މިއަދުގެ ބައްދަލުވުމުގައި ކުރިއަށް ގެންދެވީ، ކޮމިޓީއަށް ލިބިފައިވާ މައްސަލަތަކުގެ ތެރެއިން 8 މައްސަލައެއް މަޝްވަރާކޮށް އެއާމެދު ގޮތެއް ނިންމުމެވެ. އެގޮތުން، 2020 އަހަރުގެ ހަތަރުވަނަ ކުއަރޓަރގައި ކުރެވުނު މަސައްކަތާއި، އޮޑިޓް ރިޕޯޓްތަކުގައި މެތަމެޓިކަލް އެރަރސް ހުރިކަން އެކައުންޓަބިލިޓީ އިން ފޮނުއްވާފައިވާ މައްސަލައާއި، އޮޑިޓް ޤާނޫނަށް ގެނައި 2 އިޞްލާގައިވާ ގޮތުގެމަތިން އޮޑިޓަރ ޖެނެރަލްގެ އަދި އެބޭފުޅާގެ އަނބިދަރިންގެ މާލީ ބަޔާން މެންބަރުންނާއި ޙިއްސާކޮށް، ފައިލް ކުރަން ނިންމާފައިވެއެވެ. ޢާންމު ސިއްޙަތުގެ ކުއްލި ނަރައްކަލުގެ ޙާލަތު ނިމުމަކަށް ގެންނަ ތާރީޚުން ފެށިގެން އޮޑިޓް ކުރުމަށް ދެވިފައިވާ މުއްދަތު 90 (ނުވަދިހަ) ދުވަސް ފަސްވެގެންދާނެކަމަށް ބަޔާންކޮށް ހުށަހަޅުއްވާފައިވާ ރިވައިސްޑް ވޯކްޕްލޭން މަޝްވަރާ ކުރެވިފައިވެއެވެ. ލޯކަލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބަށް ބަޖެޓުގެ ދަތިކަން ކުރިމަތިވާނެކަމަށް ބަޔާންކޮށް އިލެކްޝަންސް ކޮމިޝަނުން ފޮނުވާފައިވާ ސިޓީ މަޝްވަރާކޮށް، އެ އިންތިޚާބަށް ދާނޭ ޚަރަދުގެ ތަފްސީލް ފޮނުވުމަށް އެދި ސިޓީއެއް ފޮނުވުމަށް ނިންމާފައިވެއެވެ. 2021 ވަނަ އަހަރަށް ލަފާކުރި ބަޖެޓުގެ ކޭޝްފްލޯ ޕްލޭން ޙިއްޞާކޮށް މިނިސްޓްރީ އޮފް ފިނޭންސް އިން ފޮނުވާފައިވާ ސިޓީ ސާފު ނުވުމުގެ ސަބަބުން، ބަޖެޓުގެ ކޭޝްފްލޯ ޕްލޭންގެ ސާފު ކޮޕީއެއް ހޯދުމަށްފަހު އެ މަޝްވަރާ ކުރުމަށް ނިންމާފައިވެއެވެ. އެންޓި-ކޮރަޕްޝަން ކޮމިޝަނުން ނެރުއްވާފައިވާ ސިޔާސީ ޕާޓީތަކުގެ މާލީ ނިޒާމުގެ ނަޒާހާތްތެރިކަން ހަރުދަނާކުރުމުގެ ރިޕޯޓް މެންބަރުންނާއި ޚިއްސާ ކުރެވިފައިވެއެވެ. އަދި ނ. މަނަދޫ ކައުންސިލް އިދާރާގެ ހުސްވެފައިވާ މަޤާމްތަކަށް މުވައްޒަފުން ނެގުމުގެ ހުއްދައަށް އެދި ފޮނުވާފައިވާ ސިޓީ މަޝްވަރާކޮށް، އެކަންތައް ކުރުމަށް މިނިސްޓްރީ އޮފް ފިނޭންސްއާއި މަޝްވަރާ ކުރުމަށް ނ. މަނަދޫ ކައުންސިލަށް ސިޓީ ލިޔަން ނިންމާފައިވެއެވެ.