މިއަދުގެ ބައްދަލުވުމުގައި، ސަރުކާރުގެ އިދާރާތަކުން އެކި އެކި މަޝްރޫޢުތައް އަމިއްލަ ފަރާތްތަކުންނާއި ކުދި އަދި މެދު ފަންތީގެ ވިޔަފާރިތަކުން ކުރުވުމަށްފަހު، އެ ފަރާތްތަކަށް ދައުލަތުން ދައްކަންޖެހޭ ފައިސާ ދައްކަމުން ނުދިއުމާއި، އެ އެކަމުގެ ސަބަބުން އެ ފަރާތްތަކަށް ދަތިތަކާ ކުރިމަތިވަމުންދާ މައްސަލައާމެދު މަޝްވަރާކުރެއްވުމަށްފަހު، މުއައްސަސާތަކުން ޕަބްލިކް އެކައުންޓިންގ ސިސްޓަމަށް އިންވޮއިސްތައް ޕޯސްޓްކުރައްވާ ތަރުތީބުން، ކުދި އަދި މެދު ފަންތީގެ ވިޔަފާރިތަކަށް އިސްކަންދެއްވައިގެން ދައުލަތުން ދައްކަވަންޖެހޭ ފައިސާ އެފަރާތްތަކަށް ދެއްކެވުމަށް މިނިސްޓްރީ އޮފް ފިނޭންސްގައި ދެންނެވުމަށް ނިންމެވިއެވެ. އެއަށްފަހު، ބޭންކުތަކުގައި ހުރި ސްޓްރެސްޑް އެކައުންޓްސް ޕްރޮޕަޓީސްތަކާގުޅޭގޮތުން ބޭންކުތަކަށް ދިމާވާ ދަތިތަށް ބައްލަވައިދެއްވުމަށް އެދި ރައްޔިތުންގެ މަޖިލީހުގެ ރައީސް ފޮނުއްވާފައިވާ މައްސަލައަކީ އެސް.އޯ.އީ ކޮމިޓީއަށްވެސް ފޮނުވިފައިވާ މައްސަލައަކަށްވާތީ، ޖޮއިންޓް-ކޮމިޓީއެއް އެކުލަވާލައިގެން މައްސަލަ ދިރާސާކުރުމަށް ނިންމެވިއެވެ. ދިވެހިރާއްޖޭގައި ކުރެވޭ ވިޔަފާރިތަކުން ލިބޭ ފައިސާގެ ބޮޑުބައެއް ދިވެހިރާއްޖޭގެ ފައިނޭންޝަލް ސިސްޓަމަށް ވަންނަމުންނުދާކަން ފާހަގަކުރެވޭތީ އެކަމަށް އަވަސް ޙައްލެއް ހޯދުމަށްޓަކައި އަޅަންޖެހޭ ފިޔަވަޅުތައް އެޅުމަށް ގޮވާލައި މަނަދޫ ދާއިރާގެ މެންބަރު އަޙްމަދު ހާރޫން ހުށަހަޅުއްވާފައިވާ ޤަރާރާ ގުޅޭގޮތުން ޓޫރިޒަމް އިންޑަސްޓްރީގެ ބޭފުޅުންނާ ބައްދަލުކުރެއްވުމަށް ނިންމެވިއެވެ.