މިބައްދަލުވުމުގައި 2022 ވަނަ އަހަރަށް ރައްޔިތުންގެ މަޖިލީހަށް ހުށަހަޅާފައިވާ ދައުލަތުގެ ބަޖެޓުގައި، އާމްދަނީގެ ގޮތުގައި 2022 ވަނަ އަހަރަށް ލިބޭނެކަމަށް ލަފާކޮށްފައިވާ ޢަދަދާއި، އޮފީސްތަކުގެ ބަޖެޓާއި، މިނިވަން މުއައްސަސާތަކުގެ ބަޖެޓާއި، ޕަބްލިކް ސެކްޓަރ އިންވެސްޓްމަންޓް ޕްރޮގްރާމްތަކާ ގުޅޭގޮތުން ކޮމިޓީގެ މެންބަރުންގެ މެދުގައި ފުޅާދާއިރާއެއްގައި މަޝްވަރާކުރެއްވުމަށް ބަޖެޓަށް ގެނެވުނު ބަދަލުތަކާއި އެކު ބަޖެޓް ފާސްކުރެއްވިއެވެ. އެގޮތުން؛  ޕީ.އެސް.އައި.ޕީގެ މަޝްރޫޢުތަކަށް ގެންނަ ބަދަލުގެ ގޮތުގައި 82 ރަށަށް ޖުމްލަ 57.422608 މިލިއަން ރުފިޔާ އިތުރުކުރުމަށް މަރަދޫ ދާއިރާގެ އިއްޒަތްތެރި މެންބަރު އިބްރާހީމް ޝަރީފް ހުށަހަޅުއްވައި ހަނިމާދޫ ދާއިރާގެ އިއްޒަތްތެރި މެންބަރު ޢަބްދުލްޣަފޫރު މޫސާ ތާއީދުކުރައްވާފައިވާ ހުށަހެޅުން އެ ވަގުތު ހާޒިރުވެ ތިބި މެންބަރުންގެ އިއްތިފާޤުން (27/12) ފާސްކުރިއެވެ.  މިނިވަން މުއައްސަސާތަކުގެ ބަޖެޓަށް ގެނެވުނު ބަދަލުތަށް؛ ރައްޔިތުންގެ މަޖިލީހުގެ އިދާރާ އަދި ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން، ސިވިލް ސަރވިސް ކޮމިޝަން، ފެމިލީ ޕްރޮޓެކްޝަން އޮތޯރިޓީ، އިންތިޤާލީ އިންސާފުގެ އޮމްބާޑްސްޕަރސަން އޮފީސް، އެންޓި-ކޮރަޕްޝަން ކޮމިޝަން، އިންފޮމޭޝަން ކޮމިޝަނަރުގެ އޮފީސް، މިނިސްޓްރީ އޮފް ފިނޭންސްގެ ޙާއްސަ ބަޖެޓު މި ބައިބަޔަށް ޖުމްލަ 16،433،418 ރުފިޔާ އިތުރުކުރުމަށް ތިނަދޫ އުތުރު ދާއިރާގެ އިއްޒަތްތެރި މެންބަރު ޢަބްދުލްމުޣުނީ ހުށަހަޅުއްވައި ދުވާފަރު ދާއިރާގެ އިއްޒަތްތެރި މެންބަރު އިސްމާޢީލް އަޙްމަދު ތާއިދުކުރައްވާފައިވާ ހުށަހެޅުން ކޮމިޓީގައި އެ ވަގުތު ހާޒިރުވެ ތިބި މެންބަރުންގެ އިއްތިފާޤުން (27/15) ފާސްކުރިއެވެ.  2022 އަހަރަށް ލަފާކުރާ ދައުލަތުގެ ބަޖެޓުގައި އާމްދަނީ އިތުރުކުރުމަށް މިނިސްޓްރީ އޮފް ފިނޭންސްއިން ހުށަހަޅުއްވާފައިވާގޮތަށް، އެ ވަގުތު ހާޒިރުވެ ތިއްބެވި މެންބަރުންގެ އިއްތިފާޤުން (27/15) ފާސްކުރިއެވެ.  2022 ވަނަ އަހަރު ލަފާކުރާ ދައުލަތުގެ ބަޖެޓަށް ރިކަމެންޑޭޝަންސްގެ ގޮތުގައި 10 ރިކަމެންޑޭޝަނެއް ހިމެނުމަށް އެ ވަގުތު ހާޒިރުވެ ތިބި މެންބަރުންގެ އިއްތިފާޤުން (27/15) ފާސްކުރިއެވެ. 