މިއަދުގެ ބައްދަލުވުމުގައި ބިދޭސީ މަސައްކަތްތެރިންނަށް ދެމުން އައި ރަލާއި އޫރު މަހުގެ ކޯޓާ ދޫކުރުން މިހާރު ހުއްޓާލާފައި އޮތް އޮތުން ނިމުމަކަށް ގެނެސް އަލުން އެ ކޯޓާ ދޫކުރުމަށް ގަވާއިދަށް ގެންނަންޖެހޭ ބަދަލުތައް ގެނައުމަށް ކާށިދޫ ދާއިރާގެ މެންބަރު ޢަބްދުﷲ ޖާބިރު ގަވާއިދު ކޮމިޓީއަށް ފޮނުއްވާފައިވާ މައްސަލަ ދިރާސާކުރެއްވިއެވެ. އެގޮތުން ފޭދޫ ދާއިރާގެ މެންބަރު މުޙައްމަދު ނިހާދު ހުށަހެޅުއްވީ މި ގަވާއިދު އިސްލާޙުކުރަން ނުފެންނަކަމަށް ނިންމަވާ، މިކަމާ ގުޅޭ އިދާރާތަކަށް ސިޓީ ފޮނުއްވައިގެން ކުރިއަށް ގެންދެވުމަށް މައްސަލަ ހުށަހެޅުއްވި މެންބަރަށް ސިޓީ ފޮނުއްވުމަށެވެ. މި ހުށަހެޅުއްވުމަށް ތުލުސްދޫ ދާއިރާގެ މެންބަރު އިބްރާހީމް ނަސީމް ތާއިދުކުރެއްވިއެވެ. މި ހުށަހެޅުއްވުމަށް ވޯޓަށް އެއްސެވުމުން ކޮމިޓީގައި އެވަގުތު ހާޒިރުވެވަޑައިގެން ތިއްބެވި މެންބަރުންގެ އިއްތިފާޤުން މި ހުށަހެޅުއްވުން ފާސްވިއެވެ.