މިއަދުގެ ބައްދަލުވުމުގައި ފުރަތަމަ އެޖެންޑާ ކުރެވިފައިވަނީ، މަޖިލީހުގެ ދާއިމީ ކޮމިޓީތަކުގައި ހިމެނިވަޑައިގަންނަވާ ސިޔާސީ ޕާޓީތަކަށް ނިސްބަތްވެވަޑައިގަންނަވާ މެންބަރުންނާއި، ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުން ތަމްސީލުކުރައްވާނެ ގޮތަށް ބަދަލުއައިސްފައިވުމާއެކު އަލުން ކޮމިޓީތައް އެކުލަވާލާފައިވާތީ، ކޮމިޓީގެ މުޤައްރިރާއި މުޤައްރިރުގެ ނައިބު ހޮއްވެވުމެވެ. މިމަސައްކަތް ކުރިޔަށް ގެންގޮސްދެއްވީ، އެސިސްޓަންޓް ޑިރެކްޓަރ ޖެނެރަލް، ލީގަލް އެފެއާރޒް އަލްޢުސްތާޛު ޙުސައިން ވަހީދުއެވެ. މިގޮތުން، ކޮމިޓީގެ މުޤައްރިރަކަށް ހުންނެވުމަށް ފެނިވަޑައިގަންނަވާ ބޭފުޅެއްގެ ނަންފުޅު ހުށަހެޅުއްވުމަށް ހުޅުވާލެވުނު ފުރުޞަތުގައި، މިއީ ކުރީގައިވެސް އޮތް ކޮމިޓީ ކަމަށްވާތީ އާއި ކޮމިޓީ އަލުން އެކުލަވާލަންޖެހޭ ކަމަށް ރައްޔިތުންގެ މަޖިލީހުގެ ގަވާއިދުގައި ބަޔާންކޮށްފައި ނުވާތީ މިހާރުވެސް ތިއްބެވި ކޮމިޓީގެ މުޤައްރިރާއި މުޤައްރިރުގެ ނައިބު ތިއްބެވުމަށް ފެންނަކަމަށް ބާރަށު ދާއިރާގެ މެންބަރު އަޙްމަދު ޢަބްދުﷲ ހުށަހެޅުއްވާ ވެލިދޫ ދާއިރާގެ މެންބަރު މުޙައްމަދު ޢަބްދުﷲ ޝަފީޤު ތާޢީދުކުރެވިއެވެ. އިތުރު ހުށަހެޅުމެއް ހުށަހެޅިފައިނުވާތީ މި ހުށަހެޅުމަށް ވޯޓަށް އެހުމުން ކޮމިޓީއަށް ވަޑައިގެން ވޯޓުގައި ބައިވެރިވެޑައިގެންނެވި މެންބަރުންގެ އަޢްލަބިއްޔަތުން (8 މެންބަރުން) މި ހުށަހެޅުން ފާސްކުރެވުނެވެ. އެއަށް ފަހު ދެން ކުރިއަށް ގެންދިއައީ އިލެކްޝަންސް ކޮމިޝަނުގެ މެންބަރެއްގެ މަޤާމު ހުސްވެފައިވާތީ، އެމަޤާމަށް އައްޔަނުކުރުމަށް ރައީސުލްޖުމްހޫރިއްޔާ ނަން ފޮނުއްވާފައިވާ ފަރާތުގެ ނަން ދިރާސާކުރުމުގެ މަސައްކަތް ކުރިއަށް ގެންދާނެގޮތަކާމެދު މަޝްވަރާކުރުމެވެ. އެގޮތުން، މި މައްސަލަ ދިރާސާ ކުރެއްވުމަށްޓަކައި ނަން ހުށަހެޅިފައިވާ ފަރާތުގެ ޝަރުތު ހަމަވޭތޯ ބެލުމަށް ރައްޔިތުންގެ މަޖިލީހުގެ ގަވާއިދުގައި ބަޔާންކުރާ ގޮތުގެމަތިން އެކުލަވާ މުވައްޒަފުންގެ ޕެނަލްއަކީ ޙުސައިން ވަޙީދު، ޝަހުޒާދު ސައީދު އަދި ފާތުމަތު ނަދާ ކަމަށާއި އާންމުންގެ އެއްވެސް ޝަކުވާއެއްވޭތޯ ބެލުމަށްޓަކައި 10 އޮކްޓޫބަރު 2023 ގެ 14:00 ގެ ނިޔަލަށް އިޢުލާން ކުރުމަށާއި އެފަރާތާ އިންޓަވިއު ކުރުން މާދަމާ 10 އޮކްޓޫބަރު 2023 ވަނަ ދުވަހު މެންދުރު 14:00 ގައި ކުރިއަށް ގެންދިއުމަށް ގަމު ދާއިރާގެ މެންބަރު މުޙައްމަދު ވިސާމް ހުށަހަޅުއްވާ ވެލިދޫ ދާއިރާގެ މެންބަރު މުޙައްމަދު ޢަބްދުﷲ ޝަފީޤު ތާޢީދުކުރެއްވިއެވެ. މިހުށަހެޅުމަށް ވޯޓަށް އެހުމުން އެ ވަގުތު ކޮމިޓީއަށް ވަޑައިގެން ތިއްބެވި މެންބަރުންގެ އިއްތިފާޤުން މި ހުށަހެޅުން ފާސްކުރެވުނެވެ.
ބައްދަލުވުމުގެ އެޖެންޑާ ބައްދަލުވުމުގެ ޔައުމިއްޔާ ބައްދަލުވުމުގެ ޚާޒިރީ© 2024 ރައްޔިތުންގެ މަޖިލިސްގެ އިދާރާA