އިބްރާހީމިއްޔާ

ހަކުރާ ގަނޑުވަރުގައި 2 އަހަރަކު ޖަލްސާތައް ބޭއްވުމަށްފަހު، ރައްޔިތުންގެ މަޖިލީހުގެ ޖަލްސާތައް އެކި ފަހަރު މަތީން އެކި އިމާރާތުގައި ބޭއްވިފައިވެއެވެ. އެގޮތުން، އިބްރާހީމިއްޔާ ކިޔާ އިމާރާތުގެ މަތީ ބުރީގައި ވެސް މަޖިލީހުގެ ޖަލްސާތައް ބޭއްވުނެވެ. މި އިމާރާތް ހުރީ މިހާރުގެ ޖުމްހޫރީ މައިދާނުގެ ސަރަހައްދުގައެވެ.

އިބްރާހީމިއްޔާއަކީ، ހެންވޭރުގޭ އަޙްމަދު ކާމިލު، ވަޒީރުއްދާޚިލިއްޔާގެ މަގާމުގައި ހުންނަވައިގެން ބިންގާއަޅުއްވައި އިމާރާތްކުރެއްވި ތަނެކެވެ. އެ ތަން ބޮޑު ހަނގުރާމައިގެ ދުވަސްވަރު ބޭނުންކޮށްފައިވަނީ ރާއްޖެއަށް ލަނގުވާ ބޭރުގެ ހަނގުރާމަމަތީ ސިފައިން ބައިތިއްބާ އަދި މަތިންދާބޯޓަށް އަޅާ ތެޔޮ ރައްކާކުރާ ތަނެއްގެ ގޮތުގައެވެ. އެ ދުވަސްވަރު އެ ތަނަށް "މަތިންދާބޯޓުގެ" ކިޔުނެވެ. ހަނގުރާމަ ނިމުމަށްފަހު ދުވަސްތަކެއް ވަކި ކަމެއް އެތަނުގައި ނުކޮށް އެ އިމާރާތް ފަޅަށް ހުރުމަށްފަހު، އިބްރާހީމިއްޔާއަކީ ރައްޔިތުންގެ މަޖިލިސްކުރާ އިމާރާތް ކަމުގައި ހަމަޖެހުނެވެ. އޭރު މަޖިލީހުގެ ރައީސަކީ، އަންނަބީލް އިބްރާހީމް ފަރީދެވެ.

ބޮޑު އިސްޓޯރުގެ އިރުމަތިން ވާ އިމާރާތް

ރައްޔިތުންގެ މަޖިލީހުގެ ޖަލްސާތައް ދާރުލްޢުލޫމުގައި ބޭއްވުމަށްފަހު، ދެން މަޖިލީހުގެ ޖަލްސާތައް ކުރިއަށްގެންދިޔައީ ބޮޑު އިސްޓޯރާ އިންވެގެން އިރަށް އޮތް ގޯޅީގެ އިރުމަތީ ފަރާތުގައި ހުރި އިމާރާތުގައެވެ. މި ތަން އިމާރާތްކުރެވުނީ ވުޒާރާތުލް އަޝްޣާލުގެ ބެލުމުގެ ދަށުންނެވެ. މި މަސައްކަތްތައް ކުރިއަށް ގެންދިޔައީ ފުރަތަމަ ޖުމްހޫރިއްޔާ ހުވައިކުރުމުގެ ރަސްމިއްޔާތަށް މާލޭގެ ހާބަރު ސަރަހައްދު ރިވެތިކުރުމުގެ މަސައްކަތްތަކުގެ ތެރެއިންނެވެ.

މިހާރުގެ ރައްޔިތުންގެ މަޖިލިސްކުރާ ގެ

1998 ވަނަ އަހަރާ ހަމައަށް ރައްޔިތުންގެ މަޖިލީހުގެ ދާއިމީ އިމާރާތެއް މަޖިލީހަށް ލިބިފައެއް ނުވެއެވެ. ރައްޔިތުންގެ މަޖިލިސްކުރާ ގެއެއް ހުރުމުގެ މުހިންމުކަމާއި، އަދި އެ އިމާރާތަކީ ޤައުމުގެ އެންމެ ޤަދަރުހުރި، އެންމެ ހައިބަތުހުރި އިމާރާތްތަކުގެ ތެރެއިން އިމާރާތެއް ކަމުގައި ވާންޖެހޭނެ ކަމަށް ދެކެވަޑައިގެން، ރައީސުލްޖުމްހޫރިއްޔާ އަލްއުސްތާޛު މައުމޫން ޢަބްދުލްޤައްޔޫމް ރައްޔިތުންގެ މަޖިލީހުގެ އާ އިމާރާތެއްގެ ބިންގާ އަޅުއްވައިދެއްވީ، 26 ޖޫން 1981 ގައެވެ.

މި އިމާރާތް ބިނާކުރެވުނީ ޕާކިސްތާނު ސަރުކާރުގެ އެހީގައެވެ. ދެ ފަންގިފިލާގެ މައްޗަށް އެކުލެވިގެންވާ މި އިމާރާތް ހުޅުއްވައިދެއްވާފައިވަނީ، 1 އޮގަސްޓު 1998 ގައި ރައީސުލްޖުމްހޫރިއްޔާ އަލްއުސްތާޛު މައުމޫން ޢަބްދުލްޤައްޔޫމާއި ޕާކިސްތާނުގެ ބޮޑުވަޒީރު ނަވާޒް ޝަރީފެވެ.

ރައްޔިތުންގެ މަޖިލިސްކުރާ މާލަން ހުންނަނީ މި ދެ ބުރީގެ އިމާރާތުގެ ތިރީ ފަންގިފިލާގައެވެ. މި އިމާރާތުގައި މަޖިލީހުގެ ޖަލްސާތައް އަޑުއެއްސެވުމަށާއި ބެއްލެވުމަށް ޚާއްޞަކުރެވިފައިވާ މާލަންތައް ފުރަތަމަ ފަންގިފިލާގައި ހުރެއެވެ.

މަޖިލީހުގެ މަސައްކަތްތައް އިތުރަށް ފުޅާވަމުން ދިޔުމާއެކު ޖާގައިގެ ދަތިކަށް ހައްލުކުރުމަށް މަޖިލީހުގެ އިދާރާއަށް އިތުރު އިމާރާތެއް ބިނާކުރުމަށް 2007 ވަނަ އަހަރުގެ ޑިސެންބަރު 6 ވަނަ ދުވަހު ބިންގާއެޅުނެވެ. 13 ފަންގިފިލާގެ މި އިމާރާތް ބޭނުންކުރަން ފެށުނީ، 2019 ވަނަ އަހަރުއެވެ.