މިއަދުގެ ބައްދަލުވުމުގައި ސްޓޭޓް ޓްރޭޑިންގ އޯގަނައިޒޭޝަން އިން އެސެންޝިއަލް ކޮމޯޑިޓީސް އިމްޕޯޓްކުރުމަށް ބޭނުންވާ ފައިސާ ހަމަޖެއްސުމަށް ސީ.އެފް.އައި.ޓީ އިންކް އާއި އެސްޓީއޯ އާއި ދެމެދު 4 ލޯން އެގްރިމެންޓްގެ ދަށުން ހެދިފައިވާ 55,000,000 (ފަންސާސް ފަސް މިލިއަން) އެމެރިކާ ޑޮލަރުގެ ލޯނަށް ސަރުކަރުން 19 ޑިސެންބަރު 2022 ގައި ދޫކުރެވިފައިވާ ސޮވެރިން ގެރެންޓީ އަދި "ފްރޭމްވަރކް އޮން ކަރަންސީ ސްވޮޕް އެރޭންޖްމަންޓް ފޮރ ސާރކް ކަރަންސީސް 2019-2022" ގެ ދަށުން މޯލްޑިވްސް މަނިޓަރީ އޮތޯރިޓީއާއި ރިޒަރވް ބޭންކް އޮފް އިންޑިއާ އާ ދެމެދު ސޮއިކުރެވިފައިވާ 200 މިލިއަން އެމެރިކާ ޑޮލަރުގެ ކަރަންސީ ސްވޮޕް އެގްރީމަންޓް ކޮމިޓީއާ ހިއްސާކުރެއްވިއެވެ. އަދި އޭގެ އިތުރުން ވާރލްޑް ބޭންކް، އިންޓަނޭޝަނަލް ޑިވެލޮޕްމަންޓް އެސޯސިއޭޝަން (އައިޑާ) – މޯލްޑިވްސް އެޓޯލް އެޑިއުކޭޝަން ޑިވެލޮޕްމަންޓް ޕްރޮޖެކްޓް އަށް ބޭނުންވާ 10 މިލިއަން އެމެރިކާ ޑޮލަރުގެ ތެރެއިން 4.5 މިލިއަން އެމެރިކާ ޑޮލަރު ލޯނު، 4.5 އެމެރިކާ ޑޮލަރު ހިލޭ އެހީގެ ގޮތުގައި ހަމަޖެއްސުމަށް އިންޓަނޭޝަނަލް ޑިވެލޮޕްމަންޓް އެސޯސިއޭޝަން (އައިޑާ) އަދި ދިވެހި ސަރުކާރާއި ދެމެދު 09 ނޮވެންބަރު 2022 ގައި ސޮއިކުރެވިފައިވާ ފައިނޭންސިންގ އެގްރީމެންޓްގެ މަޢުލޫމާތު ކޮމިޓީއާ ކޮމިޓީއާ ހިއްސާކުރެއްވިއެވެ. އެއަށްފަހު އޮޑިޓަރ ޖެނެރަލް އޮފީހުގެ 2022 ވަނަ އަހަރުގެ ދެވަނަ އަދި ތިންވަނަ ކުއަރޓާ ރިޕޯޓް އަދި އޮޑިޓަރ ޖެނެރަލް އޮފީހުގެ 2021 ވަނަ އަހަރުގެ އަހަރީ ރިޕޯޓްއާ ގުޅޭގޮތުން މަޝްވަރާކުރެއްވުމަށްފަހު، މި ރިޕޯޓްތަކާ ގުޅޭގޮތުން އޮޑިޓަރ ޖެނެރަލާ ބައްދަލު ކުރެއްވުމަށް ނިންމެވިއެވެ. ޤާނޫނު ނަންބަރު 7/2013 (ދައުލަތުގެ ޚަރަދަށް ޒިންމާވުމުގެ ޤާނޫނު)ގެ 10 ވަނަ މާއްދާއާއި 20 ވަނަ މާއްދާގެ ދަށުން މިނިސްޓްރީ އޮފް ފިނޭންސްއިން ފޮނުއްވާފައިވާ މެދުރާސްތާގެ ފިސްކަލް ސްޓްރެޓަޖީ އަންގައިދޭ ބަޔާނާއި ދައުލަތުގެ ދަރަނީގެ ސްޓްރެޓަޖީ އަންގައިދޭ ބަޔާން އަދި އެ ޤާނޫނުގެ 29 ވަނަ މާއްދާގައިވާ ގޮތުގެ މަތިން އެ މިނިސްޓްރީން ފޮނުއްވާފައިވާ 2023 ވަނަ އަހަރަށް ލަފާކުރި ދައުލަތުގެ ބަޖެޓުގެ ކޭޝްފްލޯ ޕްލޭން އާ ގުޅޭގޮތުން މަޝްވަރާ ކުރެއްވުމަށްފަހު، އިތުރަށް ބެއްލެވުމަށް ފިނޭންސް މިނިސްޓަރާ ބައްދަލުކުރެއްވުމަށް ނިންމެވިއެވެ. އިންސްޓިޓިއުޓް އޮފް ޗާޓަޑް އެކައުންޓެންޓްސް އޮފް ދަ މޯލްޑިވްސްގެ އިންސްޓިޓިއުޓްގެ ޓެކްސް އެންޑް ޕަބްލިކް ޕޮލިސީ ކޮމިޓީން ތައްޔާރުކޮށްފައިވާ "މޯލްޑިވްސް ބަޖެޓް ރިވިއު 2023" އަދި ދިވެހި ރެޑް ކްރެސެންޓަށް 2023 އަހަރަށް ކަނޑައަޅުއްވާފައިވާ 3،000،000 (ތިން މިލިއަން) ރުފިޔާގެ ބަޖެޓް އެންމެ އަވަސް ފުރުސަތެއްގައި އެ އިދާރާގެ އެކައުންޓަށް ޖަމާކޮށްދެއްވުމަށް އެދި މިނިސްޓްރި އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓަށް ފޮނުއްވާފައިވާ ސިޓީގެ ކޮޕީ މެންބަރުންނާ ހިއްސާކުރެއްވިއެވެ. އަދި 2023 ވަނަ އަހަރަށް މިނިސްޓްރީ އޮފް ފިނޭންސްއިން ކޮމިޝަނަށް ކަނޑައަޅުއްވާފައިވާ ބަޖެޓަކީ ކޮމިޝަނުގެ މަސްއޫލިއްޔަތު ފުރިހަމަ ގޮތުގައި އަދާކުރެވޭވަރަށް ވުރެއް ކުޑަ ބަޖެޓެއްކަމަށް ބަޔާންކޮށް ނޭޝަނަލް އިންޓެގްރިޓީ ކޮމިޝަނުން ފޮނުއްވާފައިވާ ސިޓީއާ ގުޅޭގޮތުން މަޝްވަރާ ކުރެއްވުމަށްފަހު، މިކަމާގުޅޭ އިތުރު މަޢުލޫމާތާއެކު މި މައްސަލަ އަލުން އެޖެންޑާ ކުރުމަށް ނިންމެވިއެވެ.