މިބައްދަލުވުމުގައި ރައްޔިތުންގެ މަޖިލީހުގެ ގަވާއިދުގެ 179 ވަނަ މާއްދާގެ ދަށުން މަޑަވެލި ދާއިރާގެ މެންބަރު ޙުސައިން ފިރުޝާން ހުށަހަޅުއްވާފައިވާ މައްސަލައާއި ގުޅިގެން، މިނިސްޓްރީ އޮފް އިކޮނޮމިކް ޑިވެލޮޕްމަންޓް، މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ އަދި މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ބޭފުޅުންނާ ބައްދަލުކުރައްވައި މައުލޫމާތު ސާފުކުރެއްވިއެވެ. އެގޮތުން، މަސްގަތުމުގެ ކަންތައްތަކާއި މަހުގެ އަގާ ގުޅޭގޮތުން ޕްރެޒެންޓޭޝަނެއް މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރއިން ދެއްވިއެވެ. މުޅި މައްސަލައަށް ބަލާއިރު މިނިސްޓްރީ އޮފް އިކޮނޮމިކް ޑިވެލޮޕްމަންޓުގެ މާ ބޮޑު ރޯލެއް ނޯންނަކަމަށާއި، މައިގަނޑު ގޮތެއްގައި މަސައްކަތްކުރަމުން އަންނަނީ މަސްވެރިކަމާއި ދަނޑުވެރިކަމުގައި މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރއަށް އެހީތެރިވުމުގެ މަސައްކަތްތައްކަމަށް އެ މިނިސްޓްރީން ފާހަގަކުރެއްވިއެވެ. ޓޫރިޒަމް ޕްރޮމޯޓްކުރަމުންދާގޮތަށް މަސްވެރިކަންވެސް ޕްރޮމޯޓްކުރަންޖެހޭކަމަށާއި، މަހުގެ ކޮލިޓީ ރަނގަޅުކުރުމަށް މަސައްކަތްތަކެއް ކުރެވިއްޖެނަމަ، ރަނގަޅު އަގެއް ލިބިގެންދާނެކަމަށާއި، އެކަމަށް ޙައްލެއް ހޯދުމަށްޓަކައި މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރއާއި އެސް.އެމް.އީ ބޭންކު މެދުވެރިކޮށް މަސައްކަތްކޮށް، ފިފްތް ޖެނެރޭޝަން ފިޝިން ވެސެލްއެއް ޑިސައިންކުރުމުގެ މަސައްކަތް ކުރަމުންދާކަމަށް ފާހަގަކުރެއްވިއެވެ. އަދި މިފްކޯގެ ކެޕޭސިޓީ އިތުރުކުރުމަށް ކުރައްވަމުން ގެންދަވާ މަސައްކަތްތަކުގެ ތަފްސީލުވެސް ހިއްސާކުރައްވާފައިވެއެވެ. މީގެ އިތުރުން، މި ބައްދަލުވުމުގައި މަސްވެރިކަމާ ގުޅުންހުރި ގިނަ މަޢުލޫމާތުތަކެއް ހިއްސާކުރައްވާފައިވެއެވެ.