1. އާސަންދަ ސްކީމުގެ ޚަރަދުތައް ދެމެހެއްޓެނިވި މިންވަރަކަށް ގެނެއުމަށާއި، މި ސްކީމް ހިންގުމުގައި ބޭކާރުވާ ޚަރަދުތައް ކުޑަކޮށް، އެފިޝެންސީ އިތުރުކޮށް، ރައްޔިތުންނަށް އޭގެ އެންމެ ފުރިހަމަ ނަފާ ފޯރުކޮށްދިނުމަށް އެކުލަވާލާފައިވާ އެކްޝަން ޕްލޭނާ އެއްގޮތަށް 2022 ވަނަ އަހަރު ތަންފީޒުކުރުމަށް ދެންނެވުމަށް؛ އަދި ޞިއްޙީ އިންޝުއަރެންސްގެ ޚަރަދު ނުވަތަ އާސަންދައިގެ ޚަރަދުގެ ތެރެއިން މެޑިކަލް ކޮންޒިއުމަބަލްސްއަށް ކުރާ ޚަރަދު ކުޑަކުރުމަށް ފެންނަކަމަށް ދަންނަވައި، އަދި ބޭހަށް އެންމެ މަތިން ކަނޑައެޅޭ އަގު ނުވަތަ މެކްސިމަމް ރީޓެއިލް ޕްރައިޒް ކަނޑައަޅައި، ބޭހަށް ކުރަންޖެހޭ ހޭދަ ކުޑަކުރުމުގެ މަސައްކަތް 2022 ވަނަ އަހަރުގެ ތެރޭގައި ތަންފީޒުކުރުމަށާއި، އާސަންދަ ސްކީމް ނަހަމަގޮތުގައި ބޭނުންކުރުން ފުރުޞަތު ނުދިނުމަށް ކުރަންޖެހޭ މަސައްކަތްކުރުމަށް ދެންނެވުމަށް ފެންނަކަމަށް؛ 2. ދައުލަތުގެ ބަޖެޓުން ދޭ އިންޑައިރެކްޓް ސަބްސިޑީތަކުގައި ހުރި އިންއެފިޝެންސީތައް ކުޑަކުރުމަށް ފެންނަކަމަށް ދަންނަވައި، އަދި އިންއެފިޝެންސީތަކުގެ ސަބަބުން ކުރިމަތިވާ "ޑެޑް ވެއިޓް ލޮސް" ނުވަތަ އިންއެފިޝެންސީތަކުގެ ސަބަބުން މުޅި މުޖުތަމަޢަށް ގެއްލިގެންދާ ބައިކުޑަކޮށް، ދައުލަތުގެ ބަޖެޓުން އިސްރާފުވާ ޚަރަދުތައް ކުޑަކުރުމަށް މިނިސްޓްރީ އޮފް ފިނޭންސަށް ދެންނެވުމަށް ފެންނަކަމަށް؛ 3. 2022 ވަނަ އަހަރުގެ ބަޖެޓު ފާސްކުރި ފަހުން ޤާނޫނުތަކަށް ގެނެވުނު ބަދަލުތަކާއެކު ޖުމުލަ 52.7 (ފަންސާސް ދޭއް ޕޮއިންޓް ހަތެއް) މިލިއަން ރުފިޔާ އަހަރުގެ ތެރޭގައި ބަޖެޓަށް އިތުރުކޮށްފައިވާކަމަށް ފާހަގަކުރެވިފައިވާތީ، އައު ޤާނޫނުތަކުން ގެނެވޭ ބަދަލުތަކުން އިތުރުވާ ޚަރަދު ޤާނޫނު ޑްރާފްޓްކުރުމުގެ މަރުޙަލާގައި ދެނެގަތުމަށާއި، ބަޖެޓުގައި ނުހިމެނޭ އައު ޕޮލިސީއެއް ނުވަތަ އައު ޤާނޫނެއް ފާސްވެއްޖެނަމަ، ދެން ފެށޭ ބަޖެޓު ސައިކަލްގެ ތެރެއިން އެ ޕޮލިސީ ނުވަތަ ޤާނޫނު ތަންފީޒުކުރުމަށާއި، އަހަރުގެ ތެރޭގައި ބަޖެޓުގައި ނުހިމެނޭ އައު ބިލެއް ފާސްވެއްޖެނަމަ، ސަޕްލިމެންޓަރީ ބަޖެޓަކާއެކު ބިލު