ޚުލާސާ

މިއަދުގެ ބައްދަލުވުމުގައި ފުރަތަމަ ކަމަކަށް ކުރިއަށް ގެންދެވީ މޯލްޑިވްސް ބްރޯޑްކާސްޓިން ކޮމިޝަންގެ މެންބަރުންނާ ގުޅޭގޮތުން ސަބް-ކޮމިޓީން ނިންމެވިގޮތުގެ ރިޕޯޓް-2 ދިރާސާކުރުމެވެ. މިގޮތުން މި މޯލްޑިވްސް ބްރޯޑްކާސްޓިންގ ކޮމިޝަންގެ މެންބަރު ޒީނާ ޒާހިރު މަޤާމުން ވަކިކުރުމަށް ނަން އިއުލާންކުރުމަށް ރައްޔިތުންގެ މަޖިލީހުގެ ތަޅުމަށް ފޮނުވުމަށް ގަލޮޅު ދެކުނު ދާއިރާގެ މެންބަރު މީކާއީލް އަޙްމަދު ނަސީމް ހުށަހަޅުއްވާ ހެންވޭރު ދެކުނު ދާއިރާގެ މެންބަރު ޙުސައިން ޝަހީމް ތާއީދުކުރެއްވިއެވެ. މި ހުށަހެޅުމަށް ވޯޓަށް އެއްސެވުމުން ކޮމިޓީގެ އަޢުލަބީއްޔަތުން މި ހުށަހެޅުން ފާސްވިއެވެ. އެއަށްފަހު ދެން ކުރިއަށް ގެންދެވީ މޯލްޑިވްސް ބްރޯޑްކާސްޓިން ކޮމިޝަނާއި މޯލްޑިވްސް މީޑިއާ ކައުންސިލް އެއްކޮށްލުމުގެ މަސައްކަތާ ގުޅޭގޮތުން ސަބް-ކޮމިޓީގެ ހޯދުންތަކާ ގުޅޭގޮތުން މަޝްވަރާކުރުމެވެ. މިގޮތުން މި މަސައްކަތް ކުރިއަށް ގެންދިއަ ސަބް ކޮމިޓީގެ ހޯދުންތައް އެޓަރނީ ޖެނެރަލް އޮފީހަށް ސިޓީއަކުން ފޮނުވުމަށް ވިލިމާލެ ދާއިރާގެ މެންބަރު އަޙްމަދު އުޝާމް ހުށަހަޅުއްވާ ތިނަދޫ ދެކުނު ދާއިރާގެ މެންބަރު ޢަބްދުﷲ ސަނީފް ތާޢީދުކުރެއްވިއެވެ. މި ހުށަހެޅުމަށް ވޯޓަށް އެއްސެވުމުން ކޮމިޓީގެ އަޢުލަބީއްޔަތުން މި ހުށަހެޅުން ފާސްވިއެވެ. ދެން ކުރިއަށް ގެންދެވީ، ޕްރޮސިކިއުޓަރ ޖެނެރަލްގެ އޮފީހުން ފޮނުވާފައިވާ ސިޓީއާ ގުޅޭގޮތުން މަޝްވަރާކުރުމެވެ. މި ސިޓީގައިވާ ކަންކަމާ ގުޅޭގޮތުން ޕްރޮސެކިއުޓާ ޖެނެރަލް، އެސެޓް ރިކަވަރީ ކޮމިޝަން އަދި އެންޓި ކޮރަޕްޝަން ކޮމިޝަނާ އެކު ބައްދަލުވުމެއް ބޭއްވުމަށް ގަމު ދާއިރާގެ މެންބަރު މުޙައްމަދު ވިސާމް ހުށަހަޅުއްވާ ވިލިމާލެ ދާއިރާގެ މެންބަރު އަޙްމަދު އުޝާމް ތާއީދުކުރެއްވިއެވިއެވެ. މި ހުށަހެޅުމަށް ވޯޓަށް އެއްސެވުމުން ކޮމިޓީގެ އަޢުލަބީއްޔަތުން މި ހުށަހެޅުން ފާސްވިއެވެ. މިސިޓީ އަކީ ސިއްރު ސިޓީއެއްކަމުން މި ސިޓީގެ މަސައްކަތް ކުރިއަށް ގެންދެވީ ކޮމިޓީގެ ބައްދަލުވުން ސިއްރުކޮށްގެންނެވެ. އެއަށްފަހު، އެންޓި-ކޮރަޕްޝަން ކޮމިޝަނުން، މިނިވަން މުއައްސަސާތަކުގެ ކޮމިޓީއާއެކު ބޭއްވުމަށް ހަމަޖެހިފައިވާ ބައްދަލުވުން ވަރޗުއަލްކޮށް ކުރިއަށް ގެންގޮސް ދެއްވުމަށް އެދި އެންޓި-ކޮރަޕްޝަން ކޮމިޝަނުން ފޮނުވާފައިވާ ސިޓީއާ މެދު މަޝްވަރާކުރެވުނެވެ. ރައްޔިތުންގެ މަޖިލީހުގެ މަސައްކަތްތައްވެސް ވަރޗުއަލް ކޮށްކުރިއަށް ނުގެންދާތީ އެކޮމިޝަން، 11 އޮގަސްޓް 2020 މެންދުރު 2 އަށް މަޖިލީހަށް ހާޒިރުވެ ޖަވާބުދާރީވުމަށް ދެންނެވުމަށް ހެންވޭރު ދެކުނު ދާއިރާގެ މެންބަރު ޙުސައިން ޝަހީމް ހުށަހަޅުއްވާ ގަލޮޅު ދެކުނު ދާއިރާގެ މެންބަރު މީކާއީލް އަޙްމަދު ނަސީމް ތާއީދުކުރެއްވިއެވެ. މި ހުށަހެޅުމަށް ވޯޓަށް އެއްސެވުމުން ކޮމިޓީގެ އިއްތިފާޤުން މި ހުށަހެޅުން ފާސްވިއެވެ. އެއަށްފަހު ދެން ކުރިއަށް ގެންދެވީ، ސިވިލް ސަރވިސް ކޮމިޝަންގެ ހުސްވެފައިވާ 4 މެންބަރުންގެ މަޤާމަށް މީހުން ޢައްޔަނުކުރުމުގެ މައްސަލައެވެ. މިގޮތުން މި މައްސަލަ ނިންމާނެ ސުންގަޑި އަކީ 23 އޮގަސްޓް 2020 ކަމަށާއި، ކުރިމަތިލައްވާފައިވާ ފަރާތްތަކާ ގުޅޭ ޝަކުވާއެއް އޮތްތޯ ބެލުމަށް 16 އޮގަސްޓް 2020 ހެނދުނު 9:00 ގެ ނިޔަލަށް ހުޅުވާލުމަށާއި، އިންޓަވިއުކުރާނެ ދުވަސްތަކަކީ 16 އޮގަސްޓް އިން 19 އޮގަސްޓަށް ކަމަށާއި ޝަރުތު ހަމަވޭތޯ ބެލުމަށް އެކުލަވާ ޕެނަލްއަކީ އަޙްމަދު ނާޒިމް މުޙައްމަދު، ޝަހުޒާދު ސައީދު އަދި ފާތުމަތު ނަދާ ކަމަށް ވިލިމާލެ ދާއިރާގެ މެންބަރު އަޙްމަދު އުޝާމް ހުށަހަޅުއްވާ ހެންވޭރު ދެކުނު ދާއިރާގެ މެންބަރު ޙުސައިން ޝަހީމް ތާއީދުކުރެއްވިއެވެ. މި ހުށަހެޅުމަށް ވޯޓަށް އެއްސެވުމުން ކޮމިޓީގެ އިއްތިފާޤުން މި ހުށަހެޅުން ފާސްވިއެވެ.

ބައްދަލުވުމުގައި ކުރެވުނު މަސައްކަތްތައް

21 އޮކްޓޯބަރު 2020 - މޯލްޑިވްސް ބްރޯޑްކާސްޓިންގ ކޮމިޝަންގެ މެންބަރު ޤާނޫނު ގޮތުން އަދާކުރަމްޖެހޭ ޒިންމާ އަދާކުރުމުގައި އިހުމާލުވެފައިވާ މައްސަލަ ކޮމިޓީން ދިރާސާކޮށް ނިންމިގޮތުގެ ރިޕޯޓު

23 އޯގަސްޓު 2020 - ސިވިލް ސަރވިސް ކޮމިޝަންގެ 4 މެންބަރުންގެ މަޤާމް ހުސްވުމާގުޅިގެން، އެ 4 މެންބަރުންގެ މަޤާމަށް ކުރިމަތިލެއްވި ފަރާތްތަކުގެ ނަންފުޅުތައް، މިނިވަން މުއައްސަސާތަކުގެ ކޮމިޓީން ދިރާސާކޮށް ނިންމިގޮތުގެ ރިޕޯޓު

10 އޯގަސްޓު 2020 - މޯލްޑިވްސް މީޑިއާ ކައުންސިލް އަދި މޯލްޑިވްސް ބްރޯޑްކާސްޓިންގ ކޮމިޝަން އެއްކޮށްލުމާ ގުޅޭ މަސައްކަތް

2 ޖުލައި 2020 - ޕްރޮސެކިއުޓަރ ޖެނެރަލް އޮފީހުގެ ނަންބަރ: 36/2020/57/PBG-196 (2 ޖުލައި 2020) ސިޓީން އެންޓި-ކޮރަޕްޝަން ކޮމިޝަންގެ މައްސަލަތަކުގެ ތަފާސް ހިސާބާ ގުޅޭގޮތުން ފޮނުއްވާފައިވާ ސިޓީ