މިއަދުގެ ބައްދަލުވުމުގައި، ކޮމިޓީ އަށް ހުށަހެޅިފައިވާ މައްސަލަތައް ދިރާސާކުރުމުގެ މަސައްކަތް ކުރެއްވިއެވެ. މި ގޮތުން، ކޮމިޓީ އަށް ލިބިފައިވާ މައްސަލަތަކުގެ ތެރެއިން ކުރީގެ ކައުންސިލްތަކާއި ގުޅުންހުރި މައްސަލަތައް ދިރާސާކުރެއްވުމަށް އެކުލަވާލާފައިވާ ސަބް ކޮމިޓީ އަށް ފޮނުއްވުމަށް ކޮމިޓީ އަށް ވަޑައިގެންތިއްބެވި މެންބަރުންގެ އިއްތިފާޤުން ނިންމެވިއެވެ. އަދި، މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އިން އެޕްރޫވްކޮށްފައިވާ ބ.ގޮއިދޫގެ ލޭންޑް ޔޫޒް ޕްލޭން، 16.1 ބޯޓް ބިލްޑިންގ އަދި ބޯޓްރިޕެއަރ ކުރުމަށް އެހެން ރައްޔިތުންނަށްވެސް ބިންދޫކޮށްފައިވާ އުސޫލުން އެފަރާތަށްވެސް 18000 އަކަފޫޓްގެ ބިން ދޫކޮށް ދެއްވައި ހަމަޖައްސަވައިދެއްވުން އެދި އާދަމް ޝާފިޢު، މ. ޝައިނިންގ ސްޓާރި ފޮނުއްވާފައިވާ މައްސަލަ ކޮމިޓީން ދިރާސާކުރެއްވިއެވެ. މި ގޮތުން ރަށް ރަށުން ބިން ދޫކުރުން އެއީ ލާމަރުކަޒީ ޤާނޫނުގެ ދަށުން ކައުންސިލްތަކަށް ލިބިދީފައިވާ ބާރެއްކަމާއި، މި ފަދަ މައްސަލަތަކަކީ ލާމަރުކަޒީ ކޮމިޓީގެ އިޙުތިޞާޞްތެރޭހިމެނޭ ކަމަކަށް ނުވާތީ، މި މައްސަލަ ރަށު ކައުންސިލަށް ހުށަހަޅުއްވާގެން ކުރިއަށް ގެންދެވުމަށް ކޮމިޓީން ފެންނަ ކަމަށް ނިންމެވިއެވެ.