ފާސްކުރުމުގެ އިންތިޒާމު ހަމަޖެއްސުމަށް ފެންނަކަމަށް؛ 4. ދައުލަތާ ދެކޮޅަށް ކުރާ ދަޢުވާތަކާ ގުޅިގެން އަންނަ ކޯޓު ޙުކުމުތަކުން ގެއްލުމުގެ ބަދަލުގެ ގޮތުގައި ދައުލަތުން ދައްކަންޖެހޭ ފައިސާގެ ހިރާސް ކުޑަކުރުމަށްޓަކައި، މަޝްރޫޢުތަކަށާއި ޚިދުމަތް ހޯދުމަށް ވެވޭ ކޮންޓްރެކްޓްތަކާގުޅޭ މައްސަލަތައް އިޞްލާޙުކުރުމަށާއި، ޕްރޮޖެކްޓުގެ ސްކޯޕާއި މުއްދަތާއި ދޭ ޚިދުމަތް ނުވަތަ މަޝްރޫޢުގެ ފެންވަރާމެދު ދައުލަތާއި ކޮންޓްރެކްޓް ޙަވާލުކުރެވޭ ފަރާތާދެމެދު ކޮންޓްރެކްޓް ސޮއިކުރުމުގެ ކުރިން އެއްބަސްވުމަށާއި، އަދި މަޝްރޫޢުތައް ހިނގާ މިންވަރު ބަލައި މޮނިޓަރކުރުމުގެ މަސައްކަތްތައް ހަރުދަނާކުރުމަށް ސަރުކާރުގެ އިދާރާތަކަށް ދެންނެވުމަށް ފެންނަކަމަށް؛ 5. 2022 ވަނަ އަހަރުގެ ތެރޭގައި ޖެންޑަރ ރެސްޕޮންސިވް ބަޖެޓިންގ (ޖީ.އާރ.ބީ) ގެ މަސައްކަތްތައް ފެށުމާއި، ބައެއް ދާއިރާތަކުގެ ޖެންޑަރ ރެސްޕޮންސިވް ބަޖެޓުތައް ޕައިލެޓްކޮށް ތައްޔާރުކުރުމަށް މިނިސްޓްރީ އޮފް ފިނޭންސް ގައި ދެންނެވުމަށް ފެންނަކަމަށް؛ 6. ބަޖެޓު ދިރާސާކުރާ ކޮމިޓީން އިންތިޤާލީ އޮމްބަޑްސްޕަރސަންގެ އޮފީހަށް އިތުރުކުރުމަށް ނިންމި މުވައްޒަފުންގެ ބަޖެޓާއެކު، ޤާނޫނު ނަންބަރު 2020/28 (އިންތިޤާލީ އިންސާފުގެ ޤާނޫނު) ގައި ބަޔާންކޮށްފައި މުއްދަތުގެ ތެރޭގައި އެ އޮފީހަށް މަތިކޮށްފައިވާ މަސްއޫލިއްޔަތުތައް އަދާކޮށް ނިންމުމަށް މަގުފަހިވާގޮތަށް ޢަމަލުކުރުމަށް އިންތިޤާލީ އޮމްބަޑްސްޕަރސަންގެ އޮފީހުގައި ދެންނެވުމަށް ފެންނަކަމަށް؛ 7. ބަޖެޓު ދިރާސާކުރާ ކޮމިޓީން މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމް.އެމް.ޕީ.އާރު.ސީ) ގެ މައްސަލަ ނިންމުމަށް އެންޓި-ކޮރަޕްޝަން ކޮމިޝަނަށް އިތުރުކުރުމަށް ނިންމި ބަޖެޓާއެކު، 2022 ވަނަ އަހަރުގެ ނިޔަލަށް އެމް.އެމް.ޕީ.އާރު.ސީގެ މައްސަލައިގެ ތަޙްޤީޤު ނިންމުމަށް މަސައްކަތްކުރުމަށް އެންޓި-ކޮރަޕްޝަން ކޮމިޝަނުގައި ދެންނެވުމަށް ފެންނަކަމަށް؛ 8. 