ޚުލާސާ

1. މިއަދުގެ ބައްދަލުވުމުގައި ފަނޑިޔާރުންގެ އިންޝުއަރެންސްގެ ޚިދުމަތް މެދުކެނޑުނު މުއްދަތު (01 ޖެނުއަރީ 2012 އިން 15 ނޮވެންބަރު 2012 އަށް) ގައި ފަނޑިޔާރުންނާއި، އެބޭފުޅުންގެ ޑިޕެންޑެންޓުންގެ ބޭސްފަރުވާއަށް ޚަރަދުވެފައިވާ ފައިސާ ހޯއްދެވުމަށް ތަކުރާރުކޮށް ފަނޑިޔާރުން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނަށް ހުށަހަޅުއްވަމުންދާތީ، އެބޭފުޅުންނަށް ދައުލަތުގެ ބަޖެޓުގެ ތެރެއިން އެފައިސާ ރީއެމްބަރސް ކޮށްދިނުމުގައި ޢަމަލުކުރަންވީގޮތުގެ ލަފާފުޅަކަށް އެދި އެ ޑިޕާޓްމަންޓުން ފޮނުއްވާފައިވާ ނަންބަރު 198-A/57/2019/19 (22 ސެޕްޓެންބަރު 2019) ސިޓީއާމެދު މަޝްވަރާކުރެއްވިއެވެ. މެންބަރުންގެ މަދުގައި ކުރެވުނު މަޝްވަރާތަކަށްފަހު ނިންމެވީ، ކޮމިޓީގެ މަސްޢޫލިއްޔަތުގެ ދާއިރާގައި ހިމެނެނީ ހެލްތް އިންޝުއަރެންސް ޕްރިމިއަމް ކަނޑައެޅުއްވުން ކަމަށާއި ބޭސްފަރުވާއަށް ޚަރަދުވެފައިވާ ފައިސާއަށް ބަދަލު ހޯދައިދިނުން ކޮމިޓީގެ މެންޑޭޓްގައި ހިމެނިފައި ނުވާކަމަށް އެ ޑިޕާޓްމަންޓަށް ދެންނެވުމަށެވެ. 2. އެއަށްފަހު، ކޮންޓްރެކްޓް އުޞޫލުން ބިޑް ކާމިޔާބުކޮށް އެގްރީމަންޓްގައި އެއްބަސްވެފައިވާ ގޮތުން އެމަހަކަށް ހަލާލުވާ ފައިސާ މަސް ނިމުމުގެ ކުރިން އެފައިސާ އެކައުންޓަށް ޖަމާވެ، ފައިސާ ނުލިބޭ މައްސަލަ ތަކުރާރު ވިޔަނުދީ، ކަށަވަރު ކަމާއެކު ޔަޤީން ކުރުމަށްޓަކައި ގަވާއިދެއް ނުވަތަ ބިލެއް ފާސްކޮށްދެއްވުމުގެ މުހިއްމުކަން ފާހަގަކޮށް ތަންހަޅި އިންވެސްޓްމަންޓް އިން 16 ސެޕްޓެންބަރު 2019 ގައި ފޮނުއްވާފައިވާ ސިޓީއާމެދު މަޝްވަރާކުރެއްވުމަށްފަހު، މި މައްސަލައަކީ އާންމުކޮށް ކުރިމަތިވަމުންދާ މައްސަލައަކަށްވާތީ، ސަރުކާރުގެ ވުޒާރާތަކާއި މަޝްވަރާކުރައްވައިގެން މިކަމަށް ޙައްލެއް ހޯއްދެވުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން މަސައްކަތްކުރައްވާނެކަމަށް އެ ފަރާތަށް ދެންނެވުމަށެވެ. މީގެ އިތުރުން، ސަރުކާރުގެ އިދާރާތަކުން އެކި އެކި މަޝްރޫޢުތައް އަމިއްލަ ފަރާތްތަކުންނާއި ކުދި އަދި މެދު ފަންތީގެ ވިޔަފާރިތަކުން ކުރުވުމަށްފަހު، އެ ފަރާތްތަކަށް ދައުލަތުން ދައްކަންޖެހޭ ފައިސާ ދައްކަމުން ނުދިއުމާއި، އެ އެކަމުގެ ސަބަބުން އެ ފަރާތްތަކަށް ދަތިތަކާ ކުރިމަތިވަމުންދާ މައްސަލައިގައި މިނިސްޓްރީ އޮފް ފިނޭންސްއިން ތިރީގައި ދެންނެވިފައިވާ މަޢުލޫމާތުތައް ސާފުކުރެއްވުމަށް ނިންމެވިއެވެ. 1. މިހާތަނަށް ސަރުކާރުގެ އިދާރާތަކުން އެކި އެކި މަޝްރޫޢުތައް އަމިއްލަ ފަރާތްތަކުންނާއި ކުދި އަދި މެދު ފަންތީގެ ވިޔަފާރިތަކަށް ސަރުކާރުން ދައްކަންޖެހޭ ފައިސާގެ ޢަދަދު (ސަރުކާރުން ފައިސާ ދައްކަންޖެހޭ ފަރާތްތަކާއި އެފަރާތްތަކަށް ދައްކަންޖެހޭ ފައިސާގެ ޢަދަދު ވަކިވަކިން އެނގޭގޮތަށް)؛ 2. މިހާތަނަށް ސަރުކާރުގެ އިދާރާތަކުން އެކި އެކި މަޝްރޫޢުތައް އަމިއްލަ ފަރާތްތަކުންނާއި ކުދި އަދި މެދު ފަންތީގެ ވިޔަފާރިތަކަށް ފައިސާ ނުދައްކާ ސަބަބު؛ 3. ސަރުކާރުން އަމިއްލަ ފަރާތްތަކަށާއި، އަދި އެހެނިހެން ފަރާތްތަކަށް ފައިސާ ދޫކުރުމުގައި ގެންގުޅުއްވާ އުޞޫލު؛ 4. މިފަދަ މައްސަލަތައް ތަކުރާރުވިޔަ ނުދިއުމަށްޓަކައި މިހާތަނަށް އަޅުއްވާފައިވާ ފިޔަވަޅުތަކުގެ ތަފްޞީލް.

ބައްދަލުވުމުގައި ކުރެވުނު މަސައްކަތްތައް

22 ސެޕްޓެމްބަރު 2019 - ފަނޑިޔާރުންނާއި، އެބޭފުޅުންގެ ޑިޕެންޑެންޓުންގެ ބޭސްފަރުވާއަށް ޚަރަދުވެފައިވާ ފައިސާ ރީއެމްބަރސް ކޮށްދިނުމުގައި ޢަމަލުކުރަންވީގޮތުގެ ލަފާފުޅަކަށް އެދި

16 ސެޕްޓެމްބަރު 2019 - އިބްރާހީމް މުސާފުޅު ފޮނުއްވާފައިވާ ސިޓީ