ދިވެހިރާއްޖޭގެ ފޮރިން ސަރވިސްގެ ބިލުގެ މަސައްކަތް ކުރިއަށް ގެންދާނެ ގޮތަކަމާމެދު މަޝްވަރާކުރެއްވިއެވެ. އެގޮތުން ބިލާ ގުޅޭ އިތުރު މަޢުލޫމާތު ސާފުކުރުމަށް ކަމާގުޅުން ހުރި އިދާރާތަކާ ބައްދަލުކުރުމަށް ނިންމެވިއެވެ. އެއަށްފަހު، ރަސްމީކޮށް ވަޒީފާއަދާނުކުރާ ފަރާތްތަކަށް ޑިޕްލޮމެޓިކް ޕާސްޕޯޓު ދީފައިވާތީ އެ މައްސަލަ ބެއްލެވުމަށް ވިލިމާލެ ދާއިރާގެ މެންބަރު އަޙްމަދު އުޝާމް ހުށަހަޅުއްވައި ވިލިފުށީ ދާއިރާގެ މެންބަރު ޙަސަން އަފީފް ތާއީދުކުރައްވައި މައްސަލައެއް ހުށަހެޅުއްވިއެވެ. މި މައްސަލައަށް ވޯޓަށް އެއްސެވުމުން އެވަގުތު ކޮމިޓީއަށް ހާޒިރުވެ ވަޑައިގެން ތިއްބެވި މެންބަރުންގެ އިއްތިފާޤުން މި މައްސަލަ ބެލުމަށް ވަނީ ފާސްވެފައެވެ. އަދި މީގެ އިތުރުން މި މައްސަލައާ ގުޅޭ މަޢުލޫމާތު ސާފުކުރުމަށް މިނިސްޓްރީ އޮފް ފޮރިންއެފެއާޒްއަށް ސިޓީ ފޮނުވުމަށް ކޮމިޓީން ނިންމެވިއެވެ.