މިބައްދަލުވުމުގައި ފުރަތަމަ ކުރިއަށް ގެންދެވީ، މިބައްދަލުވުމުގައި މޯލްޑިވްސް ކަސްޓަމްސް ސަރވިސްގެ 2019 ވަނަ އަހަރުގެ އަހަރީ ރިޕޯޓު އަދި މިނިސްޓްރީ އޮފް ޓުއަރިޒަމްގެ 2020 ވަނަ އަހަރުގެ އަހަރީ ރިޕޯޓާއި މެދު ގޮތެއް ނިންމުމެވެ. އެގޮތުން، އޮޑިޓަރ ޖެނެރަލް އޮފީހުން ފާހަގަކުރައްވާފައިވާކަންކަން ފާހަގަކޮށް ދެ ރިޕޯޓު އޮތް ގޮތަށް ފާސްކުރުމަށް ދުވާފަރު ދާއިރާގެ މެންބަރު އިސްމާޢީލް އަޙްމަދު ހުށަހަޅުއްވައި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ތާއީދުކުރެއްވިއެވެ. މި ހުށަހެޅުން ކޮމިޓީއަށް އެވަގުތު ހާޒިރުވެވަޑައިގެން ތިއްބެވި މެންބަރުންގެ އިއްތިފާޤުން ނިންމިއެވެ. އެއަށްފަހު އެހެނިހެން ގެ ދަށުން 2 ކަމެއް ކޮމިޓީގެ މެންބަރުން ހުށަހެޅުއްވިއެވެ. 1.ތިނަދޫ އުތުރު ދާއިރާގެ މެންބަރު ޢަބްދުލްމުޣުނީ ހުށަހަޅުއްވައި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ތާއީދުކޮށް ހުށަހަޅުވާފައިވާ މައްސަލަ؛ މަސްވެރިން ބާނާ މަސް ކިރުވުމަށްފަހު، މަސްވެރިންނަށް ދޫކުރާ ތެލުގެ އަގު ބޮޑުވުމުގެ ސަބަބުން މަސްވެރިންނަށް ކުރިމަތިވަމުންދާ ދަތިތައް ޙައްލުކުރުމަށް މިފްކޯ، އެސް.ޓީ.އޯ އަދި އެފް.އެސް.އެމް ގެ ބޭފުޅުންނާއި ބައްދަލުކޮށް މިމައްސަލަ ދިރާސާކުރުން. 2.ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ހުށަހަޅައި މަތިވެރި ދާއިރާގެ މެންބަރު ޙަސަން ޒަރީރު ތާއީދުކޮށް ހުށަހަޅާފައިވާ މައްސަލަ؛ ބިދޭސީން މަސައްކަތްތެރިން ދިވެހިރާއްޖޭގައި މަސައްކަތްކުރުމަށް ދިވެހިރާއްޖެ ގެނައުމަށާއި، ބިދޭސީ މަސައްކަތްތެރިން ދިވެހިރާއްޖެއިން ފުރައިގެންދިއުމަށާއި، ވިސާ ލިބުމުގައި ދަތިތަކާ ކުރިމަތިވެފައިވާކަމަށާއި، ކުރިން އެ މަސައްކަތްތައް ކުރަމުން އައި ސޮފްޓްވެއަރ ބަދަލުކުރުމުގެ ސަބަބުން ދަތިތަކާ ކުރިމަތިވެފައިވާތީ މިނިސްޓްރީ އޮފް އިކޮނޮމިކް އަދި ކަމާ ގުޅޭ ބޭފުޅުންނާއި ބައްދަލުކޮށް މަޢުލޫމާތު ސާފުކުރުން.