މި ބައްދަލުވުމުގައި އެންމެ ފުރަތަމަ ކުރިއަށްގެންދެވީ ދިވެހިރާއްޖޭގައި މަސްތުވާތަކެތި ބޭނުންކުރުމާއި ވިޔަފާރިކުރުމާގުޅޭ މައްސަލަތަކާއި މަސްތުވާތަކެއްޗާބެހޭ ޤާނޫނުގައި ހުރި އެކިއެކި މައްސަލަތައް ބައްލަވައިދެއްވުމަށް އެދިވަޑައިގެން ރައްޔިތުންގެ މަޖިލީހުގެ ރައީސް ފޮނުއްވާފައިވާ މައްސަލަ ދިރާސާކުރެއްވުމެވެ. އެގޮތުން، އެ މައްސަލައާ ގުޅޭގޮތުން އިންކުއަރީއެއް ކުރިއަށްގެންދެވުމަށް މަޑަވެލި ދާއިރާގެ މެންބަރު ޙުސައިން ފިރުޝާން ހުށަހަޅުއްވައި ހިންނަވަރު ދާއިރާގެ މެންބަރު ޖީހާން މަޙްމޫދު ތާޢީދުކުރެއްވި ގޮތަށް ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ފާސްކުރެއްވިއެވެ. އެއަށްފަހު ޤާނޫނު ނަންބަރު 30/2015 (ދިވެހިރާއްޖޭގެ ކުޅިވަރު ޤާނޫނު) އަށް އިޞްލާޙު ގެނައުމުގެ ބިލު ދިރާސާކުރެއްވުމުގެ މަސައްކަތް ކުރިއަށްގެންދެވިއެވެ. އެގޮތުން، އެ ބިލާ ގުޅޭގޮތުން ކުޅިވަރު ޖަމްޢިއްޔާތަކުން ފޮނުއްވާފައިވާ ޚިޔާލުފުޅުތައް އިތުރަށް ދިރާސާކުރެއްވުމަށްފަހު ބިލުގެ މަސައްކަތް ކުރިއަށްގެންދެވުމަށް ކޮމިޓީން ނިންމެވިއެވެ.