މިއަދުގެ ބައްދަލުވުމުގައި، ކޮމިޓީއަށް ލިބިފައުވާ މައްސަލަތަކާގުޅޭގޮތުން މަޝްވަރާކުރެވުނެވެ. އެގޮތުން އިލެކްޝަންސް ކޮމިޝަންގެ ހުސްވެފައިވާ މެންބަރުކަމުގެ މަޤާމަށް މެންބަރަކު އައްޔަނުކުރުމަށް ހުށަހެޅިފައިވާ މައްސަލަ ކުރިއަށް ގެންދާނެގޮތަކާމެދު މަޝްވަރާކުރުމަށް ފުރުސަތު ހުޅުވާލުމުން އެ މައްސަލަ ނިންމާނެ ސުންގަޑި އަކީ 11 ފެބްރުވަރީ 2021 ވާ ބުރާސްފަތި ދުވަސް ކަމަށާއި، ނަން ހުށަހެޅިފައިވާ ފަރާތާގުޅޭގޮތުން އާންމުންގެ ޝަކުވާއެއް ވޭތޯ ބެލުމަށް މިއަދުން ފެށިގެން 10 ފެބްރުވަރީ 2021 ގެ 13:30 ގެ ނިޔަލަށް ހުޅުވާލުމަށާއި ޝަރުތުހަމަވޭތޯ ބެލުމަށް ޕެނަލްއަކީ ނާޒިމް، ޝަހުޒާދު އަދި ނަދާ ކަމަށާއި ނަން ހުށަހެޅިފައިވާ ފަރާތާ އިންޓަވިއުކުރުން 10 ފެބްރުވަރީ 2021 14:00 ގައި ބޭއްވުމަށް ވެލިދޫ ދާއިރާގެ މެންބަރު ހުށަހަޅުއްވާ ބިލެތްދޫ ދާއިރާގެ މެންބަރު އަޙްމަދު ޙަލީމް ތާޢީދުކުރެއްވިއެވެ. މި ހުށަހެޅުން ކޮމިޓީގެ އިއްތިފާޤުން ފާސްކުރެވުނެވެ. އެއަށްފަހު، ދެން ކުރިއަށް ގެންދިއައީ މޯލްޑިވްސް ބްރޯޑްކާސްޓިންގ ކޮމިޝަން ހުސްވެފައިވާ މެންބަރުކަމުގެ މަޤާމަށް މެންބަރަކު އައްޔަނުކުރުމަށް ހުށަހެޅިފައިވާ މައްސަލައެވެ. މިގޮތުން މި މައްސަލަ ނިންމާނެ ސުންގަޑި އަކީ 16 ފެބްރުވަރީ 2021 ކަމަށާއި، ނަން ހުށަހެޅިފައިވާ ފަރާތާގުޅޭގޮތުން ޝަކުވާއެއް އޮތްތޯ ބެލުމަށް 15 ފެބްރުވަރީ 2021 ގެ ހެނދުނު 10:00 ގެ ނިޔަލަށް ހުޅުވާލުމަށާއި، އިންޓަވިއުކުރާނެ ދުވަސްތަކަކީ 14 ފެބްރުވަރީ އަދި 15 ފެބްރުވަރީ 2021 އަށް ކަމަށާއި ޝަރުތު ހަމަވޭތޯ ބެލުމަށް އެކުލަވާ ޕެނަލްއަކީ އަޙްމަދު ނާޒިމް މުޙައްމަދު، ޝަހުޒާދު ސައީދު އަދި ފާތުމަތު ނަދާ ކަމަށް ވެލިދޫ ދާއިރާގެ މެންބަރު ހުށަހަޅުއްވާ އިނގުރައިދޫ ދާއިރާގެ މެންބަރު ޙަސަން އަޙްމަދު ތާއީދުކުރެއްވިއެވެ. މި ހުށަހެޅުމަށް ވޯޓަށް އެއްސެވުމުން ކޮމިޓީގެ އިއްތިފާޤުން މި ހުށަހެޅުން ފާސްވިއެވެ. އެއަށްފަހު، މޯލްޑިވްސް ބްރޯޑްކާސްޓިންގ ކޮމިޝަން އާއި މޯލްޑިވްސް މީޑިއާ ކައުންސިލް އެއްކޮށްލުމުގެ ބިލު އަދިވެސް މަޖީލީހަށް ހުށަހެޅިފައިވާ ނުވާތީ އެބިލުގެ މަސައްކަތް މިހާރު ގޮސްފައިވާ ހިސާބަކާއި އެ ބިލު މަޖިލީޙަށް ހުށަހެޅޭނެ ތާރީޚަކީ ކޮބައިކަން އޮޅުންފިލުވުމަށް އެޓަރނީ ޖެނެރަލްއަށް ސިޓީއެއް ފޮނުވުމަށް އިނގުރައިދޫ ދާއިރާގެ މެންބަރު ޙަސަން އަހްމަދު ހުށަހަޅުއްވާ ބިލެތްދޫ ދާއިރާގެ މެންބަރު އަޙްމަދު ޙަލީމް ތާޢީދުކުރެއްވިއެވެ. މި ހުށަހެޅުން ކޮމިޓީގެ އިއްތިފާޤުން ފާސްކުރެވުނެވެ.