މިއަދުގެ ބައްދަލުވުމުގައި އިލެކްޝަންސް ކޮމިޝަނުގެ މެންބަރުންގެ ހެލްތް އިންޝުއަރެންސްގެ ޚިދުމަތް 31 ޑިސެންބަރު 2022 ގެ ނިޔަލަށް ހަމަވެފައިވާއިރު، އިންޝުއަރެންސް އާ ކުރުމަށް އެފަރާތަށް ކަނޑައެޅިފައިވާ ޕްރިމިއަމްއަށްވުރެ ބޮޑު އަގުތަކެއް އެލައިޑް އިންޝުއަރެންސްއިން ހުށަހަޅުއްވާފައިވާކަމަށާއި، މިކަމާމެދު ޢަމަލުކުރައްވާނެ ގޮތުގެ ލަފަޔަކަށް އެދި އެ ކޮމިޝަނުން އަދި މިނިވަން މުއައްސަސާތަކުގެ ކޮމިޓީއިން ފޮނުއްވާފައިވާ މައްސަލަ ދިރާސާކުރެއްވިއެވެ. އަދި ހިއުމަން ރައިޓްސް ކޮމިޝަނުގެ މެންބަރުންގެ ހެލްތް އިންޝުއަރެންސް އާ ކުރުމަށް މިމައްސަލަ ދިމާވެފައިވާކަމަށް އެކޮމިޝަނުން ފޮނުއްވާފައިވާ މައްސަލަ މަޝްވަރާކުރެއްވިއެވެ. އަދި މިކަމާ ގުޅޭގޮތުން އިންޝުއަރެންސް ކުންފުނިތަކުން ހޯއްދަވާފައިވާ މަޢުލޫމާތަށް ބަލާއިރު، އަމާނާ ތަކަފުލް އިން ޤާނޫނުގައިވާ ޢަދަދުކަމަށްވާ 14،500 ރުފިޔާގެ ތެރޭގައި މި ޚިދުމަތް ފޯރުކޮށްދެވޭނެކަމަށް މަޢުލޫމާތު ދެއްވާފައިވާތީ، އެ ކުންފުނިން މެންބަރުންގެ ހެލްތް އިންޝުއަރެންސްގެ ޚިދުމަތް ހޯދުމަށް އެ ކޮމިޝަންތަކަށް އެންގުމަށް ނިންމެވިއެވެ. އޮޑިޓަރ ޖެނެރަލްގެ އޮފީހުގެ 2022 ވަނަ އަހަރުގެ މާލީ ބަޔާން ކޮމިޓީއާ ޙިއްސާކުރެއްވިއެވެ. އެއަށްފަހު ކަޅުބިލަމަހުގެ ސިނާޢަތު ތަރައްޤީކުރުމުގެ މަޝްރޫޢުގެ ދަށުން ގދ.ހޯޑެއްދޫގެ ކުއްޔަށް ދޫކޮށްފައިވާ ބިމުގެ ކުލި ދައްކަންޖެހޭ މުއްދަތު ފާއިތުވާކަމަށް ބަޔާންކޮށް ހުވަދުއަތޮޅު ދެކުނުބުރީ ހޯޑެއްދޫ ކައުންސިލްގެ އިދާރާއިން މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ފޮނުވާފައިވާ މައްސަލަ ކޮމިޓީއާ ޙިއްސާކުރެއްވިއެވެ. އަދި ބޭންކް އޮފް މޯލްޑިވްސްގެ ސްކޭމްތަކާގުޅިގެން ކޯޓު އަމުރެއްނެތި ޑީއެކްޓިވޭޓް ކޮށްފައިވާ އެކައުންޓްތައް ރީއެކްޓިވޭޓް ކުރުމާގުޅޭގޮތުން ބޭންކް އޮފް މޯލްޑިވްސް އިން މޯލްޑިވްސް މަނިޓަރީ އޮތޯރިޓީއަށް ފޮނުވާފައިވާ ސިޓީގެ ކޮޕީ ކޮމިޓީއާ ޙިއްސާކުރެއްވިއެވެ.
ބައްދަލުވުމުގެ އެޖެންޑާ ބައްދަލުވުމުގެ ޔައުމިއްޔާ ބައްދަލުވުމުގެ ޚާޒިރީ© 2024 ރައްޔިތުންގެ މަޖިލިސްގެ އިދާރާA