މިއަދުގެ ބައްދަލުވުމުގައި ފުރަތަމަ ކަމަކަށް ރައްޔިތުންގެ މަޖިލީހު އިދާރާއިން ފޮނުވާފައިވާ މެމޯމުއަކުން މޯލްޑިވްސް މަނިޓަރީ އޮތޯރިޓީގެ ފައިނޭންޝަލް އިންޓެލިޖެންސް ޔުނިޓް އިން އެންޓި-ކޮރަޕްޝަން ކޮމިޝަނަށް ފޮނުއްވާފައިވާ 3 ރިޕޯޓުގެ މަސައްކަތް ގޮސްފައިވާ ހިސާބާ ގުޅޭގޮތުން އެ ކޮމިޝަން އިން ފޮނުއްވާފައިވާ ސިޓީއާ ގުޅޭ މައްސަލަ ކުރިއަށް ގެންދާނެގޮތަކާމެދު މަޝްވާކުރެވުނެވެ. މިގޮތުން މި ރިޕޯޓުގެ ތަޙްޤީޤު ނިންމޭނެ ތާރީޚެއް މިކޮމިޓީއަށް އެންގުމަށް އެންޓި-ކޮރަޕްޝަން ކޮމިޝަނަށް ސިޓީއަކުން ދެންނެވުމަށް ނިންމެވިއެވެ. އެއަށްފަހު މުއައްސަސާތަކުގެ އަހަރީ ރިޕޯޓާ ގުޅިގެން އޮޑިޓަރ ޖެނެރަލް އޮފީހުން ފޮނުއްވާފައިވާ ރެކޮމެންޑޭޝަންތައް ދިރާސާކުރުމުގެ މަސައްކަތްކުރިއަށް ގެންދެވުނެވެ. މިގޮތުން، ސިވިލް ސަރވިސް ކޮމިޝަން، މޯލްޑިވްސް މީޑިއާ ކޮމިޝަން އަދި އެންޓި-ކޮރަޕްޝަން ކޮމިޝަނުގެ 2019 ވަނަ އަހަރުގެ އަހަރީ ރިޕޯޓު ދިރާސާކުރެއްވުމަށްފަހު އޮޑިޓަރ ޖެނެރަލް އޮފީހުން ފޮނުއްވާފައިވާ ރެކޮމެންޑޭޝަންތައް ސިޓީއަކުން އެ ކޮމިޝަންތަކާ ހިއްސާކުރެއްވުމަށް ނިންމެވިއެވެ. ދެން ކުރިއަށް ގެންދެވީ، މޯލްޑިވްސް ބްރޯޑްކާސްޓިންގ ކޮމިޝަންގެ މެންބަރު ޒީނާ ޒާހިރު މަގާމުން ވަކިކުރުމުގެ މައްސަލަ ނިންމާނެ ސުންގަޑި ކަނޑައެޅުމެވެ. މިގޮތުން މި މައްސަލަ ނިންމާނެ ސުންގަޑިއަކީ 18 އޮކްޓޫބަރު ކަމަށް ވިލިމާލެ ދާއިރާގެ މެންބަރު އަޙްމަދު އުޝާމް ހުށަހަޅުއްވާ އިނގުރައިދޫ ދާއިރާގެ މެންބަރު ޙަސަން އަޙްމަދު ތާޢީދުކުރެއްވިއެވެ. މި ހުށަހެޅުމަށް ވޯޓަށް އެއްސެވުމުން ކޮމިޓީގެ އިއްތިފާޤުން މި ހުށަހެޅުން ފާސްވިއެވެ.