މިއަދުގެ ބައްދަލުވުމުގައި ފުރަތަމަ ކުރިއަށް ގެންދެވީ، ރައްޔިތުންގެ މަޖިލީހުގެ ރައީސް ފޮނުއްވާފައިވާ ދިވެހިރާއްޖޭގެ ޤާނޫނުއަސާސީގެ 99 ވަނަ މާއްދާގެ (ނ) ގެ ދަށުން މުއައްސަސާތަކުންނާއި މީސްމީހުން ހުށަހަޅާ ޝަކުވާތަކާއި އިލްތިމާސްތަކާއި އެހެނިހެން ހުށަހެޅުންތަކާއި މެދު އަމަލުކުރާނެ ގޮތުގެ އުސޫލާއި އެއްގޮތަށް ކޮމިޓީން އަމަލުކުރުމަށް ނިންމެވިއެވެ. އެއަށްފަހު ދެން ކުރިއަށް ގެންދެވީ، ކޮމިޓީއަށް ފޮނުއްވާފައިވާ ސިޓީތަކާއި މެދު ގޮތެއް ނިންމެވުމެވެ. އެގޮތުން؛ 1. ވޯލްޑް ބޭންކްގެ ހިލޭ އެހީގެ ދަށުން މިނިސްޓްރީ އޮފް ފިޝަރީޒް އިން ކުރިއަށްގެންދާ ޕްރޮޖެކްޓެއްގެ މަސައްކަތް ކުރަމުންދާ މުވައްޒަފުންތަކަކަށް ނޯޓިސް ދިނުމަށްފަހު، ވަޒީފާއިން ވަކިކުރުމަށް ނިންމާފައިވާތީ އެކަމުގެ ހައްލެއް ހޯއްދަވައި ދެއްވުމަށް އެދި ނަން ހާމަ ނުކޮށް އަމިއްލަ ފަރާތަކުން ފޮނުއްވާފައިވާ ސިޓީ؛ މި ސިޓީއާއި ގުޅިގެން މިނިސްޓްރީ އޮފް ފިޝަރީޒްއިން ސާފުކޮށްފައިވާ މަޢުލޫމާތުތަކަށް ބަލާއިރު މި މައްސަލަ އެ މިނިސްޓްރީން ކުރިއަށް ގެންގޮސްފައިވަނީ ރަނގަޅަށްކަމަށްވާތީ، މިމައްސަލަ އިތުރަށް ކުރިއަށް ނުގެންދެވުމަށް ނިންމެވިއެވެ. 2. ހއ. ދިއްދޫގައި ޢިމާރާތްކޮށްފައިވާ 250 ހައުސިންގ ޔުނިޓާއި ގުޅިގެން ހއ. ދިއްދޫ ކައުންސިލުގެ އިދާރާއިން ފޮނުއްވާފައިވާ މައްސަލަ؛ މި މައްސަލާގައި ކޮރަޕްޝަންގެ ޢަމަލުތަކެއް ހިމޭނެކަމަށް ފާހަގަކޮށްފައިވާތީ، އޭ.ސީ.ސީއިން މިމައްސަލައާއި ގުޅޭ ގޮތުން މަޢުލޫމާތު ސާފުކުރެއްވުމަށް ނިންމެވިއެވެ. 3. ޤާނޫނު ނަންބަރު 2014/1 (މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނު) ގައިވާގޮތުގެމަތިން ބައެއް ވުޒާރާތަކުން މަޢުލޫމާތު ހޯދުމުގައި ދަތިތަކެއް ކުރިމަތިވާކަމަށްވިދާޅުވެ، އިންފޮމޭޝަން ކޮމިޝަނަރ މިނިވަން މުއައްސަސާތަކުގެ ކޮމިޓީއާ ޙިއްޞާ ކުރައްވާފައިވާތީ، އިންފޮމޭޝަން ކޮމިޝަނަރއަށް އެއްބާރުލުންދެއްވުމަށް އެދި ސަރުކާރުގެ ވުޒާރަކުގައި ދަންނަވައިދެއްވުން އެދި މިނިވަން މުއައްސަސާތަކުގެ ކޮމިޓީން ފޮނުއްވާފައިވާ ސިޓީ؛ އިންފޮމޭޝަން ކޮމިޝަނަރުގެ އޮފީހުން ނެރުއްވާފައިވާ އަމުރަށް މިނިސްޓްރީ އޮފް ޓޫރިޒަމްއިން ނުކިޔަމަންތެރިވެފައިވާތީ، ޤާނޫނު ނަންބަރު 2014/1 (މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނު) ގެ 61 ވަނަ މާއްދާގެ (ހ) ގެ 12 ވަނަ ނަންބަރުގައި ބަޔާންކޮށްފައިވާފަދައިން އެ މައްސަލަ ތަޙްޤީޤުކުރުމަށްޓަކައި މޯލްޑިވްސް ޕޮލިސް ސަރވިސްއަށް 16 އޮގަސްޓް 2020 ގައި ހުށަހަޅުއްވާފައިވާކަމަށާއި އަދި މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނުން އިންފޮމޭޝަން ކޮމިޝަނަރަށް ލިބިދީފައިވާ ބާރުގެ ދަށުން މަސައްކަތް ކުރައްވަމުން ގެންދަވާތީ، އެ މައްސަލަ އިތުރަށް ކޮމިޓީން ކުރިއަށް ނުގެންދިއުމަށް ކޮމިޓީން ނިންމާފައިވާކަން މިނިވަން މިނިވަން މުއައްސަސާތަކުގެ ކޮމިޓީއަށް އެންގުމަށް ނިންމެވިއެވެ. 4. މިނިސްޓްރީ އޮފް ހެލްތްއިން ކޮވިޑް އާ ގުޅިގެން ހިންގާފާއިވާ ބައެއް މުޢާމަލާތްތަކުގައި ފާހަގަކުރެވޭ މައްސަލަތަކެއް ހިމެނޭކަމަށް ބަޔާންކޮށް ޤާނޫނު ނަންބަރު 2019/16 (ވިސްލްބްލޯކުރާ ފަރާތްތައް ރައްކާތެރިކުރުމުގެ ޤާނޫނު) އިން ލިބިދޭ ރައްކާތެރިކަމުގެ ދަށުން އާންމު ފަރާތަކުން ރައްޔިތުންގެ މަޖިލީހުގެ އިދާރާއަށް ފޮނުއްވާފައިވާ މައްސަލަ؛ މި މައްސަލާގައި ކޮރަޕްޝަންގެ ޢަމަލުތަކެއް ހިމެނިފައިވާތީ، އެ ކަންކަން ދިރާސާކުރުމަށްޓަކައި މާލިއްޔަތު ކޮމިޓީއަށް ފޮނުވުމަށް ނިންމެވިއެވެ. އަދި މި މައްސަލައިގައި މުވައްޒަފުންނާ ގުޅޭގޮތުން ހުށަހަޅުއްވާފައިވާ ކަންކަން މިނިސްޓްރީ އޮފް ހެލްތް އިން ސާފުކުރެއްވުމަށް ވެސް ނިންމެވިއެވެ.
ބައްދަލުވުމުގެ އެޖެންޑާ ބައްދަލުވުމުގެ ޔައުމިއްޔާ ބައްދަލުވުމުގެ ޚާޒިރީ© 2024 ރައްޔިތުންގެ މަޖިލިސްގެ އިދާރާA