މިއަދުގެ ބައްދަލުވުމުގައި އެޖެންޑާ ކުރެވިފައިވަނީ ކޮމިޓީއަށް ހުށައަޅުއްވާފައިވާ މައްސަލަތަކާ ގުޅޭގޮތުން މަޝްވަރާކުރެއްވުމެވެ. އެގޮތުން ކޮމިޓީއަށް މިހާރު ހުށައެޅިފައިވާ މައްސަލަތަކުގެ ސްޓޭޓަސް ބައްލަވައި، މައްސަލަތައް ކުރިއަށް ގެންދަވާނެ ގޮތަކާއިމެދު މަޝްވަރާކޮށް ނިންމެވިއެވެ. އެގޮތުން، ރައްޔިތުން މަޖިލީހުގެ ގަވާއިދުގެ 201 ވަނަ މާއްދާ އިޞްލާޙު ކުރެއްވުމަށް ކޮމިޓީއަށް ހުށައަޅާފައިވާ މައްސަލާގައި، ކޮމިޓީން ނިންމެވީ އެމް.ޑީޕީ.ގެ ޕީޖީ ގްރޫޕަށް މި މައްސަލަ މަޝްވަރާކުރެއްވުމަށް ފޮނުއްވައި އެ ފަރާތުން ދެކިލައްވާ ގޮތެއް ކޮމިޓީއާ ޙިއްޞާކުރެއްވުމުން ކޮމިޓީން ވަކި ގޮތަކަށް ނިންމަވާ ގޮތަށެވެ. "މިހާރު" ނޫހުން ރައްޔިތުން މަޖިލީހުގެ ޖަލްސާތަކުގެ ލައިވް ފީޑް ހޯދުމަށްއެދި ފޮނުއްވާފައިވާ މައްސަލާގައި، ކޮމިޓީން މި މައްސަލަ ނިންމަވާނެ ސުންގަޑިއެއްކަމުގައި 31 އޮކްޓޯބަރު 2022 ކަނޑައަޅުއްވައި، ކޮމިޓީގެ 3 މެންބަރުން ހިމެނޭގޮތަށް ސަބްކޮމިޓީއެއް އެކުލަވާލައްވާ ފާސްކުރައްވާފައިވެއެވެ. އެ ސަބްކޮމިޓީގައި ހިމެނިވަޑައިގަންނަވަނީ: ފުނަދޫ ދާއިރާގެ މެންބަރު މުޙައްމަދު ޝާހިދު، ހޯރަފުށި ދާއިރާގެ މެންބަރު މުޙައްމަދު ރާޝިދު އަދި މާފަންނު ދެކުނު ދާއިރާގެ މެންބަރު އާދަމް އަލީއެވެ. މި މައްސަލައިގެ އިތުރުން، މި ސަބްކޮމިޓީއިން އިތުރު 2 މައްސަލައެއް ދިރާސާކުރެއްވުމަށްވަނީ ހަމަޖައްސަވާފައިވެއެވެ. އެއީ ރައްޔިތުން މަޖިލީހުގެ މެންބަރުންނަށް ވެލާނާ އިންޓަރނޭޝަނަލް އެއާޕޯޓްގެ ވީ.އައި.ޕީ ލައުންޖުގެ ޚިދުމަތް ހޯދުމާއި ގުޅޭގޮތުން ކޮމިޓީން ނިންމެވި ނިންމުން އަލުން މުރާޖަޢާ ކުރުމަށްއެދި ފޮނުއްވާފައިވާ މައްސަލައާއި ރައްޔިތުން މަޖިލީހުގެ އިދާރާގެ ސެކިއުރިޓީ އެސެސްމަންޓް ހެދުމަށްފަހު މިނިސްޓްރީ އޮފް ޑިފެންސް އިން ފޮނުއްވާފައިވާ މައްސަލައެވެ. މި ދެމައްސަލަވެސް ކޮމިޓީން ނިންމަވާނެ ސުންގަޑިއެއްކަމުގައި 31 އޮކްޓޯބަރު 2022 ވަނީ ކަނޑައަޅުއްވައެވެ. މީގެ އިތުރުން، އައި.ޕީ.ޔޫ ބައްދަލުވުމުގެ ތެރޭގައި ސައުންޑް ސިސްޓަމަށް ދިމާވި މައްސަލައަކާ ގުޅިގެން މަޖިލީހުގެ ފްލޯގައި ވާހަކަ ދެއްކެވިއިރު އަޑު ލިބެންޖެހޭ ތަންތަނަށް އަޑު ނުލިބޭތީ، އެ މައްސަލައިގައި ކަންހިނގާފައިވާގޮތް ސާފުކުރެއްވުމަށް ހުށައަޅުއްވާފައިވާ މައްސަލަ ޙައްލުކުރެއްވުމުގެ ގޮތުންވެސް ވަނީ ކޮމިޓީގެ 3 މެންބަރުން ހިމަނުއްވާ ސަބްކޮމިޓީއެއް އެކުލަވާލައްވާ، މިމައްސަލަ ނިންމަވާނެ ސުންގަޑިއެއްކަމުގައި 31 އޮކްޓޯބަރު 2022 ކަނޑައަޅުއްވާފައިއެވެ. މި ސަބްކޮމިޓީގައި ހިމެނި ވަޑައިގަންނަވަނީ: ހެންވޭރު ހުޅަނގު ދާއިރާގެ މެންބަރު ޙަސަން ލަތީފު، ކުރެންދޫ ދާއިރާގެ މެންބަރު ޢަބްދުލްޣަނީ ޢަބްދުލްޙަކީމް އަދި އަލިފުށި ދާއިރާގެ މެންބަރު މުޙައްމަދު ރަޝީދު ޙުސައިނެވެ. 