ކޮމިޓީގެ ނަން

ޢާންމު ކޮމިޓީ

ތާރީޚް

7 ނޮވެމްބަރު 2022 09:34

ނަންބަރު

18

2022 ވަނަ އަހަރު ޢާންމު ކޮމިޓީގެ 18 ވަނަ ބައްދަލުވުން.

ޚުލާސާ

މިއަދުގެ ބައްދަލުވުމުގައި އެޖެންޑާ ކުރެވިފައިވަނީ 2023 ވަނަ އަހަރަށް ލަފާކުރާ ދަޢުލަތުގެ ބަޖެޓުގެ ބަހުސް މަރުޙަލާއާއި، ބަޖެޓު ދިރާސާކުރާ ކޮމިޓީގެ ރިޕޯޓު ހުށަހެޅުއްވުމުން އެ ރިޕޯޓަށް ބަހުސްކުރުމުގެ މަރުޙަލާގައި މެންބަރުންނަށް ވާހަކަދައްކަވަން ދެވޭ ފުރުޞަތުގެ ދިގުމިނާމެދު ކޮމިޓީން ދެއްވާ ލަފާއާއި، ރައްޔިތުން މަޖިލީހުގެ ގަވާއިދުގެ 213 ވަނަ މާއްދާގެ (ށ) ގެ ދަށުން ބަޖެޓުގެ ބަހުސް ހިނގަމުންދާ ވަގުތު މެންބަރުން ފާހަގަކުރައްވާ ނުކުތާތަކަށް ޖަވާބުދެއްވުމަށް މިނިސްޓަރ އޮފް ފިނޭންސަށް ދެވޭ ފުރުޞަތު ކަނޑައަޅުއްވައިދެއްވައި 7 ނޮވެންބަރު 2022 ގެ ކުރިން އަންގަވައިދެއްވުމަށް ހުށަހެޅިފައިވާ މައްސަލައާއި، 2023 އަހަރުގެ ދަޢުލަތުގެ ބަޖެޓާއި ގުޅޭގޮތުން ކޮމިޓީގެ ދާއިރާގައި ހިމެނޭ ކަންކަމާއި ބެހޭގޮތުން ކޮމިޓީއަށް ފެންނަ ޚިޔާލުތަކާއި ހިނގަމުންދާ ކަންކަމަށް އިތުރު ޚަރަދު ބޭނުންވާނަމަ އެކަމެއް ބަޔާންކޮށް ބަޖެޓު ދިރާސާކުރާ ކޮމިޓީއަށް ރިޕޯޓު ހުށަހެޅުމަށް ހުށަހަޅުއްވާފައިވާ މައްސަލައެވެ. މިގޮތުން، މި މައްސަލައާއި މެދު ކޮމިޓީގެ މެންބަރުން ޚިޔާލު ފައުޅުކުރައްވާ، ވޭތުވެ ދިޔަ އަހަރުތަކާއި އެއްގޮތަށް، 2023 ވަނަ އަހަރަށް ލަފާކުރާ ދައުލަތުގެ ބަޖެޓްގެ ބަހުސްގައި މެންބަރުންނަށް ވާހަކަ ދައްކަވަން ދެވޭ ފުރުޞަތުގެ ދިގުމިނަކީ، ބަހުސް މަރުޙަލާގައި ކޮންމެ މެންބަރަކަށް 15 މިނެޓުގެ އެއް ފުރުޞަތު ކަމަށާއި، ކޮމިޓީ ރިޕޯޓު ހުށަހެޅުމަށްފަހު ރިޕޯޓަށް ބަހުސްކުރާ މަރުޙަލާގައި ކޮންމެ މެންބަރަކަށް 7 މިނެޓުގެ އެއް ފުރުޞަތު ކަމުގައި ހަމަޖެއްސެވުމަށާއި، އަދި ބަޖެޓުގެ ބަހުސް ހިނގަމުންދާ ވަގުތު މެންބަރުން ފާހަގަކުރައްވާ ނުކުތާތަކަށް ޖަވާބުދެއްވުމަށް