މިއަދުގެ ބައްދަލުވުމުގައި ކުރިއަށް ގެންދެވީ، ތިލަފުށީގައި އޮތް "އެމް.ވީ. ސީހޯމް ސެފަޔަރ" ބޯޓާ ގުޅޭގޮތުން ކޮމިޓީއަށް ހުށަހެޅިފައިވާ މައްސަލައާމެދު ގޮތެއް ނިންމެވުމުގެ މަސައްކަތެވެ. މިގޮތުން، ކޮމިޓީން މި މައްސަލަ ދިރާސާކުރެއްވުމުގައި ފާހަގަކުރެވިފައިވާ ކަންކަމާއި، ކޮމިޓީ ރިޕޯޓުގައި ހިމަނާނެ ކަންކަމާމެދު މަޝްވަރާކުރެއްވުމަށްފަހު އަންނަނިވި ނިންމުންތައް ނިންމެވިއެވެ. 1.1. ސްޓޭޓް އޯންޑް އެންޓަރޕްރައިޒަސް ކޮމިޓީއަށް ލިބިފައިވާ މަޢުލޫމާތާއި ކިތާބީ ޙެއްކާއި، އަދި ބައްދަލުކުރެވުނު އެކި ފަރާތްތަކުން ލިބިފައިވާ ބަޔާންތަކުގެ އަލީގައި ގްރޭޓަރ މާލެ އިންޑަސްޓްރިއަލް ޒޯން ލިމިޓެޑުގެ މެނޭޖުމަންޓަށް އެމް.ވީ ސީހޯމް ސެފަޔަރ ކިޔުނު ބޯޓު ނައްތާލުމުގެ ހުއްދަ ދެއްވިފައިނުވާކަން ފާހަގަކޮށްފައިވީހިނދު، ކުންފުނީގެ ހިންގުމުގެ އުޞޫލުތަކާއި އަދި ގަވައިދާ ޚިލާފަށް މެނޭޖިންގ ޑިރެކްޓަރ ޢަމަލު ކުރައްވާފައިވާކަން ފެންނަން ހުރުމާއެކު، މި މައްސަލާގައި އިޙުމާލުވެފައިވާ ފަރާތްތަކާމެދު ފިޔަވަޅު އެޅުމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑާއި، މިނިސްޓްރީ އޮފް ފިނޭންސާއި، އަދި ރައީސުލްޖުމްހޫރިއްޔާއަށް ލަފާދިނުމަށް؛ 1.2. ތިލަފުށީ ފަޅުތެރޭގައި އޮތް އެމް.ވީ ސީހޯމް ސެފަޔަރ ނެގުމުގެ މަސައްކަތް ގްރޭޓަރ މާލެ އިންޑަސްޓްރިއަލް ޒޯން ލިމިޓެޑުގެ މެނޭޖުމަންޓުން، ޑިރެކްޓަރުންގެ ބޯޑަށް އަންގާނުލައި، އެކުންފުނީގެ ޕްރޮކިއުމަންޓް އުޞޫލުތަކާ ޚިލާފަށް ޕާރކަވަން އިންވެސްޓްމެންޓް ޕްރައިވެޓް ލިމިޓެޑަށް އެއްވެސް އަގަކާއި ނުލައި ޙަވާލުކޮށް، އެބޯޓުގެ މިލްކުވެރިކަން މި ކުންފުންޏަށް ޙަވާލުކޮށްފައިވާތީއާއި، އަދި މިމަސައްކަތް ޙަވާލުކުރެވުނު ޕާރކަވަން އިންވެސްޓްމެންޓް ޕްރައިވެޓް ލިމިޓެޑަކީ އެކްސްޕްރެޝަން އޮފް އިންޓަރެސްޓް ހުށަހަޅަން އިޢުލާން ކުރެވުނު ދުވަހު ރަޖިސްޓްރީ ކުރެވުނު ކުންފުންޏަކަށްވުމުން، މި މުޢާމަލާތްތަކަކީ ވަކި ފަރާތަކަށް މަންފާއެއް ހޯދާ ދިނުމަށްޓަކައި ކޮރަޕްޝަނަށް މަގުފަހިވާ ގޮތަށް ހިންގާފައިވާ ކަމެއްކަމަށް ބެލުމުގެ ޖާގައޮތްކަމުން، މިމައްސަލައާ ގުޅޭގޮތުން ހިނގާފައިވާ އެންމެހާ މުޢާމަލާތްތައް، އެންޓި-ކޮރަޕްޝަން ކޮމިޝަނާއި އޮޑިޓަރ ޖެނެރަލްގެ އޮފީހުން ބަލައި ތަޙުޤީޤުކުރުމަފަހު، މައްސަލަ ނިމުނު ގޮތުގެ ރިޕޯޓް ސްޓޭޓް އޯންޑް އެންޓަރޕްރައިޒަސް ކޮމިޓީއަށް ފޮނުއްވުމަށް ދެންނެވުމަށް؛ 1.3. ކެމިކަލް ފަދަ ތަކެތި ރައްކާކުރުމަށް ތިލަފުށީގައި ގުދަން ހެދުމަށް ރައީސުލްޖުމްހޫރިއްޔާ ނިންވެމާ ގުޅިގެން ގްރޭޓަރ މާލެ އިންޑަސްޓްރިއަލް ޒޯން ލިމިޓެޑްގެ މެނޭޖިންގ ޑިރެކްޓަރ އަލްފާޟިލް އިބްރާހީމް ރަޝީދު އަބޫބަކުރު ނާޖާއިޒު ފައިދާއެއް ހޯދުމަށްޓަކައި އެ ކުންފުނީގެ ބޯޑަށް އެންގުމެއްނެތި އަދި ބިޑުކުރުމަކާނުލައި ތިލަފުށީގައި ރާވާ ގުދަންތަކެއް ހެދުމަށް ކުންފުންޏަކާ ޙަވާލުކޮށްފައިވާކަމަށް ތުހުމަތުކޮށް އެންޓި-ކޮރަޕްޝަން ކޮމިޝަނުން ފޮނުއްވާފައިވާ މައްސަލަ ތަޙުޤީޤުކުރުމަށްފަހު ރިޕޯޓް ސްޓޭޓް އޯންޑް އެންޓަރޕްރައިޒަސް ކޮމިޓީއަށް ފޮނުއްވުމަށް ދެންނެވުމަށް؛ 1.4. ގްރޭޓަރ މާލެ އިންޑަސްޓްރިއަލް ޒޯން ލިމިޓެޑުގެ ހުއްދަނެތި އެފަރާތުގެ ބެލުމުގެ ދަށުގައިވާ، އެމް.