ޤާނޫނު ނަންބަރު 14/2019 (ދިވެހިރާއްޖޭގެ މަސްވެރިކަމުގެ ޤާނޫނު) އިން މަސްވެރިންނަށް ހޯދައިދެވުނު ލުއިތަކާއި، މަސްވެރިންނަށް ހުރި ފުރުޞަތުތަކާއި، މަސްވެރިކަމަށް އިންވެސްޓްކުރާ ފަރާތްތަކަށް ޤާނޫނީގޮތުން ހުރި ފުރުޞަތުތައް އަދި މަސްވެރިކަމުގައި ކުރިއަށް ހިންގުމަށް ނިންމަވާފައިވާ ސިޔާސަތުތަކާ ގުޅޭގޮތުންނާއި، މަސްވެރިކަންކުރާ ދިވެހި އުޅަނދުފަހަރުތަކުން، ބޭރުގެ މަސްވެރި އުނޅަދުތަކަށާއި ބޭރު ޤައުމުތަކަށް މަސް ވިއްކުމާ ގުޅޭގޮތުން މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރއާއި އެ މިނިސްޓްރީގެ ކަމާގުޅޭ ބޭފުޅުންނާ ބައްދަލުކޮށް މަޢުލޫމާތު ސާފުކުރެއްވިއެވެ. ބައްދަލުވުމުގައި ފާހަގަކުރެވުނު މުހިންމު ނުކުތާތައް: 1.ޒަމާނީ ބަދަލުތަކާއެކީ ގެނެސްދެއްވި ޤާނޫނުން އީ.ޔޫގެ ހުރި ކަންބޮޑުވުންތައް ހަމަޔަކަށް އެޅުވިފައިވާކަމަށާއި އެކަމުގެ ބޮޑު ފައިދާއެއް ވާނީ ހަމަ މަސްވެރިންނަށްކަމަށާއި މިހާރު ދިވެހި މަސްވެރިން އެއްވެސް ސަރަޙައްދެއްގައި މި ކުރާ މަސްވެރިކަމުގައި ގާނޫނާއި، ގަވާއިދާ ޚިލާފު ލޭބަލްއެއް ޖެހިގެނެއް ނުދާނެކަމަށް. 2.މަސްވެރިކަމުގެ މެނޭޖްމަންޓް ޕްލޭންތަކެއް ހެދި އެ ހުރިހާ މެނޭޖްމަންޓް ޕްލޭންތައް ތަންފީޛުކުރުމަށް ޓަކައި މިހާރު އަޅުގަނޑުމެން އެކުލަވައިލާ، ގެޒެޓުކުރެވި، މަސްވެރިންނާއެކީ މަޝްވަރާކުރެވިގެން އެ ކަންތައްތަކެއް ކުރެވިފައިވާކަމަށް؛ 3. މަސްވެރިކަމުގައި ބިދޭސީން ޙަރަކާތްތެރިވުމުގެ ފުރުޞަތު ކޮންމެވެސް މިންވަރަކަށް ހުޅުވާލަން މަސްވެރިންގެ ފަރާތުން އެދިވަޑައިގަންނަވާތީ، އެކަމަށް މިހާރު ދަނީ މަޝްވަރާތައް ކުރެވި ދެ ބިދޭސީއަކު މި މަސްވެރިކަމުގެ އުޅަނދުތަކުގައި ހަރަކާތްތެރިވާނެ ކަހަލަ ގޮތަކަށް ރޭވެމުން ދާކަމަށް؛ 4. މަސްވެރިންނާ ގާތުން ޚިދުމަތްދިނުމުގެ ގާނޫނުގެ ދަށުން ކަނޑައަޅަންޖެހޭ ރޭންޖަރުން ވެސް ވަނީ މިހާރު ނެގިފައިކަމަށާއި މިހާރު އެ ފަރާތްތަކަށް ތަމްރީނު ދެވި، މަސައްކަތްތައް ދަނީ ކުރެވެމުންކަމަށާއި މަސްވެރިންނަށް މުހިންމު ސަރަޙައްދުތަކެއް ކައުންސިލުތަކާއެކީ މިނިސްޓްރީގެ ފަރާތުން ދެވޭ ޚިދުމަތްތައް ކުރިއަށްދާނެކަމަށް؛ 5. ޒަމާންތަކެއް ވަންދެން ކަޅުބިލަމަސް ގަތުމުގެ ވިޔަފާރިއަށް ވަނުމުގެ ފުރުޞަތެއް އޮތީ ބަންދުކުރެވިފައިކަމަށް. ނަމަވެސް، މިހާރު އެ އޮތީ މިދިޔަ އަހަރު އެ ފުރުޞަތު ހުޅުވާލެވި، އެހެން ފަރާތްތަކަށް ވެސް އިންވެސްޓްކުރަން ހުޅުވާލެވިފައިކަމަށާއި، ކަޅުބިލަމަހުގެ ދޮށީގެ މަސްވެރިކަމަށް ވަނުމަށް ވެސް އެއްވެސް ފަރާތަކަށް މި ވަގުތަކު ހުރަހެއް ނެތްކަމަށް؛ 6.މަސް ޕްރޮސެސްކުރުމުގެ ވިޔަފާރި ބިދޭސީންނަށް %75 އާ ހިސާބަށް ހިއްސާވާ ގޮތަށް މިހާރު ވެސް ހުޅުވާލެވިފައިވާކަމަށާއި، އަދި ކަންނެލި މަސްވެރިކަމުގައި މަދުވެގެން އެއް މިލިއަން ޔޫ.އެސް ޑޮލަރު އިންވެސްޓްކުރުމުން އަދި ކަޅުބިލަމަހުގެ މަސްވެރިކަމަށް ފަސް މިލިއަން ޔޫ.އެސް ޑޮލަރާ ހިސާބަށް އިންވެސްޓްކުރައްވަން ޖެހިވަޑައިގަންނަވާކަމަށް؛ 7.ސިޔާސަތުތަކަށް މި ގެނެވުނު ބަދަލުތަކާ އެކީގައި ބޮޑަށް އަމާޒު ހިފިފައި ހުރީ ޤައުމުގައި އަގު އެއްކުރުމަށް މަސައްކަތްކުރުމަށްކަމަށް؛