2022 ވަނަ އަހަރުގެ ބަޖެޓުގެ ޚަރަދުތަކުގެ ތެރެއިން ސްކޫލުތަކާއި ޞިއްޙީ މަރުކަޒުތަކަށް ބަޖެޓުގައި ކަނޑައަޅާފައިވާ ޢަދަދު އެތަންތަނަށް ވަކިވަކިން ފެންނާނެ ގޮތް ހެދުމަށް އެދުމަށް ފެންނަކަމަށް' 9. ކުރިއަށް އޮތްތަނުގައި، ދައުލަތުގެ ބަޖެޓަށް އާމްދަނީ ހޯދުމަށް ހުށަހަޅަންޖެހޭ ބިލުތައް ދައުލަތުގެ ބަޖެޓާއެކު ހުށަހެޅުމަށް ދެންނެވުމަށް؛ 10. ޤާނޫނު ނަންބަރު 2010/7 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު) ގެ 79 ވަނަ މާއްދާގެ ދަށުން މިނިސްޓްރީ އޮފް ފިނޭންސްއިން ކަނޑައަޅާ ފިސްކަލް ފޯމިއުލާ ބޭނުންކޮށްގެން ދައުލަތުގެ ބަޖެޓުން ކައުންސިލްތަކަށް އެ އަހަރަކަށް ފާސްކުރާ ބަޖެޓުގައި އާމްދަނީގެ ގޮތުގައި އަންދާޒާކުރާ އާމްދަނީން މަދުވެގެން ލިބިދެވޭ 5 (ފަހެއް) އިންސައްތަ އާއި އެ ބްލޮކް ގްރާންޓް ދޭ އުސޫލަށް ބަދަލެއް ގެންނަންޖެހޭތޯ ރައްޔިތުންގެ މަޖިލީހުގެ މާލިއްޔަތު ކޮމިޓީން ދިރާސާކުރުމަށްފަހު، އިޞްލާޙެއް ގެންނަންޖެހޭނަމަ ރައްޔިތުންގެ މަޖިލީހުގެ ލާމަރުކަޒީ ކޮމިޓީއަށް ހުށަހެޅުމަށް. އެއަށްފަހު، 2022 ވަނަ އަހަރަށް މިނިސްޓަރ އޮފް ފިނޭންސްއިން ރައްޔިތުންގެ މަޖިލީހަށް ހުށަހަޅާފައިވާ 36.925،424،524 ބިލިއަން ރުފިޔާގެ ދައުލަތުގެ ބަޖެޓަށް ކޮމިޓީން ގެނައި އިޞްލާޙު ތަކުގެ ސަބަބުން އިތުރުވި 73.856026 ބިލިއަން ރުފިޔާއާއެކު 2022 ވަނަ އަހަރަށް ލަފާކުރާ ދައުލަތުގެ ބަޖެޓުގެ ޖުމްލަ އަދަދަކީ 36،999.280.550 ބިލިއަން ރުފިޔާ ކަމަށް ކަނޑައަޅާ، 2022 ވަނަ އަހަރަށް ފާސްކުރާ ބަޖެޓުގައިވާ ބަޖެޓު ބައިކުރެވޭ ގޮތް ނުވަތަ އެޕްރޮޕްރިއޭޝަން ސްޓްރަކްޗަރ އާއި އެއްގޮތަށް އަދި ބަޖެޓަށް ކޮމިޓީން ފާސްކޮށްފައިވާ ރެކޮމެންޑޭޝަންތަކާއެކު އެ ވަގުތު ހާޒިރުވެ ތިބި މެންބަރުންގެ އިއްތިފާޤުން (27/15) ފާސްކުރިއެވެ. މީގެ އިތުރުން، 2021 ވަނަ އަހަރަށް ރައްޔިތުންގެ މަޖިލީހުން ފާސްކޮށްފައިވާ އަދަދަކީ 34,922,716,599 ބިލިއަން ރުފިޔާ، ނަމަވެސް 2021 ވަނަ އަހަރު ނިމޭއިރު ޖުމްލަ ބަޖެޓު ހުންނާނެ ކަމަށް ލަފާ ކުރެވެނީ 37,167,687,519 ބިލިއަން ރުފިޔާގައެވެ. ވީމާ، ރިވައިޒްކުރި ބަޖެޓުގައި 2021 ވަނަ އަހަރުގެ ބަޖެޓަށް އިތުރު ކުރުމަށް މިނިސްޓްރީ އޮފް ފިނޭންސްއިން ފޮނުވާފައިވާ ޖުމްލަ 2,244,970,920 ބިލިއަން ރުފިޔާގެ ބަޖެޓު އެ ވަގުތު ހާޒިރުވެ ތިބި މެންބަރުންގެ އިއްތިފާޤުން (27/15) ފާސްކުރިއެވެ.