މިއަދުގެ ބައްދަލުވުމުގައި "ހިޔާ"ގެ ނަމުގައި 7،000 ސޯޝަލް ހައުސިންގ ޔުނިޓް ޢިމާރާތްކުރާ މަޝްރޫޢުއާ ގުޅިގެން ހިންގާފައިވާ ޖަރީމާތައް ތަޙުޤީޤުކޮށް ޤާނޫނީ ފިޔަވަޅު އެޅުން އަވަސްކުރުމަށް ގޮވާލައި މާފަންނު ހުޅަނގު ދާއިރާގެ މެންބަރު މުޙައްމަދު ފަލާޙް ހުށަހަޅުއްވާފައިވާ މައްސަލަ މަޝްވަރާކުރައްވައި، އެ މަޝްރޫޢުއާ ގުޅިގެން އޮޑިޓަރ ޖެނެރަލް ނެރުއްވާފައިވާ އޮޑިޓް ރިޕޯޓާގުޅޭ މަޢުލޫމާތު ސާފުކުރެއްވުމަށް އޮޑިޓަރ ޖެނެރަލާ ބައްދަލުކުރެއްވުމަށް ނިންމާފައިވެއެވެ. އޮޑިޓް ޤާނޫނު ނަންބަރު 4/2007 ގެ 16 ވަނަ މާއްދާގެ (ހ) ގައިވާ ގޮތުގެ މަތިން ރައްޔިތުންގެ މަޖިލީހަށް ފޮނުވަންޖެހޭ އޮޓިޑަރ ޖެނެރަލް އޮފީހުގެ "އަހަރީ ރިޕޯޓް 2020" ކޮމިޓީއާ ޙިއްޞާރެއްވިއެވެ. ސްޓޭޓް ބޭންކް އޮފް އިންޑިއާގެ މައްޗަށް ޕްލެޓިނަމް ކެޕިޓަލް ހޯލްޑިންގ ޕްރައިވެޓް ލިމިޓެޑުން ކޮށްފައިވާ ދައުވާ ސިވިލް ކޯޓުން ތަޙުޤީޤު ކުރައްވަމުން ގެންދަވާއިރު އެކޯޓުގެ އިސް ފަނޑިޔާރެއްގެ ނުފޫޒު ނެތްކަން ކަށަވަރު ކޮށްދެއްވުމަށް ސްޓޭޓް ބޭންކް އޮފް އިންޑިއާއިން އެދިފައިވާ މައްސަލަ މަޝްވަރާކުރައްވައި، މި މައްސަލައަކީ ކޮމިޓީގެ މެންޑޭޓުގައި ނުހިމެނޭ މައްސަލައަކަށްވާތީ މި މައްސަލަ ޖުޑީޝިއަރީ ކޮމިޓީއަށް ފޮނުވުމަށް ނިންމާފައިވެއެވެ. އަދި ދިވެހިރާއްޖޭގެ އިންޝުއަރެންސް ކުންފުނިތަކުން "ޕޮލިސީ" ވިއްކައިގެން ދިވެހި ރައްޔިތުންގެ އަތުން ޙީލަތްތެރި ގޮތެއްގައި މަންފާ ހޯދާކަމަށާއި، ސްޓޭޓް ޓްރޭޑިންގ އޯގަނައިޒޭޝަން (އެސް.ޓީ.އޯ) ގެ ސަބްސިޑިއަރީ ކުންފުންޏެއް ކަމުގައިވާ އިންޝުއަރެންސް ކޮމްޕެނީގެ ތެރެއިން އިތުރު ކުންފުންޏެއް "ދިވެހި އިންޝުއަރެންސް ކޮންޕެނީ"ގެ ނަމުގައި އުފަންކޮށް، އެކުންފުނިންވެސް ދިވެހި ރައްޔިތުންނަށް މަކަރާއި ޚީލަތް ހަދަމުންދާ ކަމުގެ އަޑުތައް އިވެމުންދާކަމަށް ބަޔާންކުރައްވައި ކާށިދޫ ދާއިރާގެ މެންބަރު ޢަބްދުﷲ ޖާބިރު ހުށަހަޅުއްވާފައިވާ މައްސަލަ މަޝްވަރާކުރައްވައި، މި މައްސަލައާ ގުޅިގެން މޯލްޑިވްސް މަނިޓަރީ އޮތޯރިޓީއާއި އެލައިޑް އިންޝުއަރެންސް އިން ދެއްވި ޖަވާބު އެ މެންބަރަށް ޙިއްޞާކުރެއްވުމަށް ނިންމާފައިވެއެވެ.
© 2024 ރައްޔިތުންގެ މަޖިލިސްގެ އިދާރާA