މިއަދުގެ ބައްދަލުވުމުގައި އެންމެ ފުރަތަމަ ކުރިއަށްގެންދެވީ އަންހެން ކައުންސިލަރުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންގެ މަސްއޫލިއްޔަތު އަދާކުރުމުގައި ދިމާވާ ދަތިތަކަށް ޙައްލެއް ގެނައުމަށް ގޮވާލައި ހުށަހަޅާފައިވާ ޤަރާރުގެ މަސައްކަތެވެ. އެގޮތުން ހިއުމަން ރައިޓްސް އެންޑް ޖެންޑަރ ކޮމިޓީގެ މުޤައްރިރާ މަޝްވަރާކުރެއްވުމަށްފަހު އެ ޤަރާރުގެ މަސައްކަތް ދިރާސާކުރެއްވުމަށް ޖޮއިންޓް ސަބް ކޮމިޓީއެއް އެކުލަވާލުމަށް ނިންމެވިއެވެ. އެއަށްފަހު ކޮމިޓީ އަށް ކައުންސިލަތަކުން ފޮނުއްވާފައިވާ ސިޓީ ތައް ދިރާސާކުރައްވަން އެކުލަވާލަފައިވާ ސަބް ކޮމިޓީއަށް ކޮމަންޑޫ ދާއިރާގެ މެންބަރު މުޙައްމަދު ރާޝިދު އިތުރުކުރެއްވުމަށް ނިންމެވިއެވެ. އަދި، ޤާނޫނު ނަންބަރު 98/20 (ދިވެހިރާއްޖޭގެ ފަޅުރަށްރަށާބެހޭ ޤާނޫނު) އަށް އިޞްލާޙުގެނައުމުގެ ބިލުގެ ސުންގަޑި ހަމަވެފައިވާތީ، އެ ބިލުގެ ސުންގަޑި 20 ޖޫން 2022 ގެ ނިޔަލަށް އިތުރުކުރެއްވުމަށް ނިންމެވިއެވެ.