ވީ ސީހޯމް ސެފަޔަރ އިން ދައުލަތަށް ބޮޑު ގެއްލުމެއް ލިބިދާނެކަމަށް ފެންނާތީ، ސިވިލް ކޯޓުގެ ނަންބަރ 107/Cv-C/2017 ޤަޟިއްޔާގެ ދަށުން ކުރައްވާފައިވާ ޙުކުމާ އެއްގޮތަށް ޤާނޫނީ ގޮތުން އެއަށް ޒިންމާވާނޭ ވެރިއަކު ނެތް މިފަދަ ތަކެއްޗާމެދު ދިވެހި ދައުލަތުން ޢަމަލުކުރުމަށް ހަމަޖެހިފައިވާ އުޞޫލުތަކާއި އިޖުރާއަތްތައް އެކުލަވާލައި، ގެއްލުން ކުޑަކުރުމަށް ކުރެވެން ހުރި ހުރިހާ މަސައްކަތެއްކޮށް، އެބޯޓު ތިލަފުށީ ފަޅުތެރެއިން ނެގުމަށް ކުރަންޖެހޭ އެންމެހާ ކަންތައްތައް މިހާރުން މިހާރަށް ކުރުމަށް މިނިސްޓްރީ އޮފް ފިނޭންސަށް ދެންނެވުމަށް؛ 1.5. އެމް.ވީ ސީހޯމް ސެފަޔަރ ނަމަކަށް ކިޔާ ބޯޓުގެ ވެރިފަރާތެއްވާނަމަ، އެބޯޓުގެ ވެރިފަރާތް ހޯދައި، މިބޯޓުގެ ސަބަބުން ދިވެހި ދައުލަތަށް ލިބިފައިވާ ގެއްލުމުގެ ބަދަލު ހޯދުމަށް މިނިސްޓްރީ އޮފް ފިނޭންސަށް ދެންނެވުމަށް؛ 1.6. ގްރޭޓަރ މާލެ އިންޑަސްޓްރިއަލް ޒޯން ލިމިޓެޑުގެ މެނޭޖުމަންޓުން، ކުންފުނީގައި އެކަށީގެންވާ މަސައްކަތުގެ މާހައުލެއް ޤާއިމުކޮށް، ޕްރޮފެޝަނަލިސަމް ހިފަހައްޓާ، ކުންފުނީގެ ނިންމުންތައް ހަރުދަނާކޮށް، ކުންފުނީގެ މިސްރާބު ގެއްލުނަ ނުދިނުމަށް ކޯޕަރޭޓް ގަވަރނަންސްގެ ބެސްޓް ޕްރެކްޓިސް އުޞޫލުތަކަށް ޢަމަލުކުރުމަށް އެކުންފުންޏަށް ދެންނެވުމަށް؛ 1.7. ސްޓޭޓް އޯންޑް އެންޓަރޕްރައިޒަސް ކޮމިޓީން ލިބުނު މަޢުލޫމާތާއި ބޭއްވުނު ބައްދަލުވުންތަކުން ހާމަވެގެންދަނީ ކުންފުނި ހިންގަމުންދަނީ ކޯރޕަރޭޓް ގަވަރނެންސް ކޯޑާއި އެއްގޮތަށްކަމަށް ބެލެވެން ނެތްހިނދު، ކުންފުނީގެ ބޯޑު ހަރުދަނާ ކުރުމަށް އަޅަންޖެހޭ ފިޔަވަޅުތައް އެޅުމަށް، ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑާއި މިނިސްޓްރީ އޮފް ފިނޭންސަށް ދެންނެވުމަށް؛ އަދި 1.8. ޤާނޫނު ނަންބަރު 2013/3 (ދައުލަތުގެ ވިޔަފާރި ތަންތަން ޕްރައިވަޓައިޓްކުރުމާއި ކޯޕަރަޓައިޒްކުރުމާއި އަދި މޮނިޓަރކޮށް އިވެލުއޭޓްކުރުމުގެ ޤާނޫނު) ގެ 12 ވަނަ މާއްދާގެ (ޒ) ބަޔާންކޮށްފައިވާ ގޮތަށް ސަރުކާރުގެ ކުންފުނިތަކާއި ސަރުކާރު ބައިވެރިވާ ކުންފުނިތަކުގެ ހިންގުން ހަރުދަނާކުރުމާއި، އެތަންތަން ހިނގާނުހިނގާގޮތް ބެލުމަށް ކުރަންޖެހޭ ދިރާސާތައްކޮށް ހިންގުން ހަރުދަނާކޮށް ވަޒަންކުރާނެ ހަރުދަނާ ނިޒާމެއް ޤާއިމުކޮށް، ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުގެ ޤާބިލްކަން އިތުރުކުރުމަށް، އެބޯޑުގައި ދެންނެވުމަށެވެ.