2019 ވަނަ އަހަރުގެ ޖަނަވަރީ މަހުންފެށިގެން 2019 ޖޫންމަހުގެ ނިޔަލަށް ސާޖަންޓް އެޓް އާމްސް ބެލުމުގެ ދަށުގައިވާ ސެކިއުރިޓީ ކޮންޓިންޖެންޓްއިން ކޮށްފައިވާ މަސައްކަތަށް ބަލައި ތައްޔާރުކޮށްފައިވާ ރިޕޯޓު ބެއްލެވުމަށާއި، ރައްޔިތުން މަޖިލީހުގެ ގޮނޑިތައް ވަކި ދާއިރާއަކަށް ތަފާތުނުކުރެވޭނެ އުޞޫލަކުން ތަރުތީބުކޮށްދެއްވުމަށް އެދި ފޮނުއްވާފައިވާ މައްސަލަ ބެއްލެވުމާއި އެސިސްޓްންޓް ސަރޖެންޓް އެޓް އާމްސް މަޤާމުގެ ކްލެސިފިކޭޝަން ގެންނަން ބޭނުންވާ ބަދަލު ފާސްކޮށްދެއްވުމަށްއެދި ފޮނުއްވާފައިވާ މައްސަލައަށް ގޮތެއް ނިންމެވުން، ދެން ކޮމިޓީގެ ބައްދަލުވުން ބޭއްވުމަށް ހަމަޖައްސަވާފައިވާ ދުވަހަށް (24 އޮކްޓޫބަރު 2022) ތާވަލުކުރެއްވިއެވެ. މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ އަލްފާޟިލާ ޒަހާ ވަޙީދުގެ އިތުބާރުނެތްކަމުގެ މައްސަލާގައި ސޮއި ކުރައްވާފައިވާ ކާށިދޫ ދާއިރާގެ މެންބަރު އަބްދުﷲ ޖާބިރު ސޮއި އަނބުރާ ގެންދަވާފައިވާތީ، އެ މައްސަލައިގާ ޢަމަލުކުރާނެ ގޮތުގެ ލަފަޔަކަށްއެދި ފޮނުއްވާފައިވާ މައްސަލަ 10 ނޮވެންބަރު 2022 ވަނަ ދުވަހުގެ ކުރިން ނިންމެވުމަށް ސުންގަނޑި ކަނޑައަޅުއްވާފައިވެއެވެ. އަދި ދިވެހިރާއްޖެއިން ބޭރުގައި ބޭއްވޭ އެސެންބްލީތަކާއި އީވެންޓުތަކުގައި ރައްޔިތުން މަޖިލީހުގެ މެންބަރުން ބައިވެރިވެވަޑައިގެންނެވުމާއި ގުޅޭގޮތުން ހުށައަޅުއްވާފައިވާ މައްސަލަ ބެއްލެވުމަށްވެސް ކޮމިޓީން ވަނީ 3 މެންބަރުންގެ ސަބްކޮމިޓީއެއް އެކުލަވާލައްވާފައިއެވެ. އެ ސަބްކޮމިޓީގައި ހިމެނި ވަޑައިގަންނަވަނީ: ހެންވޭރު ހުޅަނގު ދާއިރާގެ މެންބަރު ޙަސަން ލަތީފު، ކުރެންދޫ ދާއިރާގެ މެންބަރު ޢަބްދުލްޣަނީ ޢަބްދުލްޙަކީމް އަދި ތޮއްޑޫ ދާއިރާގެ މެންބަރު ޙަސަން ޝިޔާނެވެ. މިމައްސަލަ ނިންމެވުމަށް ސަބްކޮމިޓީންވަނީ 10 ނޮވެންބަރު 2022 ވަނަ ދުވަސް ސުންގަނޑިއެއްގެ ގޮތުގައި ކަނޑައަޅުއްވާފައިވެއެވެ. އެއަށްފަހު، ހދ. ނޭކުރެންދޫގައި ކަރެކްޝަނަލް ސެންޓަރެއް ޤާއިމްކުރުމާ ގުޅޭގޮތުން، ހުށައެޅިފައިވާ މައްސަލައާއި، ރައްޔިތުން މަޖިލީހުގެ ރަޢީސްއާއެކު ވިލާ ކޮލެޖްއިން ކުރެއްވި މަޝްވަރާތަކުގައި ފާހަގަ ކުރެއްވި މުހިންމު ނުކުތާތައް ހިމަނުއްވައި ފޮނުއްވާފައިވާ މައްސަލައާއި، ވިލާ ކޮލެޖާއި ރައްޔިތުން މަޖިލީހުގެ އިދާރާއާ ދެމެދު މެމޮރެންޑަމް އޮފް އަންޑަސްޓޭންޑިންގއެއްގައި ސޮއި ކުރުމާމެދު ކޮމިޓީގެ ލަފަޔަކަށްއެދި ފޮނުއްވާފައިވާ މައްސަލައިގެ އިތުރުން ރައްޔިތުން މަޖިލީހުގެ ކޮމިޓީތަކުގެ ޕާފޯމަންސް އޮޑިޓެއް ހަދަން ފެންނަކަމަށް ބަޔާންކޮށް ހުށައަޅުއްވާފައިވާ މައްސަލަ 10 ނޮވެންބަރު 2022 ވަނަ ދުވަހުގެ ކުރިން ނިންމެވުމަށް ސުންގަނޑި ކަނޑައަޅުއްވާފައިވެއެވެ.
ބައްދަލުވުމުގެ އެޖެންޑާ ބައްދަލުވުމުގެ ޔައުމިއްޔާ ބައްދަލުވުމުގެ ޚާޒިރީ© 2024 ރައްޔިތުންގެ މަޖިލިސްގެ އިދާރާA