މިއަދުގެ ބައްދަލުވުމުގައި އެންމެ ފުރަތަމަ، ދިވެހިރާއްޖޭގެ މުވާސަލާތީ ޚިދުމަތްތައް ބެލެހެއްޓުމުގެ ޒިންމާ ޙަވާލުކުރެވިފައިވާ ފަރާތުން، ނުހަނު ދިގު މުއްދަތަކަށް ދިވެހިރާއްޖޭގައި ހަދާފައިވާ ޤާނޫނުތަކަށް ބެލުމެއްނެތި، ޓެލެކޮމް އޮޕަރޭޓަރުންގެ މަންފާއަށް ފަހިވާގޮތަކަށް، ރައްޔިތުންނަށް ނުހަނު ގެއްލުންވަމުންދާ މަގުން، ގިނަގުނަ ކަންތައްތަކެއް ތަރުތީބު ކޮށްފައިވާކަމަށް ފާހަގަކުރައްވައި، އެކަންކަން ނިމުމަކަށް ގެނައުމަށް ގޮވާލައްވައި ހުށަހަޅުއްވާފައިވާ ޤަރާރު ދިރާސާކުރެއްވިއެވެ. އެގޮތުން، ގަވާއިދު ނަންބަރު 2021/R035 (ކޮމިއުނިކޭޝަންސް އޮތޯރިޓީ އޮފް މޯލްޑިވްސްގެ ހިންގާ ގަވާއިދު) ގައި ކޮމިއުނިކޭޝަންސް އޮތޯރިޓީ އޮފް މޯލްޑިވްސްއިން ދޫކުރާ ޚިދުމަތްތަކަށް ނެގޭ ފީގެ މިންވަރާއި ފީ ނެގޭނެ އުސޫލު ހިމަނާފައިނުވާ ސަބަބާއި، ޤާނޫނު ނަންބަރު 42/2015 (ކޮމިއުނިކޭޝަންސް އޮތޯރިޓީ އޮފް މޯލްޑިވްސްގެ ޤާނޫނު) ގެ 33 ވަނަ މާއްދާގައިވާ ފަދައިން ފީ ނެގޭނެ މިންވަރާއި އުސޫލު އެ ގަވާއިދުގައި ހިމަނައި އެ ގަވާއިދު އިޞްލާޙުކުރުމަށް ހޭދަވާނެކަމަށް ލަފާކުރެވޭ މުއްދަތު ސާފުކުރުމަށް އެ އޮތޯރިޓީއަށް ސިޓީ ފޮނުއްވުމަށް ނިންމެވިއެވެ. އެއަށްފަހު، ކުރެންދޫ ދާއިރާގެ މެންބަރު އަބްދުލް ޣަނީ އަބްދުލްޙަކީމް ހުށަހަޅުއްވައި ޤަރާރުގެ ސުންގަޑީގެ ގޮތުގައި ގޮތުގައި 07 ޖުލައި 2021 ކަނޑައެޅުއްވިއެވެ. އަދި، އައި.ސީ.ޓީ މައްސަލައިގެވެސް ސުންގަޑި އިތުރުކުރައްވައި ސުންގަޑީގެ ގޮތުގައި 07 ޖުލައި 2021 ކަނޑައެޅުއްވިއެވެ. މި ހުށަހެޅުއްވުމަށް ހޮޅުދޫ ދާއިރާގެ މެންބަރު ޔޫނުސް ޢަލީ ތައީދުކުރައްވަވައި ކޮމިޓީގެ އިއްތިފާޤުން ފާސްކުރެއްވިއެވެ.