޖިލީހުގެ ޖަލްސާއެއް ނުވަތަ ޖަލްސާގެ ބައެއް ނުވަތަ މަޖިލީހުގެ ކޮމިޓީ ބައްދަލުވުމެއް ނުވަތަ ކޮމިޓީ ބައްދަލުވުމެއްގެ ބައެއް ސިއްރުކުރުމަށް ހާޒިރުވެ ވޯޓުގައި ބައިވެރިވި މެންބަރުންގެ އަޣުލަބިއްޔަތުން ފާސްކުރުމުން އެޖަލްސާއެއް/ބައްދަލުވުމެއް އާންމުންނަށް އަދި މީޑިއާއަށް ބަންދުވާނެއެވެ.

ރައްޔިތުންގެ މަޖިލީހަށް ޒިޔާރަތްކުރާ އާންމުން މަޖިލީހުގެ އިދާރާއަށް ވަނުމަށް ހަމަޖެހިފައިވަނީ ހުޅަނގު ފަރާތުގައިވާ މަޖިލީހުގެ އިދާރާއަށް ވަންނަ ދޮރުންނެވެ. އެ ދޮރުން ވެންނެވުމުން، ސެކިއުރިޓީ ޗެކްކުރުމަށްފަހު، ކާކުކަން އަންގައިދޭ ފޮޓޯޖެހި ރަސްމީ ލިޔުމެއް ސެކިއުރިޓީ ޑެސްކަށް ދައްކަންވާނެއެވެ. މިޑެސްކުންދޭ ވަގުތީ ފާސް ފެންނަން ހުންނަ ގޮތަށް ބަހައްޓަންވާނެއެވެ. ޖަލްސާ އަޑުއެހުމަށްފަހު އެނބުރި ދާއިރު މި ފާސް ސެކިއުރިޓީ ޑެސްކަށް ރައްދުކުރަންވާނެއެވެ.

ކޮންމެ އަހަރަކު ވެސް ރައްޔިތުންގެ މަޖިލީހުގެ 3 ދައުރު އޮންނާނެއެވެ. ކޮންމެ ދައުރެއްގައި ވެސް މަޖިލީހުގެ ޖަލްސާތައް އޮންނާނީ، ހޯމަ، އަންގާރަ އަދި ބުދަ ދުވަހުއެވެ. ރައްޔިތުންގެ މަޖިލީހުގެ 3 ދައުރަކީ:

• ފުރަތަމަ ދައުރު: ފެބުރުވަރީ މަހުގެ ފުރަތަމަ ދުވަހުން ފެށިގެން މޭ މަހުގެ 15 ވަނަ ދުވަހުގެ ނިޔަލަށް.
• ދެވަނަ ދައުރު: ޖޫން މަހުގެ ފުރަތަމަ ދުވަހުން ފެށިގެން އޮގަސްޓު މަހުގެ 15 ވަނަ ދުވަހުގެ ނިޔަލަށް.
• ތިންވަނަ ދައުރު: އޮކްޓޫބަރު މަހުގެ ފުރަތަމަ ދުވަހުން ފެށިގެން ނޮވެންބަރު މަހުގެ ނިޔަލަށް.

މަޖިލީހުގެ ޖަލްސާ އަދި ކޮމިޓީ ބައްދަލުވުން އަޑުއެހުމަށް ޒިޔާރަތްކުރާ މީހުން ތިރީގައި މިވާ އުސޫލުތަކަށް ސަމާލުކަންދޭންވާނެ

• ރައްޔިތުންގެ މަޖިލީހުގެ އިދާރާގައި ހަރަކާތްތެރިވާ ހުރިހާ ވަގުތެއްގައި ވެސް، އެކަށީގެންވާ ސްލޫކީ މިންގަޑެއް ހިފެހެއްޓުން.
• މަޖިލީހުގެ ޖަލްސާ އަޑުއެހުމަށް މާލަމުގައި ތިއްބަވާއިރު މެންބަރުންނަށް އިޝާރާތްކުރުމާއި، މެންބަރުން ދައްކަވާ ވާހަކައަކާ ގުޅިގެން ވަކި ހަރަކާތްތަކެއް ކުރުން ފަދަ ކަންތައްތައް ނުކުރުމަށް.
• މަޖިލީހުގެ ޖަލްސާތައް އަޑުއެހުމަށް ޚާއްޞަކުރެވިފައިވާ މާލަންތަކުގައި ތިބޭއިރު ވާހަކަދެއްކުމާއި، ފޮޓޯނެގުމާއި، ރިކޯޑުކުރުން ފަދަ ކަމެއް ނުކުރުމަށް.
• ޖަލްސާ އަޑުއަހާ މާލަމުގައި ތިއްބަވާއިރު އަޑުގަދަކޮށް ނުހެދުން.
• މަޖިލީހުގެ ޖަލްސާގެ އަޑުއަހާ މާލަމަށާއި އަދި ކޮމިޓީ ބައްދަލުވުންތައް އަޑުއަހަން ވަންނައިރު އަދި ނިކުންނައިރު އަޑުގަދަނުވާނޭހެން ވަދެނިކުމެއުޅުން.
• ހެނދުންއެޅުމުގައި ވެސް، ދައުލަތުގެ އިދާރާތަކަށް ހާޒިރުވާ ފަރާތްތަކުން ހެދުންއެޅުމުގައި ހިފަހައްޓަންޖެހޭ އާންމު މިންގަނޑާ ޙިލާފުނުވާނެ ގޮތަކަށް ހެދުންއެޅުމަށް ސަމާލުކަންދިނުން.
• މެންބަރުންނަށް ޚާއްޞަކޮށްފައިވާ ތަންތަނަށް ނުވަނުން.