މިނިސްޓަރ އޮފް ފިނޭންސް ކަނޑައަޅުއްވާ ގޮތުގެމަތިން އެމަނިކުފާނަށް ޖުމްލަ 45 މިނެޓު ދެއްވުމަށް ކޮމިޓީން ނިންމެވިއެވެ. އެއަށްފަހު ކޮމިޓީން ބެއްލެވި މައްސަލައަކީ، 2023 އަހަރުގެ ދަޢުލަތުގެ ބަޖެޓާއި ގުޅޭގޮތުން ކޮމިޓީގެ ދާއިރާގައި ހިމެނޭ ކަންކަމާއި ބެހޭގޮތުން ކޮމިޓީއަށް ފެންނަ ޚިޔާލުތަކާއި ހިނގަމުންދާ ކަންކަމަށް އިތުރު ޚަރަދު ބޭނުންވާނަމަ އެކަމެއް ބަޔާންކޮށް ބަޖެޓު ދިރާސާކުރާ ކޮމިޓީއަށް ރިޕޯޓު ހުށަހެޅުމަށް ފޮނުވިފައިވާ މައްސަލައެވެ. އެގޮތުން، ރައްޔިތުން މަޖިލީހަށް މިނިސްޓްރީ އޮފް ފިނޭންސް އިން ހުށަހަޅުއްވާ 2023 ވަނަ އަހަރަށް ލަފާކުރާ ދަޢުލަތުގެ ބަޖެޓުގައި، ރައްޔިތުންގެ މަޖިލީހުގެ އިދާރާއަށް ކަނޑައަޅުއްވާފައިވާ ބަޖެޓުގައި ކޮމިޓީން ފާސްކުރައްވާފައިވާ ބަޖެޓާއި ފަރަގުތަކެއް ހުރުމުން، މިކަމުގައި ބަހެއް ހޯއްދެވުމަށް ރައްޔިތުންގެ މަޖިލީހުގެ ހެޑް އޮފް އެޑްމިނިސްޓްރޭޝަން އަލްފާޟިލް އަޙްމަދު ފާއިޒްއާއި ބައްދަލުކުރެވުނެވެ. އެގޮތުން، ހުށަހެޅިފައިވާ ބަޖެޓުން އުނިކުރެވިފައިވާ ބައިތައް ކޮމިޓީން ދިރާސާ ކުރައްވާ، 2023 ވަނަ އަހަރަށް ލަފާކޮށް މިނިސްޓްރީ އޮފް ފިނޭންސް އިން ރައްޔިތުންގެ މަޖިލީހުގެ އިދާރާ، ބިޒްނަސް އޭރިއާ 1242 އަށް ހުށަހަޅާފައިވާ 180،434،257ރ. ގެ ބަޖެޓަކީ، ރައްޔިތުންގެ މަޖިލީހުގެ ގަވާއިދުގެ 15 ވަނަ މާއްދާގެ (ބ) ގައި ބަޔާންކޮށްފައިވާ ގޮތުގެމަތިން މި ކޮމިޓީން ފާސްކޮށް ދައުލަތުގެ ބަޖެޓްގައި ހިމެނުމަށް މިނިސްޓްރީ އޮފް ފިނޭންސްއަށް ހުށަހެޅި ބަޖެޓަށް ވުރެ 3،798،424ރ ކުޑަ ބަޖެޓެއް ކަމަށްވާތީ، ރައްޔިތުންގެ މަޖިލީހުގެ އިދާރާގެ ޖީ.އެލް ކޯޑް-421003 އަށް 98،424ރ އަދި ޖީ.އެލް.ކޯޑް 212027 އަށް 3،700،000ރ އިތުރުކުރުމަށް، ކޮމިޓީގެ އިއްތިފާގުން ނިންމެވިއެވެ.

  • ބޭނުންވެލައްވާ މަޖިލިސް ޚިޔާރުކުރައްވާ

© 2024 ރައްޔިތުންގެ މަޖިލިސްގެ އިދާރާA