މި ބައްދަލުވުމުގައި ފުރަތަމަ ކުރިއަށް ގެންދެވީ، މަދްރަސަތުލް އިފްތިތާޙްގެ ހިންގުން ހަރުދަނާކޮށް، ދެވޭ ތަޢުލީމުގެ ފެންވަރު ރަނގަޅުކުރުމަށްޓަކައި ސްކޫލަށް ދިމާވެފައިވާ ދަތިތައް ވީހާވެސް އަވަހަށް ޙައްލުކޮށްދިނުމަށް އެދި ހުށަހަޅާ ޤަރާރުގެ ރިޕޯޓް ފާސްކުރެއްވުމެވެ. ޤަރާރާ ގުޅޭގޮތުން މަޝްވަރާކުރުމަށްފަހު، މި ޤަރާރުގައި މައިގަނޑުގޮތެއްގައި ފާހަގަކުރައްވާފައިވާ ކަންކަން ފުރިހަމަކޮށް ނިމިފައިވާކަމަށް ފެންނާތީއާއި، ޤަރާރުގައި ފާހަގަކުރައްވާފައިވާ ކަންކަމުގެ ތެރެއިން ނިމިފައިނުވާ ކަންކަމަކީ ހަމަޖެހިފައިވާ އުޞޫލުތަކާ އެއްގޮތްވާ ގޮތުގެމަތިން މަދްރަސަތުލް އިފްތިތާޙުން އެދުމުން ހަމަޖެހިގެންދާނެ ކަންތައްތައްކަމުގައި ފެންނާތީ، މި ޤަރާރު ފާސްކުރުމަށް ނުފެންނަކަމަށް ކޮމިޓީގެ އިއްތިފާޤުން ނިންމެވިއެވެ. މި ގޮތައް ފާސްކުރުމަށް ހުށަހެޅުއްވީ ހޮޅުދޫ ދާއިރާގެ މެންބަރު ޔޫނުސް ޢަލީ އަދި ތާއީދުކުރެއްވީ ކެލާ ދާއިރާގެ މެންބަރު އިބްރާހީމް ޝަރީފްއެވެ. ދެން މިއަދުގެ ބައްދަލުވުމުގައި ކުރިއަށް ގެންދެވީ ފަންނީ އުފެއްދުން ގިންތިކުރުމާއި ދަރަޖަކުރުމުގެ ބިލުގެ މަސައްކަތެވެ. އެ ގޮތުން ރީ ޑްރާފްޓް ކުރެވުނު ބިލުގެ 4 ވަނަ މާއްދާއިން ފެށިގެން 9 ވަނަ މާއްދާއާއި ހަމައަށް ފާސްކުރެއްވިއެވެ.