މިއަދުގެ ބައްދަލުވުމުގައި، 2023 ވަނަ އަހަރުގެ އޮޑިޓަރ ޖެނެރަލްގެ އޮފީސް އޮޑިޓްކުރުމަށް، އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސްގައި ޕަބްލިކް އިންޓްރެސްޓް އެންޓިޓީ އޮޑިޓަރސްގެ ގޮތުގައި ރަޖިސްޓްރީކޮށްފައިވާ އޮޑިޓް ފަރމްއެއް ހަމަޖެއްސުމަށްޓަކައި އިދާރީ ގޮތުން ކުރަންޖެހޭ މަސައްކަތްކުރުމަށް ކޮމިޓީގެ ސެކްރެޓޭރިއޭޓްއާ ހަވާލުކުރެވުނެވެ. އެއަށްފަހު، އޮޑިޓަރ ޖެނެރަލްގެ އޮފީހުން 2024 ވަނަ އަހަރުގެ ތެރޭގައި ކުރިއަށް ގެންދިއުމަށް ރާވާ އޮޑިޓްތައް ހިމަނައިގެން އެ އަހަރަށް ކަނޑައަޅާ އެނުއަލް ވާރކް ޕްލޭން ތައްޔާރުކުރުމުގެ މަސައްކަތް ކުރަމުންދާތީ ދައުލަތުގެ ވަކި ދާއިރާއެއްގެ ނުވަތަ ސަރުކާރުން ހިންގާ ވަކި ޕްރޮގްރާމެއް ނުވަތަ ޕްރޮޖެކްޓެއްގެ ޚާއްޞަ އޮޑިޓެއް މި ވާރކް ޕްލޭންގައި ހިމަނައިގެން ކުރިއަށް ގެންދިއުމަށް ބޭނުންވާނަމަ، އެކަން 16 އޮގަސްޓު 2023 ގެ ކުރިން އަންގަވައިދެއްވުމަށް އެދި އެ އޮފީހުން ފޮނުއްވާފައިވާ ސިޓީއާމެދު މަޝަވަރާކުރެއްވިއެވެ. އެގޮތުން، އަންނަނިވި އޮޑިޓްތައް 2024 ވަނަ އަހަރުގެ އެނުއަލް ވާރކް ޕްލޭންގައި ހިމަނުއްވައިގެން ކުރިއަށް ގެންދެވުމަށް އެ އޮފީހަށް ދެންނެވުމަށް ނިންމެވިއެވެ. އަދި، ކޮމިޓީން ބޭނުންވެއްޖެ ހިނދެއްގައި ޚާއްޞަ އޮޑިޓެއް ކުރުމަށް އެ އޮފީހަށް އަންގަވައިފިނަމަ، އެ އޮޑިޓެއް ނުވަތަ އޮޑިޓްތަކެއް ކުރެއްވުމަށް ވާރކް ޕްލޭންގައި 4 އެލޮކޭޝަން ހިމަނުއްވަން އެ އޮފީހުގައި ދެންނެވުމަށްވެސް ނިންމެވިއެވެ. • ފުޓްބޯޅަ އެސޯސިއޭޝަން އޮފް މޯލްޑިވްސްގެ ޚާއްސަ އޮޑިޓް؛ • ހައުސިންގ ޑިވެލޮޕްމަންޓް ކޯޕަރޭޝަންގެ ޚާއްސަ އޮޑިޓް؛ • މާލެ ސިޓީ ކައުންސިލްގެ ޚާއްސަ އޮޑިޓް؛ އަދި • ވެލާނާ އިންޓަރނޭޝަނަލް އެއަރޕޯޓް އެކްސްޕެންޝަން ޕްރޮޖެކްޓްގެ ޚާއްސަ އޮޑިޓް. މީގެ އިތުރުން، އަރިއަތޮޅު އުތުރުބުރީ ބޮޑުފޮޅުދޫ ކައުންސިލްގެ އިދާރާއިން ސްޕެޝަލް ޑިއުޓީ އެލަވަންސް ދިނުމާ ގުޅޭގޮތުން ފޮނުއްވާފައިވާ ސިޓީއާމެދު މަޝްވަރާ ކުރެއްވުމަށްފަހު، މި މައްސަލަ ދެން އޮންނަ ބައްދަލުވުމެއްގައި އިތުރަށް ދިރާސާކުރެއްވުމަށް ނިންމެވިއެވެ. އެއަށްފަހު، އަންނަނިވި މަޢުލޫމާތުތައް ކޮމިޓީއާ ޙިއްސާކުރެއްވިއެވެ. • އޮޑިޓަރ ޖެނެރަލް އޮފީހުގެ 2023 ވަނަ އަހަރުގެ ފުރަތަމަ ތިންމަހުގައި ކުރެވުނު މަސައްކަތްތަކާއި އޮފިސް ހިނގަމުންދާގޮތުގެ ރިޕޯޓު؛ • 2024 ވަނަ އަހަރުގެ ބަޖެޓޭ ގުޅޭގޮތުން މާލެއަތޮޅު މާފުށީ ކައުންސިލުން މިނިސްޓްރީ އޮފް އެޑިއުކޭޝަނަށް ފޮނުއްވާފައިވާ ސިޓީ (ރައްޔިތުންގެ މަޖިލީހުގެ އިދާރާއަށް ކޮޕީ ކޮށްފައިވާ ސިޓީ)؛ • މާލެ ސިޓީ ކައުންސިލުން ލޯކަލް ގަވަރމަންޓް އޮތޯރިޓީއަށް ފޮނުއްވާފައިވާ ސިޓީ (ރައްޔިތުންގެ މަޖިލީހުގެ އިދާރާއަށް ކޮޕީ ކޮށްފައިވާ ސިޓީ)؛ • މޯލްޑިވްސް ބްރޯޑްކާސްޓިންގ ކޮމިޝަނުން ރައީސުލްޖުމްހޫރިއްޔާގެ އޮފީހަށް ފޮނުއްވާފައިވާ ސިޓީ (ރައްޔިތުންގެ މަޖިލީހުގެ އިދާރާއަށް ކޮޕީ ކޮށްފައިވާ ސިޓީ)؛ • ހުވަދުއަތޮޅު އުތުރުބުރީ ކޮލަމާފުށީ ކައުންސިލްގެ އިދާރާއިން މިނިސްޓްރީ އޮފް ފިނޭންސްއަށް ފޮނުއްވާފައިވާ ސިޓީ (ރައްޔިތުންގެ މަޖިލީހުގެ އިދާރާއަށް ކޮޕީ ކޮށްފައިވާ ސިޓީ)؛ • ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑް (އެޗް.ޑީ.ސީ) އަށް ބޭނުންވާ ވާރކިންގ ކެޕިޓަލް ހަމަޖެއްސުމަށް މޯލްޑިވްސް އިސްލާމިކް ބޭންކް (އެމް.އައި.ބީ) އިން ނަގާފައިވާ ލޯނުތަކުގެ މަޢުލޫމާތު؛ • ފެނަކަ ކޯޕަރޭޝަން ލިމިޓެޑްއަށް ބޭނުންވާ ވާރކިންގ ކެޕިޓަލް ހަމަޖެއްސެވުމަށް މޯލްޑިވްސް އިސްލާމިކް ބޭންކް (އެމް.އައި.ބީ) އިން ނަގާފައިވާ ލޯނުތަކާ ގުޅޭގޮތުން އެ ކޯޕަރޭޝަނުން ފޮނުއްވާފައިވާ ސިޓީ؛ އަދި • މިނިސްޓްރީ އޮފް ފިނޭންސް އިން ފޮނުއްވާފައިވާ 2024 ވަނަ އަހަރުގެ ބަޖެޓާގުޅޭ ބަޖެޓް ޕޮޒިޝަން ރިޕޯޓް. އޭގެ އިތުރުން ރިޓަޔަރމަންޓް ފަންޑާ ގުޅޭގޮތުން އަމިއްލަ ފަރާތަކުން ފޮނުއްވާފައިވާ މައްސަލައާމެދު މަޝްވަރާކުރެއްވުމަށްފަހު، ޤާނޫނު ނަންބަރު 2009/8 (ދިވެހިރާއްޖޭގެ ޕެންޝަނާބެހޭ ޤާނޫނު) ގެ ދަށުން ރިޓަޔަރމަންޓް ޕެންޝަނުގެ ފައިސާ ދިނުމުގެ މަސައްކަތްތައް ކުރައްވަމުން ގެންދަވަނީ މޯލްޑިވްސް ޕެންޝަން އެޑްމިނިސްޓްރޭޝަން އޮފީހުން ކަމަށާއި، އެ ފަރާތުގެ ޕެންޝަން ފަންޑަށް ޖަމާކޮށްފައިވާ ފައިސާއާ ގުޅޭގޮތުން އިތުރު ތަފްޞީލު ބޭނުންވާނަމަ، އެކަންކަން އެ އޮފީހަށް ހުށަހަޅުއްވައިގެން ކުރިއަށް ގެންދެވުމަށް އެ ފަރާތުގައި ދެންނެވުމަށް ނިންމެވިއެވެ.